Author: Multi Media

साउन २८ , झापा — राष्ट्रिय प्रजातन्त्र पार्टी (राप्रपा)ले झापाका १५ वटै स्थानीय तहमा पालिकास्तरीय अधिवेशन सम्पन्न गरेको छ। अधिवेशनमार्फत पार्टीको आगामी कार्यकालका लागि नयाँ नेतृत्व चयन भएको राप्रपा झापाले जनाएको छ।अधिवेशनबाट मेचीनगर नगर समितिको अध्यक्षमा चन्द्र निरौला, बुद्धशान्ती गाउँ समितिको अध्यक्षमा गणेश प्रसाद खरेल, अर्जुनधारा नगर समितिको अध्यक्षमा हर्कजंग लिम्बू, र बिर्तामोड नगर समितिको अध्यक्षमा लक्ष्मी गौतम चयन भएका छन्।

त्यस्तै, पार्टी अध्यक्ष राजेन्द्र लिङदेनको गृह नगर भद्रपुरमा राजकुमार राई अध्यक्ष चुनिएका छन्। कचनकवल गाउँ समितिको अध्यक्षमा लक्ष्मी नारायण यादव, हल्दिबारी गाउँ समितिको अध्यक्षमा मदन मगर, बाह्रदशी गाउँ समितिको अध्यक्षमा पी. बी. कटवाल, दमक नगर समितिको अध्यक्षमा पुनः हेम सुवेदी, कन्काई नगर समितिको अध्यक्षमा गोपाल चुडाल, झापा गाउँ समितिको अध्यक्षमा प्रेम प्रसाईं, शिवसताक्षी नगर समितिको अध्यक्षमा मणि खड्का, गौरीगन्ज गाउँ समितिको अध्यक्षमा नन्दु थापा, गौरादह नगर समितिको अध्यक्षमा शान्तिराम पौडेल र कमल गाउँ समितिको अध्यक्षमा खड्ग श्रेष्ठ चयन भएका छन्।

पार्टीका अनुसार गाउँ/नगर अधिवेशन सम्पन्न भइसकेकाले अब प्रदेशसभा क्षेत्र र संघीय निर्वाचन क्षेत्रस्तरको अधिवेशन गरेर संगठनलाई सक्रिय बनाउँदै आगामी निर्वाचन लक्षित गतिविधि अघि बढाइनेछ।२०७४ सालमा राप्रपाले झापाका हल्दिबारी, गौरीगञ्ज र कचनकवल गाउँपालिकामा नेतृत्व जितेको थियो। तर, २०७९ सालको स्थानीय चुनावमा गौरीगञ्ज र कचनकवलमा नेतृत्व गुमाएको थियो। सोही चुनावमा कांग्रेस–माओवादी लगायतका दलसँग गठबन्धन गर्दै राप्रपाले दमक नगरपालिकाको नेतृत्व जित्न सफल भएको थियो।

साउन २७ दमक / वैशाख यता आएको भीषण हावाहुरीले धनजनको ठूलो क्षति पुर्‍याएको दमक नगरपालिकाले पीडित परिवारलाई प्रदान गरेको राहतको अनुगमन गर्दै फेरि पनि आवश्यक परे पूर्ण सहयोग गर्ने दमक नगरपालिकाका मेयर रामकुमार थापाले प्रतिबद्धता व्यक्त गर्नुभएको छ।

दमक नगरपालिकाका मेयर रामकुमार थापाले घरघरमै पुगेर क्षति मूल्याङ्कन गर्दै तत्कालीन राहत रकमको सदुपयोगबारे निरीक्षण गरेका छन्। मेयर थापाले पीडित, गरिब, असहाय र दलित समुदायका नागरिकलाई निरन्तर सहयोग गर्दै आएको जनाउँदै यसपटक एक दलित एकल महिला अम्बिका सिवानालाई घर निर्माणका लागि ५० हजार रुपैयाँ सहयोग प्रदान गरेका छन्।

वैशाखमा आएको हावाहुरीले घरको छाना उडेर विस्थापित बनेकी सिवाना लामो समयदेखि बाँसका भाटाले बनाएको टहरामा बस्दै आएकी थिइन्। “एक्कासी आएको हावाहुरीले सब लथालिङ्ग बनाइदियो, कहाँ बस्ने भनेर भौतारिरहेको बेलामा मेयर थापा आएर सहयोग गर्नुभयो,” सिवानाले बताइन्।

यसैगरी अर्का पीडितलाई मेयर थापाले जस्तापाता खरिदका लागि २० हजार रुपैयाँसम्म नगद सहयोग गरेका थिए। वडा नम्बर ४ का भीमप्रसाद सिग्देलले नगरपालिकाले दिएको रकम सही सदुपयोग भएको बताए। त्यस्तै पीडित नारायण बहादुर कार्कीले राजनीति नहेरी मानवताका आधारमा मेयरले गरेको सहयोगको प्रशंसा गरे।

दमक नगरपालिकाले आर्थिक वर्ष २०८१/८२ मा हावाहुरी प्रभावित परिवारलाई कुल १० लाख रुपैयाँको राहत वितरण गरेको मेयर थापाले मल्टिमिडियासँगको कुराकानीमा जानकारी दिएका छन्।

साउन २७ झापा – कोचिला न्युज डटकमका सम्पादक आत्माराम राजवंशी फोनिज राष्ट्रिय मातृभाषा पत्रकारिता सम्मान बाट सम्मानित भएका छन्। ३१ हजार रुपैयाँ राशिसहितको उक्त सम्मान आज राजधानीमा सम्पन्न नेपाल आदिवासी जनजाति पत्रकार महासंघ (फोनिज) को २६औं स्थापना दिवसको अवसरमा संचारमन्त्री पृथ्वीसुब्बा गुरुङले प्रदान गरेका हुन्।

राजवंशी भाषाको त्रैमासिक पत्रिका कोचिला सामाद प्रकाशन गर्दै मातृभाषा पत्रकारितामा पुर्‍याएको योगदानका आधारमा उनलाई यो सम्मान प्रदान गरिएको हो।

सोही कार्यक्रममा अन्य विधामा पनि सम्मान तथा पुरस्कार प्रदान गरिएको थियो। मोक्ष गुरुङलाई फोनिज राष्ट्रिय पत्रकारिता प्रवास सम्मान (प्रवास), गजुरधन राईलाई फोनिज राष्ट्रिय पत्रकारिता सम्मान (टेलिभिजन), अमरध्वज लामालाई फोनिज राष्ट्रिय पत्रकारिता सम्मान (रेडियो), सविन प्रियाशनलाई फोनिज राष्ट्रिय पत्रकारिता पुरस्कार (छापा), मुनेश लायो मगरलाई फोनिज राष्ट्रिय पत्रकारिता पुरस्कार (अनलाइन) र बन्दना दनुवारलाई फोनिज राष्ट्रिय पत्रकारिता पुरस्कार (रेडियो) प्रदान गरिएको थियो।

फोनिजले हरेक वर्ष उत्कृष्ट पत्रकारलाई विभिन्न श्रेणीमा फोनिज अवार्ड वितरण गर्दै आएको छ।

दमक, साउन २८ – अन्तर्राष्ट्रिय युवा दिवसको अवसर पारेर लायन्स माउन्ट एभरेस्ट दमकद्वारा आयोजना गरिएको युवा फुटसल प्रतियोगितामा लायन्स इन्टरनेशनल जिल्ला ३२५ सी, , नेपाल अन्तर्गत मिशन १.५ कार्यक्रम अन्तर्गत “भोलिका नेताहरूलाई मार्गदर्शन गर्दै” भन्ने मुल नाराका साथ आयोजित इन्टर लियो फुटसल प्रतियोगिता आइतबार दमक–५, गोर्खाली टोलस्थित बिष्ट फुटसलमा सम्पन्न भएको छ।

प्रतियोगितामा लियो क्लब अफ दमक माउन्ट एभरेस्ट,लियो क्लब अफ दमक स्वीट सिटी, लियो क्लब अफ दमक ईस्टर्न लाइन र लियो क्लब अफ बिग बुद्धको सहभागिता रहेको थियो।

कार्यक्रममा लायन्स माउन्ट एभरेस्टका अध्यक्ष प्रकाश शाह, रिजन चेयरपर्सन नवीन ताम्राकार, जोन चेयरपर्सन गुरु धुंगाना, लायन्स दमक सेविकाकी अध्यक्ष सङ्गीता खतिवडा, लियो माउन्ट एभरेस्टका अध्यक्ष नितेश शाह लगायतको उपस्थितिमा खेलहरू सुरु गरिएको थियो।

पहिलो खेलमा लियो स्वीट सिटी र लियो ईस्टर्न लाइन आमनेसामने हुँदा लियो ईस्टर्न लाइन विजयी भयो। दोस्रो खेलमा लियो माउन्ट एभरेस्टले प्रतिस्पर्धीलाई हराउँदै फाइनलमा प्रवेश गर्‍यो। तेस्रो खेलमा लियो बिग बुद्धको टिमले प्रतिस्पर्धा गरे पनि उपाधि भिडन्तमा स्थान बनाउन सकेन।

उत्कृष्ट प्रतिस्पर्धा भएको फाइनल खेलमा लियो माउन्ट एभरेस्ट र लियो ईस्टर्न लाइन आमनेसामने भए। निर्धारित समयमा खेल बराबरी भएपछि पेनाल्टी सुटआउटमार्फत लियो माउन्ट एभरेस्ट विजयी बनेको हो।

विजयी टिमका खेलाडीलाई आयोजकले ट्रफी र सम्मानपत्र प्रदान गर्दै भावी नेतृत्व विकासमा खेलकुदको भूमिका महत्वपूर्ण रहेको बताएका थिए।

शीतल अधिकारी – साउन २७ / गौरादह नगरपालिकाका उपप्रमुख जलवर्षा राजवंशी चौधरीले नेपाल स्काउटमार्फत दक्षिण कोरिया भ्रमण गरी नेपाल स्काउटको रकम नतिरेको दाबी सामाजिक सञ्जालमा भाइरल भइरहेको छ ।तर हाम्रो तथ्य जाँचमा उक्त दाबी पूर्णतः भ्रामक रहेको पाइएको छ । उपमेयर राजवंशीले कोरिया भ्रमण गरेको कुनै प्रमाण छैन, तर फरक सन्दर्भमा साइप्रस भ्रमण गरेको भने पुष्टि हुन्छ ।

के हो दावी ?
राष्ट्रिय समाचार एजेन्सी न्युज २४ का पत्रकार राजिब खत्रीले २०८२ श्रावण २६ गते बेलुका ४:३१ मा पोष्ट सार्वजनिक गर्दै एमाले नेता महेश बस्नेतले राष्ट्रीय स्वतन्त्र पार्टीका उपसभापति डिपी अर्यालको सुमेरू टुर एण्ड ट्राभल मार्फत नेपाल स्काउटबाट भिजिट भिषामा कोरिया र डेनमार्क पुगेका केहि व्यक्ती उतै लुकेको र सोहि कार्यक्रममा कोरिया पुगेको तर नेपाल स्काउटको रकम तिर्न बाँकी रहेको भनी उपप्रमुख राजवंशी सहित अन्य ३ जना जनप्रतिनिधिको नाम सार्वजनिक गरी पैसा नतिरेको दाबी गरिएको छ । यो दाबी सामाजिक सञ्जालमा व्यापक रूपमा फैलिएको छ, जसमा उनको नाम कोरिया र डेनमार्क प्रकरणसँग जोडिएको छ ।

उदाहरणका लागि, फेसबुकमा केही पोस्टहरूमा उनलाई ‘स्काउटको कोरिया कार्यक्रममा गएर पैसा नतिरेको’ भन्दै सूची सार्वजनिक गरिएको छ ।
हेर्नुस् स्क्रिनसट –

यो तथ्य जाँच तयार पार्दा सम्म यस पोस्टमा ८७०० हजार रियाक्ट र ११०० सेयरहरू देखिएका छन् । यसैगरी, अन्य सामाजिक सञ्जालमा पनि सोही दाबीसहित पोस्टहरू भेटिन्छन् ।
भाइरल विषय भएकोले हामीले यसको तथ्य जाँच गरेका छौँ । के हो तथ्य ?

हामी यस विषयमा उपमेयर जलवर्षा राजवंशीलाई प्रश्न गर्दा यो आरोपलाई पूर्णतः खण्डन गर्दै स्पष्ट पारेकी छन्, उनको अनुसार हाल सम्म उनी दक्षिण कोरिया कहिल्यै नगएको उनको दावी छ । उनको भनाइअनुसार, निर्वाचित भएपछि उनी नेपाल स्काउटको कार्यक्रममा सहभागी हुन साइप्रस गएकी थिइन्, जुन २०२३ मा भएको ३८औँ WAGGGS विश्व सम्मेलन थियो । यो सम्मेलन युरोपियन युनिभर्सिटी साइप्रसमा आयोजित भएको थियो ।

हामीले यो दावीलाई पुष्टि गर्न 38th WAGGGS विश्व सम्मेलनको विवरणहरु खोज्दै जाँदा नेपाल स्काउटको आधिकारिक इन्स्टाग्राम आईडीबाट २०८० साउन १२, शुक्रवार पोष्ट गरिएको यी तस्बिरहरूमा देब्रे पट्टीको तेस्रो तस्बिरमा गौरादह नगरपालिका उप-प्रमुख जलबर्षा राजवंशी चौधरीलाई देख्न सकिन्छ l उक्त तस्बिरहरूमा सम्मेलनको बोर्डमा ‘38th WAGGGS World Conference CYPRUS 2023’ स्पष्ट देखिन्छ, जसमा स्काउट लोगो र नेपाली प्रतिनिधिहरू सहभागी छन् । तस्बिरहरूमा नेपाल स्काउटका प्रमुख आयुक्त लोकबहादुर भण्डारी, माननीय सांसद सुनीता बराललाई समेत देख्न सकिन्छ l

यस विषयमा गौरादह नगरपालिकाका मेयर छत्रपति सुबेदीले पनि प्रतिक्रिया दिँदै भनेका छन्, “उपमेयर कोरिया वा डेनमार्क गएको मलाई थाहा छैन, किनकि स्थानीय तहका पदाधिकारीहरूको विदेश भ्रमणका लागि नेपाल सरकारको मनोनयनपछि कार्यपालिकाको स्वीकृति अनिवार्य हुन्छ । यस्तो कुनै प्रस्ताव कार्यपालिकामा आएको नै छैन ।”

तथ्यः भ्रामक सूचना । दक्षिण कोरिया भ्रमण गरेको दाबी गर्दै फैलाइएको सूचना भ्रामक हो । उपमेयर राजवंशीले दक्षिण कोरिया भ्रमण गरेको छैनन् । उनी २०२३ मा साइप्रसमा भएको WAGGGS विश्व सम्मेलनमा सहभागी भएकी थिइन्, जसमा आर्थिक दायित्व पूरा भएको उनको दावी छ ।

साउन २७ दमक / दमक उद्योग वाणिज्य संघको स्थापना दिवसको अवसरमा ‘अन्तर–वस्तुगत फुट्सल प्रतियोगिता २०८२’ आयोजना हुने भएको छ। प्रतियोगिता भदौ ५ र ६ गते दमकको बिस्ट फुट्सलमा सञ्चालन हुनेछ।

संघमा आवद्ध १४ वटा वस्तुगत संघमध्ये १० वटा संघले यस प्रतियोगितामा सहभागिता जनाउनेछन्। आयोजकका अनुसार प्रतियोगिताको उद्देश्य सदस्य संघहरूबीच भाइचाराको भावना, मित्रता र एकताको सन्देश फैलाउनु हो।

प्रतियोगितामा रेडिमेड कपडा व्यवसायी संघ, जुत्ता–चप्पल व्यवसायी संघ, किराना तथा खाद्यान्न व्यवसायी, सुन–चाँदी व्यवसायी संघ, अटोमोबाइल व्यवसायी संघ, निर्माण व्यवसायी संघ, होटल व्यवसायी संघ, स्वास्थ्य व्यवसायी संघ, दमक मोबाइल व्यवसायी संघ र फर्निचर व्यवसायी संघका टिमले प्रतिस्पर्धा गर्नेछन्।

आयोजकले यस प्रतियोगितालाई खेलकुदमार्फत व्यवसायीहरूबीच आपसी सम्बन्ध मजबुत बनाउनको लागि महत्वपूर्ण कदमका रूपमा लिएको छ।