झापा, कमल गाउँपालिका। कमल गाउँपालिका–७ स्थित आधारभूत स्वास्थ्य सेवा केन्द्र, रंगपुरमा प्रयोगशाला (ल्याब) सेवाको औपचारिक शुभारम्भ गरिएको छ। ल्याब सेवा शुभारम्भसँगै आयोजित निःशुल्क स्वास्थ्य शिविरबाट स्थानीय नागरिक लाभान्वित भएका छन्।
कमल गाउँपालिकाका अध्यक्ष हुकुम सिंह राईले रिबन काटेर ल्याब सेवाको उद्घाटन गर्नुभएको थियो। उद्घाटनपछि उहाँले प्रयोगशालामा जडान गरिएका उपकरण, सामग्री तथा रसायनहरूको निरीक्षण गर्दै सेवाको गुणस्तर र प्रभावकारिताबारे जानकारी लिनुभएको थियो।
कार्यक्रमका प्रमुख अतिथि अध्यक्ष राईले गाउँपालिकाका दुर्गम तथा ग्रामीण क्षेत्रका नागरिकलाई सहज र गुणस्तरीय प्रयोगशाला सेवा घरआँगनमै उपलब्ध गराउने उद्देश्यले ल्याब सेवा विस्तार गरिएको बताउनुभयो। उहाँले कमल–७ स्थित आधारभूत स्वास्थ्य सेवा केन्द्रबाट टिटानसविरुद्धको खोप सेवा नियमित रूपमा सञ्चालन भइरहेको जानकारी दिँदै आगामी दिनमा आवश्यकता र स्रोतका आधारमा थप स्वास्थ्य सेवाहरू विस्तार गरिने प्रतिबद्धता व्यक्त गर्नुभयो।
कमल नगर अस्पतालका मेडिकल सुपरिटेन्डेन्ट डा. फुलक चन्द्र लावतीले गाउँपालिकाभित्र रहेका अन्य आधारभूत स्वास्थ्य सेवा केन्द्रहरूमा समेत क्रमशः ल्याब सेवा विस्तार गरे सबै वडाका नागरिकलाई सहज पहुँचमा प्रयोगशाला सेवा उपलब्ध गराएमा सहज सेवा उपलब्ध हुने बताउनुभयो।
कार्यक्रममा कमल गाउँपालिका स्वास्थ्य शाखा प्रमुख दिपक दाहालले ल्याब सेवा विस्तार कार्यक्रमको उद्देश्यबारे प्रकाश पार्दै सहभागीहरूलाई स्वागत गर्नुभएको थियो।
कार्यक्रम सञ्चालन आधारभूत स्वास्थ्य सेवा केन्द्र, कमल–७ का प्रमुख अमृत सुब्बाले गर्नुभएको थियो। उहाँले कमल–७ मा सरुवा भएर आएपछि स्वास्थ्य संस्थामा नयाँ सेवा थप्ने लक्ष्यका साथ वडा अध्यक्ष पृथ्वीपति राई तथा गाउँपालिका अध्यक्ष हुकुम सिंह राईसँग समन्वय गरी ल्याब सेवा सञ्चालनमा ल्याइएको जानकारी दिनुभयो। उहाँले सेवा विस्तारबाट सेवाग्राहीलाई प्रत्यक्ष लाभ पुग्ने विश्वास व्यक्त गर्दै आगामी दिनमा थप स्वास्थ्य सेवाहरू विस्तार गरिने बताउनुभयो।
ल्याब असिस्टेन्ट गीता न्यौपानेले अब यस स्वास्थ्य सेवा केन्द्रबाट रगत, पिसाब (युरिन), दिसा (स्टुल),सुगर जाँच, परीक्षणका साथै गर्भवती महिलाका आवश्यक प्रयोगशाला परीक्षणहरू नियमित रूपमा सञ्चालन हुने जानकारी दिनुभयो।
ल्याब सेवा शुभारम्भसँगै आयोजित निःशुल्क स्वास्थ्य शिविरमा कमल नगर अस्पतालका मेडिकल सुपरिटेन्डेन्ट डा. फुलक चन्द्र लावतीले बिरामीहरूको निःशुल्क स्वास्थ्य परीक्षण, परामर्श तथा उपचार सेवा प्रदान गर्नुभएको थियो। शिविरमा विभिन्न स्वास्थ्य समस्या भएका स्थानीय सेवाग्राहीले सेवा लिई लाभान्वित भएका थिए।
कमल–७ का वडा अध्यक्ष तथा आधारभूत स्वास्थ्य सेवा केन्द्र सञ्चालन तथा व्यवस्थापन समितिका अध्यक्ष पृथ्वीपति राईले ल्याब सेवा विस्तारसँगै वडा नम्बर–७ का नागरिकलाई सहज स्वास्थ्य सेवा उपलब्ध भएको भन्दै गाउँपालिका अध्यक्ष हुकुम सिंह राईप्रति आभार व्यक्त गर्नुभयो।
ल्याब सेवा सञ्चालनमा आएपछि अब कमल–७ तथा आसपासका बासिन्दाले सामान्य प्रयोगशाला परीक्षणका लागि टाढा जानुपर्ने बाध्यता हट्ने अपेक्षा गरिएको छ। यस सेवाले समयमै रोग पहिचान, उपचार तथा गुणस्तरीय स्वास्थ्य सेवाको पहुँच विस्तारमा महत्वपूर्ण योगदान पुर्याउने विश्वास लिइएको छ।
कार्यक्रममा कमल गाउँपालिकाका अध्यक्ष, वडा अध्यक्ष, जनप्रतिनिधि, स्वास्थ्यकर्मी, कर्मचारी, महिला स्वास्थ्य स्वयंसेविका, टोल विकास संस्थाका पदाधिकारी, विद्यालय नर्स तथा स्थानीय सर्वसाधारणको उल्लेखनीय उपस्थिति रहेको थियो। ल्याब सेवा शुभारम्भपछि निःशुल्क स्वास्थ्य शिविरसमेत सञ्चालन गरिएको थियो।
दमक, झापा। ‘देशको खाऔँ, देशको लगाऔँ, देशमै रमाऔँ’ भन्ने नारासहित झापाको दमकमा गोठालो मार्ट सञ्चालनमा आएको छ। नेपाली उत्पादनको प्रवर्द्धन, स्थानीय उत्पादकलाई बजार उपलब्ध गराउने तथा आत्मनिर्भर अर्थतन्त्र निर्माण गर्ने उद्देश्यका साथ मार्ट सञ्चालनमा ल्याइएको हो।
दमक–६, देवकोटा चोकस्थित दमक सहकारीको भवनमा सञ्चालनमा आएको गोठालो मार्टमा दैनिक उपभोग्य सामग्री, ताजा सागसब्जी, अर्गानिक कृषि उत्पादन, नेपालमै उत्पादन भएका गाँजा र भाङको रेसाबाट बनेका लुगा, झोला, ब्यागलगायत विभिन्न स्वदेशी उत्पादन उपलब्ध रहेको सञ्चालक समिति अध्यक्ष सागर गौतमले जानकारी दिनुभयो।
मार्टका व्यवस्थापक श्याम घिमिरेका अनुसार गोठालो मार्टमा झापासहित देशका विभिन्न जिल्लामा उत्पादन भएका अर्गानिक तथा स्थानीय उत्पादनहरू संकलन गरी बिक्री वितरण गरिन्छ। साथै दमकमै उत्पादन भएका अचार, साबुन, कस्मेटिक सामग्री, ढाका कपडा, कोदो, मकै, फापरको पिठोलगायतका वस्तु पनि उपभोक्ताका लागि उपलब्ध छन्।
स्वदेशी उत्पादनको प्रयोगलाई प्रोत्साहन गर्दै उपभोक्तालाई स्वस्थ, गुणस्तरीय र अर्गानिक सामग्री सहज रूपमा उपलब्ध गराउने उद्देश्यले मार्ट सञ्चालनमा ल्याइएको व्यवस्थापन पक्षले जनाएको छ।
मार्टले प्रविधिको प्रयोगलाई समेत प्राथमिकता दिँदै गोठालो मोबाइल एप सञ्चालनमा ल्याएको छ। उक्त एपमार्फत ग्राहकले घरमै बसेर सामान खरिद तथा बिक्री गर्न सक्ने व्यवस्था गरिएको छ। साथै बजार मूल्यभन्दा करिब १० प्रतिशतसम्म कम मूल्यमा सामान उपलब्ध गराइने अध्यक्ष गौतमले बताउनुभयो।
डा. निकोलस भुसाल संयोजक रहेको आत्मनिर्भर नेपाल महाअभियान अन्तर्गत दमकका १० जना युवाको सक्रियतामा गोठालो मार्ट सञ्चालनमा आएको हो। अभियानअन्तर्गत हाल देशभर सात वटा गोठालो मार्ट सञ्चालन गर्ने योजना रहेको जनाइएको छ।
अभियानले विशेषगरी नेपाली उत्पादनको प्रवर्द्धन, कृषि तथा जडीबुटीजन्य उत्पादनको विकास, स्थानीय उत्पादनको बजारीकरण, युवा उद्यमशीलता अभिवृद्धि तथा रोजगारी सिर्जनामा केन्द्रित भएर काम गर्ने लक्ष्य लिएको जनाएको छ।
झापा, दमक । झापाको दमक–२ स्थित रहेको मानव उद्धार आश्रममा केही दिनअघि एक वृद्ध झुण्डिएको अवस्थामा मृत फेला परेको घटनापछि आश्रमको सुरक्षा तथा व्यवस्थापनप्रति स्थानीयस्तरमा प्रश्न उठ्न थालेको छ। दमकका युवा सन्देब राईका अनुसार उक्त घटना आश्रमको गम्भीर लापरबाहीका कारण भएको हुन सक्ने भन्दै घटनाको निष्पक्ष छानबिन र सुरक्षा व्यवस्थापन सुदृढ गर्नुपर्ने आवश्यकता रहेको बताएका छन्।
मृतक दमक–१० स्थित सेतुमारी क्षेत्रमा बसोबास गर्दै आएका थिए। स्थानीय समुदायसँग घुलमिल भएर विभिन्न काम गर्दै जीविकोपार्जन गरिरहेका उनी केही समयपछि दमक नगरपालिका र इलाका प्रहरी कार्यालय दमकको समन्वयमा मानव उद्धार आश्रममा राखिएका थिए।
मानव उद्धार आश्रमका सञ्चालक सुमन श्रेष्ठका अनुसार मृतकलाई दैनिक बेलुकि ‘इभिनिङ वाक’ सरह आश्रमबाट बाहिर जान दिइने गरिएको थियो। घटनाकै दिन पनि उनी आश्रमबाट बाहिर निस्किएपछि फर्किएनन्। त्यसपछि खोजी गर्दा उनी झुण्डिएको अवस्थामा मृत फेला परेको जानकारी उनले दिए।
घटनापछि आश्रमको सुरक्षा र व्यवस्थापनमा कमजोरी रहेको भन्दै स्थानीय युवाहरूले आश्रममा सुरक्षा गार्डको व्यवस्था गर्न, आश्रितहरूको नियमित निगरानी गर्न तथा यस्ता घटना दोहोरिन नदिन आवश्यक सुरक्षा मापदण्ड लागू गर्न माग गरेका छन्।
यसैबीच, प्राप्त जानकारीअनुसार दमक नगरपालिकाले पनि आगामी तीन महिनाभित्र आश्रमको सुरक्षा तथा व्यवस्थापनलाई थप व्यवस्थित बनाउने निर्णय गरेको बताइएको छ।
