माघ २४ , दमक / दमक बहुमुखी क्याम्पसले शुक्रबारदेखि छात्रावास सेवा सञ्चालनमा ल्याएको छ । शुक्रबार एक औपचारिक कार्यक्रमको आयोजना गरी क्याम्पसले छात्रावासको उद्घाटन गरेको हो ।
दमक नगरपालिका–९ स्थित क्याम्पस मोडबाट दक्षिणतर्फ क्याम्पस झर्ने बाटोमै रहेको सुरक्षित तथा पूर्ण कम्पाउन्डसहितको घर भाडामा लिएर अस्थायी रूपमा छात्रावास सञ्चालन गरिएको क्याम्पस प्रमुख यज्ञराज गिरिले जानकारी दिनुभयो । उहाँका अनुसार हाल उक्त छात्रावासमा ५० जना विद्यार्थी अट्ने व्यवस्था गरिएको छ भने दमकभन्दा टाढाबाट अध्ययनका लागि आउने विद्यार्थीहरूलाई न्यूनतम शुल्कमा बसोबासको सुविधा उपलब्ध गराइनेछ ।
छात्रावासमा जम्मा २० वटा कोठा रहेका छन् । साथै भान्सा तथा भण्डार कक्ष छुट्टै व्यवस्था गरिएको जनाइएको छ । कार्यक्रममा क्याम्पस व्यवस्थापन समिति अध्यक्ष ढुण्डिराज भण्डारीले हाल सञ्चालनमा ल्याइएको छात्रावास अस्थायी भएको उल्लेख गर्दै भविष्यमा क्याम्पसकै आफ्नै स्थायी भवन निर्माण गरी छात्रावास सञ्चालन गर्ने योजना रहेको बताउनुभयो । उहाँका अनुसार जग्गा खरिद प्रक्रिया अघि बढिसकेको र जग्गा प्राप्त भएपछि आवश्यकता अनुसार स्थायी छात्रावास निर्माण गरिनेछ ।
छात्रावास उद्घाटन कार्यक्रमका प्रमुख अतिथि दमक नगरपालिकाका प्रमुख रामकुमार थापा रहनुभएको थियो । कार्यक्रममा विभिन्न सरोकारवाला, शिक्षा प्रेमी, क्याम्पस सञ्चालक समिति पदाधिकारी तथा सदस्यहरूको उल्लेखनीय उपस्थिति रहेको थियो ।
