दमक । दमकमा बिहीबारदेखि कोशी प्रदेश जिल्लास्तरीय प्रथम भेट्रान च्यालेन्ज कप–२०८३ सुरु भएको छ। प्रतियोगिताको पहिलो खेलमा आयोजक दमक भेट्रान निलोले दमक भेट्रान जदालाई ३–१ गोल अन्तरले पराजित गर्दै विजयी सुरुवात गरेको छ।
दमक–२ स्थित बेलडाँगी खेलमैदानमा भएको खेलमा दमक भेट्रान निलोका तर्फबाट खेलको १०औँ मिनेटमा जर्सी नम्बर ११ का गंगा लिम्बूले पहिलो गोल गरेका थिए। लगत्तै ११ मिनेटमा जर्सी नम्बर १० का जगेस चौधरीले गोल गर्दै दमक भेट्रान जदालाई खेलमा फर्काएका थिए।
त्यसपछि दमक भेट्रान निलोका जर्सी नम्बर १० का हरि शर्माले खेलको १९औँ मिनेटमा गोल गर्दै टोलीलाई पुनः अग्रता दिलाए। हाफ टाइमपछि थपिएको समयको अन्तिम मिनेटमा शर्माले व्यक्तिगत दोस्रो गोल गरेपछि दमक भेट्रान निलो ३–१ ले विजयी भएको हो।
यो जितसँगै दमक भेट्रान निलो प्रतियोगिताको क्वार्टरफाइनलमा प्रवेश गरेको छ। बिर्तामोड भेट्रान सँग अब गत १७ गते भिड्ने छ ।
प्रतियोगिताको विजेताले नगद १ लाख १ हजार रुपैयाँ तथा उपविजेताले ५१ हजार रुपैयाँ पुरस्कार प्राप्त गर्नेछन्। विजेताले प्राप्त गर्ने १ लाख रुपैयाँ पुरस्कार दमकस्थित माया क्याफेले सौजन्यस्वरूप सहयोग गरेको आयोजकले जनाएको छ।
दमक भेट्रान फुटबल क्लबका अध्यक्ष गजेन्द्र देवानको अध्यक्षतामा प्रतियोगिता सञ्चालन भइरहेको छ। उद्घाटन समारोहमा दमक नगरपालिकाकी उपप्रमुख रेगिना भट्टराई प्रसाईं प्रमुख अतिथिका रूपमा उपस्थित थिइन्।
प्रतियोगिताका खेलहरू २५–२५ मिनेट गरी कुल ५० मिनेटको हुने रेफ्री इजु तामाङले जानकारी दिए।
राप्रपाकी सांसद खुश्बु ओलीको चरित्रहत्या गरेको आरोपमा दुई जना पक्राउ परेका छन् ।
ओलीले आफूले साइबर ब्युरोमा दर्ता गराएका उजुरीहरूका आधारमा २ जनालाई पक्राउ गरेको प्रहरीले जानकारी गराएको बताइन् । शनिबार चितवनबाट दुबै जना पुरुष पक्राउ परेका हुन् ।
चरित्रहत्याका साथै निरन्तर गालीगलौज, धम्की तथा घृणास्पद अभिव्यक्ति सामाजिक सञ्जालमार्फत फैलाएको भन्दै उनले शुक्रबार उजुरी दिएकी थिइन् । उजुरी दिएपछि उनले आरोपीहरुको फोटो समेत सामाजिक सञ्जालमार्फत सार्वजनिक गरेकी थिइन् ।
उनले पक्राउ परेकामाथि आवश्यक कानुनी कारबाहीको प्रक्रिया अघि बढाइएको प्राप्त जानकारी दिँदै असहमति राख्नु, आलोचनात्मक टिप्पणी गर्नु वा फरक विचार व्यक्त गर्नु लोकतान्त्रिक समाजको स्वाभाविक र स्वागतयोग्य पक्ष भए पनि कसैको चरित्रहत्या गर्ने, गालीगलौज गर्ने, धम्की दिने र घृणास्पद अभिव्यक्ति फैलाउने कार्य कुनै पनि हालतमा स्वीकार्य हुन नसक्ने बताइन् ।
झापाको दमक नगरपालिका परिसरमा निर्माण गरिएको धिमाल जातिका ‘पहिलो नागरिक’ को प्रतीकात्मक स्तम्भ जेन्जी आन्दोलनका क्रममा भत्काइएपछि धिमाल समुदायले त्यसको पुनःनिर्माण र दोषीमाथि कार#बाहीको माग पुनः उठाएका छन् ।
धिमाल समुदायका अगुवाहरूले सांस्कृतिक तथा ऐतिहासिक पहिचानसँग जोडिएको स्तम्भ भत्किएको लामो समय बितिसक्दा पनि पुनःनिर्माणको प्रक्रिया अघि नबढेको भन्दै असन्तुष्टि जनाएका छन् । साथै, स्तम्भ भत्काउने घ#टनामा संलग्न व्यक्तिहरूमाथि अहिलेसम्म स्पष्ट कानुनी का#रबाही नभएको भन्दै उनीहरूले सम्बन्धित निकायको ध्यानाकर्षण गराएका छन् ।
समुदायका सदस्यहरूका अनुसार उक्त स्तम्भ धिमाल जातिको इतिहास, पहिचान र सम्मानसँग जोडिएको प्रतीक हो । त्यसैले यसलाई यथाशीघ्र पुनःनिर्माण गरी दोषीलाई कानुनी दायरामा ल्याउनुपर्ने उनीहरूको माग छ ।
धिमाल समुदायले स्थानीय सरकार तथा सम्बन्धित निकायसँग स्तम्भ पुनःनिर्माणको स्पष्ट कार्ययोजना सार्वजनिक गर्न र घट#नाको निष्पक्ष छानबिन गरी जिम्मेवार व्यक्तिमाथि कारबाही गर्न आग्रह गरेका छन् ।
श्रावण १, झापा झापाको कमल गाउँपालिका ६ स्थित लखनपुर स्वास्थ्य चौकीको नवनिर्मित भवनबाट आधारभूत स्वास्थ्य सेवा सहित नियमित सेवा शुभारम्भ भएको छ।
नवनिर्मित भवनबाट सेवा सञ्चालनमा आएपछि स्थानीय नागरिकले थप व्यवस्थित, सहज र गुणस्तरीय स्वास्थ्य सेवा प्राप्त गर्ने अपेक्षा गरिएको छ। स्वास्थ्य चौकीबाट ओपीडी सेवा, सुरक्षित मातृत्व सेवा, खोप सेवा, परिवार नियोजन, बाल स्वास्थ्य, पोषण, प्रयोगशाला,ड्रेसिङ,सुत्केरी घरभेट सेवा तथा अन्य आधारभूत स्वास्थ्य सेवाहरू प्रदान गरिनेछ।
स्वास्थ्य चौकीमा मेडिकल अधिकृत (डाक्टर) सहित बर्थिङ्ग सेन्टर, आकस्मिक उपचार सहित क्रमशः थप सेवा विस्तारको व्यवस्था मिलाउदै लगिने गाउँपालिका अध्यक्ष हुकुम सिंह राईले बताए ।
सेवा शुभारम्भसँगै स्वास्थ्य संस्थाले समुदायलाई नजिकबाट प्रभावकारी स्वास्थ्य सेवा उपलब्ध गराउँदै नागरिकको स्वास्थ्य अधिकार सुनिश्चित गर्न महत्वपूर्ण योगदान पुग्ने विश्वास गरिएको स्वास्थ्य केन्द्र प्रमुख देवराज पराजुलीको भनाई छ ।
श्रावण १, दमक दमकमा शैक्षिक परामर्श व्यवसायीहरूको उल्लेखनीय सहभागितामा “शैक्षिक परामर्श, भाषा शिक्षण र तयारी कक्षा सञ्चालन तथा व्यवस्थापन नियमावली, २०८३” विरुद्ध शान्तिपूर्ण विरोध र्याली सम्पन्न भएको छ।
शैक्षिक परामर्श क्षेत्रको अस्तित्व, गुणस्तर, पारदर्शिता तथा विद्यार्थी हितको संरक्षण गर्दै सरोकारवालाहरूको साझा चासो, सुझाव र मागहरू सम्बन्धित निकायसमक्ष जिम्मेवारीपूर्वक पुर्याउने उद्देश्यले उक्त कार्यक्रम आयोजना गरिएको हो।
सम्पूर्ण शैक्षिक परामर्श व्यवसायीहरू एकताबद्ध भएर संवाद, सहकार्य र रचनात्मक समाधानको पक्षमा रहेको सन्देशसमेत यस कार्यक्रममार्फत प्रवाह गरिएको छ।
झापा, असार २६ । झापाको दमकमा छुरा प्रहारबाट एकजनाको मृत्यु भएको छ ।दमक नगरपालिका २ हिमालय माध्यमिक विद्यालय छेउमा भारत लखनउ बस्ने अन्दाजी बर्ष ३५ का साहिल कान्त र सोही ठाउँ बस्ने मोहम्मद सोनु भन्ने सहवाज हुसेनबिच विवाद भएको थियो । विवादका क्रममा छुरा प्रहार हुँदा साहिल कान्तको घाँटीमा गम्भीर चोट लागेको थियो ।
घटनाबारे प्रहरीले आज बिहान ५;३० बजे खबर पाएको थियो । इलाका प्रहरी कार्यालय दमकवाट प्रहरी टोली खटिएर घाइतेलाई उपचारको लागि दमक अस्पताल पठाएको थियो । उपचारको क्रमममा बिहान ६;३० बजे घाइतेको मृत्यु भएको हो । चक्कु प्रहार गर्नेको खोजतलास भइरहेको जनाइएको छ ।
उनीहरु भारतबाट आएर दमकस्थित एनएमसी डेरीमा सफ्टवेयर इन्जिनियरका रूपमा कार्यरत थिए । बिहान ५ बजेतिर ठूलो आवाज आएपछि हेर्न जाँदा घरधनीले साहिल कान्तलाई रगताम्य फेला पारेका थिए। मादक पदार्थ सेवन गरी उनीहरुले विवाद गरेको जनाइएको छ ।
असार २५ , दमक / झापाको दमक–७ निवासी समाजसेवी रामकुमार थापाको आगलागीबाट पूर्ण रूपमा नष्ट भएको घर पुनर्निर्माणका लागि गठन गरिएको राम थापा आवास पुनर्निर्माण नागरिक सहयोग समिति ले हालसम्म २२ लाख २५ हजार ६५० रुपैयाँ सहयोग संकलन भएको जनाएको छ ।
समितिले सार्वजनिक गरेको विवरणअनुसार २०८२ चैत २४ गते भएको आगलागीपछि आवास पुनर्निर्माणका लागि देश तथा विदेशमा रहेका सहयोगी, विभिन्न संघसंस्था, व्यवसायी तथा सर्वसाधारणबाट आर्थिक सहयोग संकलन गरिएको हो ।
सार्वजनिक विवरणअनुसार टिका थापाले २ लाख रुपैयाँ, दमक नगर इसाई समाजले १ लाख २५ हजार ५०० रुपैयाँ तथा रेवत दर्नाल, गोपाल पोखरेल, नीरज थापा, मोहनकेश थापा र निनम कुमार मगरले जनही १ लाख रुपैयाँ सहयोग गरेका छन् ।
त्यसैगरी राजु खड्का ९१ हजार, नपा स्वास्थ्य शाखा परिवारबाट ७५ हजार, पृथ्वी माध्यमिक विद्यालयबाट ७१ हजार रुपैयाँ, बासुदेव भट्टराई, अर्जून तुम्रुक, सिजिटन जेम्सफार र्इं. स्कुल ५१ हजारका दरले सहयोग गरेका छन् । यस्तै ५० हजार सहयोग गर्नेहरु कृष्णकुमार भण्डारी, सूर्यमान थापा, बालानन्द काफ्ले, डम्बरकेशरभुजेल, भिम प्रसाद पौडेल, कृष्णराधा ढुगाना, प्रकाश शर्मा, उर्मिला तिम्सिना, अर्जुन राई पुरानो काठपात बिक्री रहेका छन् ।
यस्तै शुभारम्भ टो.बि. संस्था ४५ हजार ९७०, ओमनाथ बाँनिया ४५ हजार, भारतीय भूपू सैनिक संगठन ४० हजार, टिकाराम मगर, टंकप्रसा काफेले दुई जनाबाट ३५ हजार, वंशिधर ्रन्यौपाने उदयपुर २५ हजार ५५५, इन्द्रा नरप्रसाद राई २५ हजार, पदम प्रसाद घिमिरे २५ हजार, सिकन्दर मल्लिक डोम परिवार २५ हजार, सिपिनी टि.बि. संस्था २१ हजार ३०० अन्य २१ हजारदेखि १ हजारसम्मका दाता रहेका छन् ।
समितिले सहयोग गर्ने सबै व्यक्ति तथा संस्थाप्रति आभार व्यक्त गर्दै आवास पुनर्निर्माण सम्पन्न नहुँदासम्म सहयोग अभियानलाई निरन्तरता दिने जनाएको छ । प्राप्त सहयोग रकम र खर्चको विवरण पारदर्शी रूपमा सार्वजनिक गर्दै जाने प्रतिबद्धता पनि समितिले व्यक्त गरेको छ ।
झापा, कमल / कमल गाउँपालिकाले शिक्षा क्षेत्रको गुणस्तर अभिवृद्धि, उत्कृष्ट कार्यसम्पादनको कदर तथा शिक्षण पेसाप्रति थप उत्साह र प्रेरणा प्रदान गर्ने उद्देश्यका साथ उत्कृष्ट शिक्षक, कर्मचारी तथा सेवानिवृत्त शिक्षकलाई सम्मान तथा पुरस्कृत गरेको छ। गाउँपालिकाको शिक्षा शाखाले चालु आर्थिक वर्षको स्वीकृत वार्षिक कार्यक्रमअन्तर्गत बुधबार आयोजित विशेष कार्यक्रममा सामुदायिक विद्यालयमा कार्यरत उत्कृष्ट शिक्षक, कर्मचारी तथा लामो समयसम्म शिक्षा क्षेत्रमा योगदान पुर्याई सेवानिवृत्त भएका शिक्षकहरूलाई सम्मान गरेको हो। गाउँपालिका अध्यक्ष हुकुमसिंह राईको अध्यक्षतामा सम्पन्न कार्यक्रममा विभिन्न सामुदायिक विद्यालयका शिक्षक, विद्यालय कर्मचारी, जनप्रतिनिधि, शिक्षा शाखाका पदाधिकारी, विद्यालय व्यवस्थापन समितिका प्रतिनिधि तथा सरोकारवालाको उल्लेखनीय सहभागिता रहेको थियो।
कार्यक्रममा उत्कृष्ट कार्यसम्पादन गरेका शिक्षक तथा कर्मचारीलाई दोसल्ला ओढाएर सम्मानपत्र र नगद पुरस्कार प्रदान गरिएको थियो। साथै, लामो समयसम्म शिक्षण पेसामा समर्पित रही समाजमा ज्ञान, सीप र संस्कार विकासमा महत्वपूर्ण योगदान पुर्याएका सेवानिवृत्त शिक्षकहरूलाई पनि सम्मानपत्र, दोसल्ला तथा नगदसहित सम्मान गरिएको गाउँपालिकाले जनाएको छ।कार्यक्रमलाई सम्बोधन गर्दै अध्यक्ष राईले शिक्षा नै समृद्ध समाज निर्माणको आधार भएको उल्लेख गर्दै गुणस्तरीय शिक्षा प्रदान गर्न शिक्षकहरूको भूमिका अत्यन्त महत्वपूर्ण रहेको बताउनुभयो। उत्कृष्ट कार्य गर्ने शिक्षक तथा कर्मचारीलाई सम्मान गर्नु उनीहरूको मेहनत, समर्पण र जिम्मेवारीको कदर गर्नुका साथै अन्य शिक्षक तथा कर्मचारीलाई पनि उत्कृष्टता हासिल गर्न प्रेरित गर्ने उद्देश्य रहेको उहाँको भनाइ थियो। उहाँले गाउँपालिकाले शिक्षा क्षेत्रलाई उच्च प्राथमिकतामा राख्दै विद्यालयको भौतिक पूर्वाधार विकास, प्रविधिमैत्री शिक्षण, शिक्षक क्षमता अभिवृद्धि, विद्यार्थीमैत्री वातावरण निर्माण तथा शैक्षिक गुणस्तर सुधारका लागि विभिन्न कार्यक्रम सञ्चालन गर्दै आएको र आगामी दिनमा पनि शिक्षा क्षेत्रमा लगानी वृद्धि गर्दै गुणस्तरीय शिक्षाको पहुँच विस्तार गर्न प्रतिबद्ध रहेको बताउनुभयो।
शिक्षा शाखा प्रमुख सूर्यप्रसाद न्यौपानेले सम्मान तथा पुरस्कार वितरण कार्यक्रमको उद्देश्य उत्कृष्ट कार्य गर्ने शिक्षक तथा कर्मचारीको मनोबल उच्च बनाउनु, स्वस्थ प्रतिस्पर्धाको वातावरण सिर्जना गर्नु तथा सेवानिवृत्त शिक्षकहरूको योगदानलाई सम्मानपूर्वक स्मरण गर्नु रहेको जानकारी दिनुभयो। सम्मानित शिक्षक विजयकुमार अधिकारीले स्थानीय सरकारले गरेको सम्मानले आगामी दिनमा अझ जिम्मेवार, अनुशासित र समर्पित भएर काम गर्ने प्रेरणा मिलेको प्रतिक्रिया दिनुभयो। सेवानिवृत्त शिक्षकहरूले पनि आफ्नो जीवनभरको शिक्षण यात्राको कदर भएको भन्दै गाउँपालिकाप्रति आभार व्यक्त गरेका थिए। कार्यक्रमको अन्त्यमा शिक्षा क्षेत्रको समग्र विकासका लागि स्थानीय सरकार, विद्यालय, शिक्षक, अभिभावक तथा समुदायबीच सहकार्य आवश्यक रहेकोमा जोड दिइएको थियो। गाउँपालिकाले आगामी वर्षहरूमा पनि उत्कृष्ट कार्य गर्ने शिक्षक, कर्मचारी तथा शिक्षा क्षेत्रमा उल्लेखनीय योगदान पुर्याउने व्यक्तित्वलाई सम्मान गर्ने कार्यक्रमलाई निरन्तरता दिने जनाएको छ। यसैबीच, २०८२ सालको एसईई र कक्षा १२ को परीक्षामा सर्वोत्कृष्ट नतिजा हासिल गरेको कमल–२ स्थित महेन्द्र रत्न माध्यमिक विद्यालयलाई नगद ३० हजार रुपैयाँसहित पुरस्कृत गरिएको गाउँपालिकाले जनाएको छ।
दमक, असार २४ — झापाको दमक–३ बेलडाँगी टुस्थित पिप्ले बजारमा रहेको सरस्वती ज्वेलरीमा गएराति चोरी भएको छ। पसलको पछाडिको ढोका र सटर फोरेर अन्दाजी १० तोला सुन र करिब १२ किलो चाँदीका गरगहना चोरी भएको प्रहरीले जनाएको छ।
सञ्चालक दिलबहादुर दर्नाल विश्वकर्माका अनुसार आज बिहान पसल खोल्न जाँदा चोरी भएको थाहा भएको हो। घटनापछि प्रहरी चौकी बाघखोर र इलाका प्रहरी कार्यालय दमकको टोलीले अनुसन्धान सुरु गरेको छ। सञ्चालकले खोजतलासका लागि प्रहरीमा निवेदन दिएका छन्।
प्रारम्भिक विवरणअनुसार सुनका विभिन्न गरगहना तथा चाँदीका करुवा, थाल, पाउजुलगायतका सामग्री चोरी भएका छन्। अर्को सुन पसलका गरगहना पनि सुरक्षा प्रयोजनका लागि यही पसलमा राखिने भएकाले ती सामग्रीसमेत चोरी भएको बताइएको छ। प्रहरीले घटनाबारे थप अनुसन्धान गरिरहेको छ।
असार , २४ दमक / झापाको दमक–२ स्थित हिमालय माध्यमिक विद्यालयमा निःशुल्क दन्त परीक्षण तथा मुख स्वास्थ्य शिविर सम्पन्न भएको छ। विद्यालयअन्तर्गत हिमालय स्काउट समूह तथा रोभर/रेन्जरको संयुक्त आयोजना र ओम शान्ति डेन्टलको प्राविधिक तथा चिकित्सकीय सहयोगमा शिविर सञ्चालन गरिएको हो।
नेपाल स्काउटको ८५औँ स्थापना दिवसको अवसर पारेर विद्यालयकै खर्चमा सञ्चालन गरिएको शिविरमा करिब २ हजार ७ सय विद्यार्थीको दाँत परीक्षण तथा आवश्यक औषधोपचार गरिएको विद्यालयले जनाएको छ।
शिविर समापन कार्यक्रममा ओम शान्ति डेन्टलका सञ्चालक कमल गैरेले विद्यालयमै पुगेर बालबालिकाको मुख स्वास्थ्य परीक्षण गर्न पाउँदा खुसी लागेको बताए। उनले सानै उमेरदेखि दाँत र मुखको नियमित सरसफाइमा ध्यान दिए भविष्यमा हुने धेरै दन्तरोगबाट बच्न सकिने उल्लेख गर्दै दाँतमा समस्या देखिए उपचार ढिला नगर्न र नियमित परीक्षण गराउन आग्रह गरे।
विद्यालयका प्रधानाध्यापक द्रोणबहादुर श्रेष्ठले ग्रामीण तथा सामुदायिक विद्यालयका विद्यार्थीलाई लक्षित गरी सञ्चालन गरिएको शिविरले विद्यार्थीको स्वास्थ्य संरक्षणमा महत्वपूर्ण योगदान पुर्याएको बताए। उनले विशेषज्ञ चिकित्सकबाट निःशुल्क सेवा प्राप्त गर्नु विद्यार्थीका लागि सकारात्मक उपलब्धि भएको उल्लेख गर्दै सहयोगका लागि ओम शान्ति डेन्टलप्रति आभार व्यक्त गरे।
समापन कार्यक्रममा चिकित्सकहरूले दाँत तथा मुख स्वास्थ्यसम्बन्धी सचेतनामूलक जानकारी दिँदै नियमित ब्रस गर्ने, स्वस्थ खानपान अपनाउने र समय–समयमा दन्त परीक्षण गराउने बानी विकास गर्न विद्यार्थीलाई सुझाव दिएका थिए।
कार्यक्रममा विद्यालयका शिक्षक, स्काउटका पदाधिकारी, स्वास्थ्यकर्मी, अभिभावक तथा सञ्चारकर्मीको सहभागिता रहेको थियो। विद्यालयका अनुसार शिविरले विद्यार्थीमा मुख स्वास्थ्यप्रति सचेतना बढाउनुका साथै आवश्यक उपचारको पहुँच विस्तार गर्न सहयोग पुगेको छ।
शिविर सफल बनाउन योगदान पुर्याएको भन्दै स्वास्थ्यकर्मी टंक न्यौपाने, कास्मि श्रेष्ठ र सायरा ढकाललाई सम्मान गरिएको प्रधानाध्यापक श्रेष्ठले जानकारी दिए।
