माघ २२, इलाम / इलामको चुलाचुली गाउँपालिका–५ स्थित श्री भानु माध्यमिक विद्यालय, बुकुवामा अध्ययनरत विद्यार्थीहरूलाई पोशाक, जुत्ता तथा मोजा वितरण गरिएको छ। आमा डेन्टल केयर प्रा.लि. दमकको आर्थिक सहयोगमा कक्षा १ देखि ४ सम्म अध्ययनरत ७१ जना विद्यार्थीलाई उक्त सामग्री वितरण गरिएको हो।
आमा डेन्टल केयर प्रा.लि. दमककी सञ्चालिका मन्दिरा श्रेष्ठको जन्मदिनको अवसर पारेर फजुल खर्चलाई निरुत्साहित गर्ने उद्देश्यसहित करिब १५ हजार रुपैयाँ बराबरको सामग्री वितरण गरिएको आयोजकले जनाएको छ। कार्यक्रममा बोल्दै आमा डेन्टल केयर प्रा.लि.का सञ्चालक अर्जुन श्रेष्ठले समाजसेवा गर्न धनसँगै मन पनि आवश्यक हुने बताउँदै यस्ता सामाजिक कार्यले समाजमा सकारात्मक सन्देश फैलाउने धारणा व्यक्त गर्नुभयो।
विद्यालयमा हाल विपन्न वर्गका २८१ जना विद्यार्थी अध्ययनरत रहेको जानकारी विद्यालयका प्रधानाध्यापक रघुनाथ मिश्रले दिनुभयो। उहाँले यस किसिमको सहयोगले विद्यार्थीहरूलाई पठनपाठनमा थप उत्साह मिल्ने बताउनुभयो। कार्यक्रममा विद्यालय व्यवस्थापन समितिका अध्यक्ष बुद्धिप्रसाद सम्मानफेले सहयोगप्रति धन्यवाद व्यक्त गर्दै अनिवार्य रूपमा पोशाक लगाएर विद्यालय आउन विद्यार्थीहरूलाई आग्रह गर्नुभयो।
कार्यक्रम भानु मिलन बाल क्लबकी अध्यक्ष निशा सम्भाव्यको अध्यक्षतामा सम्पन्न भएको थियो भने सञ्चालन विद्यालयका शिक्षक माधव खनालले गर्नुभएको थियो। आमा डेन्टल केयर प्रा.लि.ले यसअघि पनि यस्ता सामाजिक तथा मानवीय सेवा कार्यक्रमहरू निरन्तर गर्दै आएको जनाएको छ।
