चैत १३, शिवसताक्षी / झापाको झिलझिलेमा रहेको ‘वाटर किङ्गडम पार्क’ नयाँ ढंगबाट पुनः सञ्चालनमा आएको छ। वि.सं. २०७८ पुस २५ गते उद्घाटन भएको उक्त पार्क कोरोना महामारीपछि आर्थिक समस्याका कारण केही समय सुस्ताएपछि पुनः सक्रिय बनाइएको हो।

पार्कका सञ्चालक तथा स्थानीय उद्यमी राजकुमार सङ्ग्रौलाका अनुसार हालसम्म करिब ६५ करोड रुपैयाँभन्दा बढी लगानी भइसकेको छ। कोरोना महामारी र त्यसपछिको वित्तीय संकटका कारण पूर्ण रूपमा सञ्चालनमा कठिनाइ भए पनि अब आगामी वैशाखदेखि पार्कलाई पूर्ण क्षमतामा सञ्चालन गर्ने तयारी गरिएको उहाँले बताउनुभयो।

कोरोनाकालमा बैंकबाट लिएको ऋणको ब्याजदर १८ प्रतिशतसम्म पुगेपछि पार्क आर्थिक दबाबमा परेको थियो। तर, बैंकिङ प्रणालीमा सुधार आउँदै गएसँगै व्यवसायलाई पुनर्जीवित गर्ने वातावरण बनेको सञ्चालक सङ्ग्रौलाको भनाइ छ।

पार्क बन्द भएको भन्ने हल्लाले व्यवसायमा असर पारेको उल्लेख गर्दै उहाँले पार्क निरन्तर सञ्चालनमै रहेको स्पष्ट पार्नुभयो। हाल पार्कभित्रका सबै मनोरञ्जनात्मक संरचनाहरू पुनः सञ्चालनमा ल्याइएको छ।

पार्कमा जिपलाइन, वेभ पुल, स्विमिङ पुल, बालबालिकाका लागि किड्स पुल, वाटर एक्टिभिटी स्टेशन, कृत्रिम गुफा तथा विभिन्न आकर्षक मूर्तिकलाहरू रहेका छन्। साथै विवाह, ब्रतबन्ध, पार्टी तथा अन्य सामाजिक कार्यक्रम आयोजना गर्न विशेष व्यवस्था समेत गरिएको छ।

तीन बिघा क्षेत्रफलमा फैलिएको पार्कमा सात वटा भूकम्पप्रतिरोधी भवन, दुई वटा सुविधा सम्पन्न रेस्टुरेन्ट, ३५ वटा आधुनिक आवासीय कोठा तथा १५० देखि ४०० जनासम्म अट्ने चार वटा सभाहल सञ्चालनमा रहेका छन्।

निजी लगानीमा कोशी प्रदेशकै ठूलो परियोजनामध्ये एक मानिएको यस पार्कले आन्तरिक पर्यटन प्रवर्द्धनमा महत्वपूर्ण योगदान पुर्‍याउने अपेक्षा गरिएको छ।