भदौ १, दमक / झापाको ९ ठाउँमा आज श्रीकृष्ण रथयात्रा निकालिने भएको छ । दमक , भद्रपुर , बिर्तामोड, गौरीगञ्ज , शिवगञ्ज , मेचीनगर , गौरादह , तोपगाछी , शिवसताक्षीको ढुंगेल चोकलगायतका स्थानमा रथयात्रा निकालिने भएको हो
रथयात्राकाका लागि सुरक्षा व्यवस्था मिलाइएको जिल्ला प्रहरी कार्यालय झापाका प्रमुख एसपी राजन लिम्बूले बताउनुभयो । रथयात्राका क्रममा कुनै पनि आपराधिक घटना हुनसक्ने भएकाले त्यसतर्फ सजगता अपनाउन उहाँले अनुरोध गर्नुभएको छ ।
साउन ३१, कमल / कमल गाउँपालिका–५ पाडाजुगी चोकस्थित इस्कोन मन्दिर परिसरमा डिपिएल कमलको आयोजनामा एक दिने निःशुल्क स्वास्थ्य शिविर सम्पन्न भएको छ। श्रीकृष्ण जन्माष्टमीको अवसर पारेर मन्दिरमा आएका भक्तजनलाई लक्षित गरी शिविर आयोजना गरिएको हो।
शिविर ओम शान्ति डेन्टल हस्पिटल र दमक हस्पिटल एण्ड रिसर्च सेन्टर प्रा.लि.को प्राविधिक सहयोगमा सम्पन्न भएको थियो। डिपिएल कमल टिन्स बोर्डका अध्यक्ष प्रज्वल पाठकका अनुसार धार्मिक अवसरलाई सदुपयोग गर्दै समुदायमा स्वास्थ्यप्रति जनचेतना फैलाउने उद्देश्यले कार्यक्रम गरिएको हो।
ओम शान्ति डेन्टल हस्पिटलका सञ्चालक कमल गैरेले पछिल्ला वर्षमा निरन्तर रूपमा यस्ता स्वास्थ्य शिविरहरू सञ्चालन हुँदै आएको बताए। उनका अनुसार समाजमा दन्त स्वास्थ्यप्रति सचेतना अभिवृद्धि गर्नु मुख्य उद्देश्य हो। साथै, शिविरमा सहभागी भएकालाई अस्पतालमा थप उपचारका लागि २५ प्रतिशत छुटको व्यवस्था गरिएको जानकारी पनि उनले दिए।
कार्यक्रममा मन्दिरमा भक्ति गर्न आएका अधिकांश भक्तजनले दन्त परीक्षण गराएका थिए। सहभागीहरूले ओम शान्ति डेन्टल हस्पिटलको सेवा, प्राविधिक दक्षता र मित्रवत व्यवहारप्रति सन्तुष्टि व्यक्त गरेका थिए।
साउन ३०, दमक / कमल गाउँपालिका–२ स्थित श्री ज्योति माध्यमिक विद्यालयमा एकदिने निःशुल्क दन्त स्वास्थ्य शिविर सम्पन्न भएको छ। दमक थुलुङ डेन्टल केयरको प्राविधिक सहयोगमा आयोजित विद्यालय स्वास्थ्य कार्यक्रमअन्तर्गत सम्पूर्ण विद्यार्थी, अभिभावक र शिक्षकहरूको दन्त स्वास्थ्य परीक्षण, परामर्श तथा आवश्यक उपचार प्रदान गरिएको थियो।
विद्यालय सञ्चालक तथा व्यवस्थापन समिति अध्यक्ष तिलक खड्काले यस्ता स्वास्थ्य सेवा कार्यक्रमले बालबालिकाको स्वास्थ्य सचेतना र समग्र विकासमा ठूलो योगदान पुर्याउने बताएका छन्। त्यस्तै वडा नं. २ का वडा सदस्य महेन्द्र खत्रीका अनुसार वडा कार्यालयले प्रत्येक विद्यालयमा यस्ता स्वास्थ्य शिविर गर्दै आएको छ, जसले बालबालिका तथा अभिभावकलाई दन्त स्वास्थ्य जाँचमा सहजता पुर्याएको छ।
कार्यक्रममा डा. सोफिया थुलुङ, डा. हाङमा माखिम लिम्बूसहितको चिकित्सक टोलीले सेवा प्रदान गरेको थियो। कुल २७७ जना अभिभावक, शिक्षक र विद्यार्थीले शिविरबाट लाभ उठाएका थिए। डा. थुलुङका अनुसार हालका बालबालिकामा किराले दाँत खाने समस्या बढी देखिएको छ।
शिविर विद्यालयका सहायक प्रधानाध्यापक नारायण बस्नेतले सञ्चालन गरेका थिए। कार्यक्रममा कमलनगर अस्पतालका प्रमुख दीपक दाहाल, हाम्रो सरोकार डट नेटका सञ्चालक तथा पत्रकार अनिल देव राई र विद्यालयका शिक्षकहरूको समेत उपस्थिति रहेको थियो।
दमक नगरपालिका वडा नं. ६, वाणिज्य बैंक अगाडि रहेको थुलुङ डेन्टल केयरले दन्त रोगका विशेषज्ञ डाक्टरमार्फत निरन्तर सेवा प्रदान गर्दै आएको छ।
साउन ३०, दमक / सशस्त्र प्रहरी बल पाथिभरा जवान शिक्षालय, झापाका कार्यालय प्रमुख सशस्त्र प्रहरी वरिष्ठ उपरीक्षक राजेश उप्रेतीको अन्यत्र सरुवा भई प्रस्थान गर्न लाग्नुभएकाले शुक्रबार विदाई तथा शुभकामना कार्यक्रम सम्पन्न भएको छ।
कार्यक्रममा कार्यलयका नयाँ प्रमुख प्रहरी नायब उपरीक्षक (प्र.ना.उ.) राम प्रसाद तिमल्सिना, अन्य प्रहरी कर्मचारी, उद्योग वाणिज्य सङ्घका पदाधिकारी तथा स्थानीय व्यवसायीको उपस्थितिमा “फेरि भेटौँला”, “धन्यवाद” र “शुभकामना” व्यक्त गरिएको थियो।
विदाई कार्यक्रममा दमक उद्योग वाणिज्य सङ्घका अध्यक्ष गोपाल गुरागाई, वरिष्ठ उपाध्यक्ष राजु खड्का, एक्वा मेरी पानी उद्योगका सञ्चालक तथा सङ्घका लेखा समिति सदस्य पदम राउत, प्रहरी निरीक्षक नवीन राई, प्रहरी निरीक्षक विपन विश्वकर्मा, नेपाल उद्योग वाणिज्य सङ्घका केन्द्रीय सदस्य गोकुल श्रेष्ठ लगायतको उपस्थितिमा उप्रेतीको योगदानको उच्च प्रशंसा गर्दै भावपूर्ण विदाई गरिएको थियो।
उपस्थित वक्ताहरूले उप्रेतीको कार्यकालमा देखाइएको नेतृत्व क्षमता, अनुशासन र सहयोगी भावको प्रशंसा गर्दै उनको आगामी कार्यक्षेत्रमा सफलताको शुभकामना व्यक्त गरेका थिए।
साउन ३०, दमक / झापाको कमल गाउँपालिका–२ देवीचौनस्थित श्री इन्द्र लोहनी स्मृति विद्यालयमा पुस्तकालय उद्घाटन गरिएको छ। दमक नगरपालिका वडा नं. ६, वाणिज्य बैंक अगाडि रहेको थुलुङ डेन्टल केयरकी सञ्चालिका डक्टर सोफिया थुलुङको एकल पहलमा उक्त पुस्तकालय निर्माण गरिएको हो।
विद्यालयको विगतको इतिहास बुझेर र इन्द्र लोहनीको स्मृतिमा बनेको यस विद्यालयमा पुस्तकालयको आवश्यकता महसुस गर्दै डक्टर थुलुङले कक्षा पाँचसम्मका विद्यार्थीका लागि आवश्यक पुस्तक र इन्डोर गेमहरू उपलब्ध गराएकी छन्। उनको जन्मदिनको अवसर पारेर पुस्तकालय विद्यालयलाई हस्तान्तरण गरिएको हो।
कार्यक्रमका प्रमुख अतिथि कमल गाउँपालिकाका अध्यक्ष हुकुमसिंह राईले रिबन काटेर पुस्तकालयको उद्घाटन गर्नुभयो। उहाँले सामाजिक सञ्जालको अत्यधिक प्रयोगका कारण विद्यार्थीमा पढ्ने बानी हराउँदै गएको र पुस्तकालयले यस बानीको पुनः विकासमा योगदान पुर्याउने बताउनुभयो।
विशिष्ट अतिथि तथा हाम्रो सरोकार डट नेटका सञ्चालक अनिलदेव राईले डक्टर थुलुङले विद्यालयमा डेन्टल क्याम्पमार्फत पनि योगदान दिएको र पुस्तकालयले पठनपाठनसँगै अतिरिक्त क्रियाकलापमा विद्यार्थीलाई संलग्न गराउनेमा विश्वास व्यक्त गर्नुभयो।
कार्यक्रममा कमलनगर अस्पतालका प्रमुख दीपक दाहाल, विद्यालय व्यवस्थापन समितिका अध्यक्ष गंगाबहादुर कार्की, प्रधानाध्यापक भजेन्द्रबहादुर बस्नेत, विद्यालय इन्चार्ज कमल कटुवाल, थुलुङ डेन्टल केयरकी डक्टर हाङमा माखिम लिम्बूलगायतको उपस्थिति थियो। कार्यक्रम सञ्चालन भूमिका चापागाईंले गर्नुभएको थियो।
कार्यक्रममा डक्टर सोफियालाई खादा माला र प्रमाणपत्रले विद्यालयको तर्फबाट सम्मान गरिएको थियो। २०६५ सालमा स्थापना भएको यस विद्यालयमा हाल ७५ जना विद्यार्थी अध्ययनरत छन्।
साउन २९ , दमक / मोरङको पथरी बजारमा बिहिवार साँझ करिब ७ः ३० बजे नम्बर नखुलेको मिनि ट्रकले ठक्कर दिँदा एक महिलाको मृ,त्यु भएको छ ।
पूर्व–पश्चिम राजमार्गको पथरीस्थित गोर्खा डिपार्टमेन्ट स्टोर अगाडि भएको उक्त दु,र्घट,ना भएको थियो । दुर्घटनामा परि उपचारका लागी लैजाने क्रममा ती महिलाको मृ,त्यु भएको हो ।
मृ,त्यु हुने महिलाको पहिचान खुल्न नसकेको ईलाका प्रहरी कार्यालय पथरीका प्रमुख प्रहरी नायब उपरीक्षक तुलसीराम अर्यालले जानकारी दिए ।
स्थानीयका अनुसार मृ,तक महिला करिब ४० वर्षकी थिइन् र उनी बेवारिसे अवस्थामा बजार वरपर घुमफिर गर्ने गर्थिन्। प्रहरीले जनाएअनुसार ठक्कर दिने मिनि ट्रकको नम्बर खुल्न नसकेको र घ,टनापछि फरार भएको छ।
दुर्घटना गराई फरार भएको ट्रक भाउन्नेमा दुर्घटनामा परेको अवस्थामा प्रहरीले फेला पारेको छ । दुर्घटनाग्रस्त सवारी साधनको चालक भने फरार रहेको र घटनाको विस्तृत अनुसन्धान गरिरहेको प्रहरीले जनाएको छ।
दमक, झापा – दमक उद्योग वाणिज्य संघको आसन्न निर्वाचनमा राजु खड्काले अध्यक्ष पदको उम्मेदवारी घोषणा गरेका छन्। विगत तीन कार्यकालदेखि संघमा विभिन्न पदमा रहेर व्यवसायीको समस्या समाधानमा प्रत्यक्ष संलग्न खड्काले अब नेतृत्वको जिम्मेवारी मात्र होइन, ठोस परिणामका आधारमा आफ्नो कार्यक्षमता प्रमाणित गर्ने समय आएको बताएका छन्।
खड्काले दमकका व्यवसायीहरूका मुख्य समस्या प्रविधिमा सीमित पहुँच, बजार व्यवस्थापन र सडक व्यवसायीको दीर्घकालीन समाधानको अभाव, कर तथा प्रशासनिक प्रक्रियाको जटिलता, र नयाँ व्यवसाय सुरु गर्नेहरूका लागि परामर्श तथा तालिमको कमी रहेको उल्लेख गरे।
उनले प्रस्तुत गरेको समाधान योजनामा साना व्यवसायीलाई विस्थापित नगरी व्यवस्थित गर्न छुट्टै जोन, मिनी मार्केट वा फुड कोर्ट मोडल ल्याउने, डिजिटल पेमेंट र अनलाइन बजार विस्तारका तालिम सञ्चालन गर्ने, संघमार्फत एकल ढोका सेवा प्रणाली लागू गर्ने, र युवा–महिला उद्यमीका लागि स्टार्टअप फण्ड तथा ब्याज सहुलियत ऋणको व्यवस्था गर्ने प्रस्ताव समावेश छन्।
“दमकलाई पूर्वको व्यवसायिक हब बनाउने मेरो भिजन हो। यहाँ साना–ठूला सबै व्यापारीको आवाज सुन्ने, प्रविधिमा जोड दिने, र व्यवसायमैत्री वातावरण सिर्जना गर्ने योजना बनाएको छु,” खड्काले भने। उनले नेतृत्वको अर्थ आदेश दिने होइन, तलबाट सुनेर समाधान ल्याउने हो भन्नेमा आफू दृढ रहेको पनि जोडे।