दमक, झापा । आफ्नो जन्मदिनलाई सामाजिक सेवासँग जोड्दै पहिलो पाइला नेपाल दमक शाखाका उपाध्यक्ष लबराज खड्काले विद्यार्थीलाई शैक्षिक सामग्री वितरण गरेर जन्मदिन मनाउनुभएको छ।
पहिलो पाइला नेपाल दमक शाखाको आयोजनामा आज दमक–१० स्थित श्री पशुपति आदरभूत विद्यालयमा आयोजित कार्यक्रममा खड्काको सौजन्यमा विद्यालयका एक सयभन्दा बढी विद्यार्थीलाई स्टेशनरी सामग्री वितरण गरिएको हो।
विद्यालय व्यवस्थापन समितिका अध्यक्ष अर्जुन धिमालको अध्यक्षतामा सम्पन्न कार्यक्रममा दमक–१० का वडा सदस्य रविन्द्र लिम्बू प्रमुख अतिथि तथा सामाजिक व्यक्तित्व एवं निम्स नेशनल अस्पताल दमकका अध्यक्ष उमाकान्त आचार्य विशेष अतिथिका रूपमा सहभागी हुनुहुन्थ्यो।
कार्यक्रममा पहिलो पाइला नेपाल दमक शाखाका अध्यक्ष राजु निरौला, सल्लाहकारहरू गणेश प्रधान, महेश घिमिरे र सुभास सुवेदी, उपाध्यक्ष लबराज खड्का, सचिव पूजा दाहाल, केन्द्र सचिव दिवस खतिवडा, गौरादह शाखा सचिव प्रदीप धमला लगायत संस्थाका सदस्य, विद्यालयका शिक्षक–शिक्षिका तथा विद्यार्थीहरूको उपस्थिति रहेको थियो।
जन्मदिनको अवसरमा शैक्षिक सामग्री सहयोग गर्नुभएका उपाध्यक्ष खड्काले जन्मदिनमा हुने अनावश्यक तथा फजुल खर्चलाई निरुत्साहित गर्दै सोही रकम विद्यार्थीको शिक्षामा खर्च गर्न पाउँदा आफूलाई खुसी लागेको बताउनुभयो।
उहाँले विद्यार्थीमा पठन संस्कृतिको विकास गर्ने र सानो सहयोगले पनि बालबालिकाको उज्ज्वल भविष्य निर्माणमा योगदान पु¥याउने उद्देश्यले जन्मदिनलाई सामाजिक सेवासँग जोडेको बताउनुभयो।
कार्यक्रममा सहभागी प्रमुख अतिथि, विशेष अतिथिलगायत वक्ताहरूले जन्मदिनको अवसरमा विद्यार्थीलाई शैक्षिक सामग्री वितरण गर्ने कार्य उदाहरणीय रहेको भन्दै खड्कालाई जन्मदिनको शुभकामना व्यक्त गर्नुभएको थियो।
विद्यालयका प्रधानाध्यापक शिताराम निरौलाले सञ्चालन गर्नुभएको कार्यक्रम भव्य रूपमा सम्पन्न भएको आयोजकले जनाएको छ।
