माघ १८, दमक / खयरबारी युवा क्लबद्वारा निर्माणाधीन मुक्तिघाटको ढलाई कार्य शुक्रबार हर्षोल्लासका साथ सफलतापूर्वक सम्पन्न भएको छ। क्लबले श्रमदानको अभियान सञ्चालन गर्दै मुक्तिघाट तथा बहुउद्देश्यीय भवन निर्माणको काम तीव्र गतिमा अगाडि बढाइरहेको छ।
“खयरबारी युवा क्लबको पहिचान–मुक्तिघाट बनाउने हाम्रो अभियान” भन्ने मूल उद्देश्यसहित सुरु गरिएको उक्त परियोजनाअन्तर्गत मुक्तिघाट तथा बहुउद्देश्यीय भवन निर्माण भइरहेको हो। २०८२ साल मङ्सिर ९ गते शिलान्यास गरिएको यस भवनका लागि रत्नकुमारी खनालले जग्गादान गर्नुभएको हो। क्लबका अनुसार भवन निर्माणको अनुमानित लागत करिब ३० लाख रुपैयाँ रहेको छ।
क्लबका अध्यक्ष रामशाही ठाकुरीका अनुसार आवश्यक लागत जुटाउन बडादशैंमा चिठा कार्यक्रम, तिहारमा देउसी–भैलो तथा तेस्रो चरणमा देश–विदेशमा रहनुभएका सहयोगीहरूलाई आह्वान गरी रकम सङ्कलन गरिएको हो। उहाँले स्थानीय सरकारबाट कुनै पनि आर्थिक सहयोग नलिइएको स्पष्ट पार्नुभयो।
हालसम्म करिब ११ लाख रुपैयाँ सङ्कलन भइसकेको र करिब ८ लाख रुपैयाँ निर्माण कार्यमा खर्च भइसकेको अध्यक्ष ठाकुरीले जानकारी दिनुभयो। तत्कालका लागि दुईतले मल्टीपर्पोज भवन निर्माण गरिनेछ, जसअन्तर्गत माथिल्लो तलामा फलैँचा तथा खाजा खाने व्यवस्था र तल्लो तलामा ट्वाइलेट, बाथरूम तथा इस्टर रुम रहने योजना रहेको छ। निर्माण कार्य आउँदो वैशाखसम्म सम्पन्न गर्ने लक्ष्य लिइएको छ।
खयरबारी युवा क्लबका सल्लाहकार संयोजक केदार खड्काका अनुसार लामो समयदेखि स्थानीय सरकारसँग घाट निर्माणका लागि सहयोग माग गरिँदै आए पनि सुनुवाइ नभएपछि क्लबले आफ्नै पहलमा निर्माण सुरु गरेको हो।
क्लबले सहयोगी दाताहरूलाई प्रोत्साहनस्वरूप सम्मानको व्यवस्था पनि गरेको छ। रु. १ देखि ४,९९९ सम्म सहयोग गर्ने दातालाई उद्घाटन सत्रमा सम्मान गरिनेछ भने रु. ५,००० देखि ९,९९९ सम्म सहयोग गर्ने दातालाई कदरपत्रसहित सम्मान प्रदान गरिनेछ। त्यस्तै रु. १०,००० वा सोभन्दा बढी सहयोग गर्ने दाताको नाम शिलालेखमा उल्लेख गरी कदरपत्रसहित सम्मान गरिने क्लबले जनाएको छ।
मुक्तिघाट निर्माणलाई सामाजिक उत्तरदायित्वको महत्वपूर्ण परियोजनाका रूपमा लिँदै क्लबले सबै सहयोगी हातहरूलाई पुनः साथ दिन आह्वान गरेको छ।
