झापा, भदौ १५ । लागूऔषध दुर्व्यसनविरुद्ध जनचेतना फैलाउने उद्देश्यले जिल्ला प्रहरी कार्यालय झापाले सञ्चालन गरेको Jhapa Action Against Narcotics (JAAN–२०८३) अभियानअन्तर्गत पोस्टर अभियान (Poster Campaign) सुरु गरिएको छ।
अभियानअन्तर्गत सोमबार झापाका दमक र गौरादह नगरपालिकामा जनचेतनामूलक पोस्टर हस्तान्तरण कार्यक्रम सम्पन्न भएको हो। जिल्ला प्रहरी कार्यालय झापाको समन्वय तथा दमक र गौरादह नगरपालिकाको आयोजनामा छुट्टाछुट्टै कार्यक्रम गरिएको थियो।
दमक नगरपालिकाको सभाहलमा बिहान ११ बजे तथा गौरादह नगरपालिकाको सभाहलमा दिउँसो ३ बजे आयोजित कार्यक्रममा दमकका नगर प्रमुख रामकुमार थापा र गौरादहका नगर प्रमुख छत्रपति सुवेदीको आतिथ्यता रहेको थियो।
कार्यक्रममा जिल्ला प्रहरी कार्यालय झापाका प्रमुख प्रहरी उपरीक्षक बसुन्धरा खड्काले सम्बन्धित नगर प्रमुखहरूलाई JAAN–२०८३ अन्तर्गत तयार पारिएका जनचेतनामूलक पोस्टर हस्तान्तरण गर्दै पोस्टर अभियानको औपचारिक शुभारम्भ गर्नुभयो।
कार्यक्रममा स्थानीय तहका जनप्रतिनिधि, प्रहरी अधिकृत तथा कर्मचारी, सञ्चारकर्मी, विभिन्न शैक्षिक संस्थाका प्रमुख तथा प्रतिनिधिलगायत करिब ९० देखि ९५ जनाको सहभागिता रहेको थियो।
पोस्टर अभियानमार्फत लागूऔषधको प्रयोग तथा दुर्व्यसनबाट हुने सामाजिक, पारिवारिक र व्यक्तिगत असरबारे नागरिकमा सचेतना अभिवृद्धि गर्ने लक्ष्य राखिएको छ। विशेषगरी युवा तथा विद्यार्थीलाई लागूऔषधबाट टाढा रहन प्रेरित गर्नुका साथै समुदायस्तरमा लागूऔषध नियन्त्रणका लागि सामूहिक सहभागिता र सहकार्यलाई थप सुदृढ गर्ने अभियानको उद्देश्य रहेको छ।
JAAN–२०८३ अन्तर्गत सञ्चालन भइरहेको अभियानले लागूऔषध दुर्व्यसनको रोकथाम तथा नियन्त्रणसँगै समुदायमा जनचेतना अभिवृद्धि गर्दै सुरक्षित र स्वस्थ समाज निर्माणमा योगदान पुग्ने विश्वास जिल्ला प्रहरी कार्यालय झापाले लिएको छ।
गौरादह । झापाको गौरादहमा पहिलोपटक महिला फुटबल प्रतियोगिता आयोजना हुने भएको छ। स्पर्श सामाजिक क्लब गौरादहको आयोजनामा ‘पहिलो गौरादह महिला फुटबल प्रतियोगिता–२०८३’ सञ्चालन हुन लागेको हो।
प्रतियोगिता भदौ १९ गतेदेखि गौरादह–१ स्थित जनता माध्यमिक विद्यालयको खेलमैदानमा हुने आयोजकले जनाएको छ। सोमबार आयोजकले पत्रकार सम्मेलन गरेर खेल तालिका र कप सार्बजनिक गरिएको हो ।
‘गौरादहको गर्व, महिला फुटबलको पर्व, लागूऔषधमुक्त समाज हाम्रो संकल्प’ भन्ने नाराका साथ आयोजना हुने प्रतियोगिताको उद्देश्य महिला खेलाडीलाई खेलकुदमा प्रोत्साहन गर्नुका साथै युवालाई लागूऔषधविरुद्ध सचेत गराउनु रहेको आयोजक क्लबका अध्यक्ष उज्वल दहालको भनाइ छ।
प्रतियोगिताको विजेताले १ लाख ११ हजार १ सय ११ रुपैयाँ नगदसहित ट्रफी, मेडल र प्रमाणपत्र प्राप्त गर्नेछ भने उपविजेताले ५५ हजार ५ सय ५५ रुपैयाँ नगदसहित ट्रफी, मेडल र प्रमाणपत्र पाउनेछ।
प्रतियोगितामा उत्कृष्ट प्रदर्शन गर्ने खेलाडीलाई समेत विभिन्न विधामा पुरस्कार प्रदान गरिने आयोजकले जनाएको छ। उत्कृष्ट गोलकिपर, डिफेन्डर, मिडफिल्डर, स्ट्राइकर, सर्वाधिक गोलकर्ता तथा प्लेयर अफ द टुर्नामेन्टलगायतका विधामा खेलाडी पुरस्कृत हुने खेल सम्योजक युवराज खडकाले बताए ।
महिला फुटबलको विकास र स्थानीय खेलाडीलाई अवसर प्रदान गर्ने उद्देश्यले आयोजना हुन लागेको प्रतियोगितालाई गौरादहमा महिला खेलकुदको विकासका लागि महत्वपूर्ण सुरुवातका रूपमा हेरिएको छ।
