असाेज १ , तोपगाछी, झापा – कमल गाउँपालिका–०२ स्थित कमल नगर अस्पतालले गर्भवती र सुत्केरी महिलाका लागि निःशुल्क एम्बुलेन्स सेवा सुरु गरेको छ। गाउँपालिकाको सहयोग र ओम आदि फाउन्डेसनको योगदानमा प्राप्त एम्बुलेन्समार्फत यो सेवा २४ घण्टा सञ्चालनमा ल्याइएको हो।
अस्पतालका अनुसार गर्भवती र सुत्केरी महिलाले प्रसूति सेवाका लागि अब कुनै शुल्क नतिरी अस्पताल आउन–जान सक्ने भएका छन्। गत आर्थिक वर्ष २०८१ /८२ मा १३० महिलाले यो सेवा उपयोग गरेका थिए। अन्य सर्वसाधारणले पनि सुलभ मूल्यमा एम्बुलेन्स प्रयोग गर्न सक्ने व्यवस्था गरिएको छ।
कमल गाउँपालिका अध्यक्ष तथा अस्पताल संचालन समितिका अध्यक्ष हुकुम सिंह राईका अनुसार यो सेवाले ग्रामीण भेगका महिलालाई समयमै अस्पतालसम्म पुग्न मद्दत गर्ने र मातृ तथा शिशु मृत्यु दर घटाउन सहयोग पुर्याउनेछ।
कमल गाउँपालिका प्रमुख प्रशासकिय अधिकृत केशव कुमार ढकालले ओम आदि फाउन्डेसनप्रति आभार व्यक्त गर्दै यस सेवाले समुदायमा स्वास्थ्य सेवामा पहुँच बढाएको बताए।
कमल नगर अस्पतालले सामान्य सुत्केरी सेवा, नवजात शिशु स्वास्थ्य निगरानी, चिकित्सकको सम्पर्कमा उपचार सुविधा र PNC Home Visit Programme जस्ता निःशुल्क सेवाहरू पनि निरन्तर सञ्चालन गर्दै आएको छ।
स्थानीय बासिन्दाहरूले निःशुल्क एम्बुलेन्स सेवाले सुरक्षित मातृत्व प्रवर्द्धनमा ठूलो योगदान गरेको बताएका छन्। वडा अध्यक्ष अशोक सुब्बाका अनुसार समयमै उपचार पाउँदा गर्भवती आमाको जीवन बच्ने सम्भावना धेरै बढेको छ र स्थानीयको विश्वास पनि बलियो बनेको छ।
यस सेवाबाट गरिब, असहाय र आर्थिक रूपमा कमजोर नागरिकलाई ठूलो लाभ पुगेको र भविष्यमा अझ प्रभावकारी बनाइने अस्पतालले जनाएको छ।
