चैत १९, दमक / चैत्र महिनाको अन्तिम साता नजिकिँदै गर्दा तराईको तल्लो क्षेत्र झापाको दमक नगरपालिका–१० सेतुमारी क्षेत्रमा शीतलहरसहित बाक्लो हुस्सु लागेको छ। यसअघिका वर्षहरूमा यस समयमा यस्तो मौसम नदेखिएको भन्दै स्थानीय सर्वसाधारणले यसलाई अस्वाभाविक बताएका छन्।
स्थानीय किसान हरि लुइटेलका अनुसार चैत्र महिनामा शीतलहर र बाक्लो हुस्सु लाग्नु अचम्मको विषय हो। “यो समयमा यस्तो मौसम कहिल्यै देखिएको थिएन,” उनले भने, “यसले बाली लगाउने काममा समस्या पारेको छ।”
यतिबेला चैते धान, मकै, काँक्रा, टमाटर लगायतका बाली लगाउने मुख्य सिजन हो। तर असामान्य मौसमका कारण किसानहरू अन्योलमा परेका छन्। शीतलहर र घना हुस्सुले बालीको वृद्धि तथा उत्पादनमा असर पर्ने चिन्ता किसानहरूले व्यक्त गरेका छन्।
स्थानीयले जलवायु परिवर्तनको प्रभावका कारण यस्तो अस्वाभाविक मौसम देखिएको हुनसक्ने अनुमान गरेका छन्। कृषिसँग प्रत्यक्ष जोडिएका किसानहरू अहिले यस्तो मौसम देखेर अचम्ममा परेका छन्।
