Author: Multi Media

साउन २७, दमक / दमक नगरपालिकामा ११४ जना अपाङ्गता भएका व्यक्तिहरूलाई सहयोगी सामग्री वितरण गरिएको छ। कोशी प्रदेश सरकार, करुणा फाउन्डेसन र दमक नगरपालिकाको सहकार्यमा आयोजित कार्यक्रममा वैशाखी लगायतका आवश्यक सामग्री प्रदान गरिएको हो।

कार्यक्रमका प्रमुख अतिथि तथा दमक नगरपालिकाका नगरप्रमुख रामकुमार थापाले नगर सबै नागरिकसँग साथमा रहेको र अपाङ्गता भएका व्यक्तिहरूको जीवन सहज बनाउन नगरपालिका प्रतिबद्ध रहेको बताउनुभयो। उपप्रमुख रेगिना भट्टराई प्रसाईले नगरलाई साक्षर बनाउन घरघरमै शिक्षकको व्यवस्था गर्नुका साथै शारीरिक अपाङ्गता भएका व्यक्तिहरूको सशक्तिकरणमा पनि नगरपालिका सक्रिय रहेको उल्लेख गर्नुभयो।

सामाजिक विकास समिति संयोजक शारदा भट्टराई सापकोटाले शारीरिक बनावटका आधारमा विभेद नगरी सबैलाई समान अधिकारको सुनिश्चितता आवश्यक रहेको धारणा राख्नुभयो। राष्ट्रिय अपाङ्गता सङ्घका केन्द्रीय सदस्य मदन बोहराले वितरण गरिएको सामग्री अपाङ्गता भएका व्यक्तिहरूका लागि प्रभावकारी र मजबुत सहारा हुने विश्वास व्यक्त गर्नुभयो।

महिला तथा बालबालिका शाखाकी प्रमुख सरिता भण्डारीले करुणा फाउन्डेसन, प्रदेश सरकार र दमक नगरपालिकाको साझेदारीमा कार्यक्रम सम्पन्न भएको जानकारी दिनुभयो। कार्यक्रममा करुणा फाउन्डेसनकी स्नेहा खड्का लगायतको उपस्थिति रहेको थियो।

साउन २७, दमक / झापाको दमक नगरपालिकामा निःशुल्क दन्त परीक्षण शिविर सम्पन्न भएको छ। दमक जेसिसको आयोजनामा तथा ओम शान्ति डेन्टल हस्पिटल दमक–५ को प्राविधिक सहयोगमा अन्तर्राष्ट्रिय युवा दिवसको अवसर पारेर दमक–१ स्थित श्री भृकुटी माध्यमिक विद्यालयमा शिविर सञ्चालन गरिएको हो।

जेसिस दमक २०२५ का अध्यक्ष सहदेव भट्टराईका अनुसार, जेसिसले वर्षेनी स्वास्थ्यसम्बन्धी कार्यक्रम गर्दै आएको छ र यस वर्ष स्वास्थ्य अन्तर्गत दन्त शिविर आयोजना गरिएको हो। उनले ओम शान्ति डेन्टल हस्पिटललाई भरपर्दो र विश्वासिलो डेन्टल सेवा प्रदायक भएकोले निरन्तर विश्वास गर्दै आएको बताए।

ओम शान्ति डेन्टल हस्पिटलका सञ्चालक कमल गैरेका अनुसार, अस्पताल पुरानो र विश्वासिलो संस्था हो, जसमा डाक्टरबाटै सस्तो, सुलभ र पारिवारिक वातावरणमा दन्त उपचार उपलब्ध हुन्छ। साथै विशेष रोगीका लागि छुट सुविधा पनि व्यवस्था गरिएको उनले जानकारी दिए।

दन्त सर्जन डा. अन्जली ठाकुरका अनुसार, शिविरमा विशेषगरी बालबालिकामा खाने दाँतमा किरा लाग्ने समस्या बढी देखिएको छ। उनले अभिभावकको सुझावभन्दा डाक्टरको सल्लाह बालबालिकाले बढी मान्ने भएकाले शिविरमार्फत सही दाँत माज्ने तरिका र सावधानीका उपाय पनि सिकाइएको बताइन्।

श्री भृकुटी माध्यमिक विद्यालयका प्रधानाध्यापक लक्ष्मी प्रसाद न्यौपानेले यस प्रकारका कार्यक्रमले विशेषगरी आर्थिक अवस्था कमजोर परिवारका विद्यार्थीलाई ठूलो सहयोग पुग्ने बताए। विद्यालयमा हाल ४०० विद्यार्थी अध्ययनरत छन्, जस मध्ये करिब ३५० जनाको दन्त परीक्षण गरिएको विद्यालयले जनाएको छ।
कार्यक्रममा जेसी रुबल अधिकारी लगायत जेसिसका प्रतिनिधिहरूको उपस्थिति रहेको थियो।

साउन २६, दमक / साउन महिनाभरि प्रत्येक सोमबारको अवसरमा दमक–५ स्थित धनेश्वर मन्दिरमा रोटरी क्लव अफ दमक, रोट्रयाक्ट क्लव अफ दमक, र इन्ट्रयाक्ट क्लव अफ जेम्सको संयुक्त आयोजनामा विशेष सामाजिक सेवा कार्यक्रम सम्पन्न भएको छ।
“शिव उत्सव” नाम दिइएको उक्त कार्यक्रम अन्तर्गत चार सोमबार लगातार मन्दिरमा आउने भक्तजनहरूलाई चिया, फलफुल तथा प्रसाद वितरण गरिएको थियो। कार्यक्रममा करिब हजारभन्दा बढी भक्तजनले सेवा प्राप्त गरेका छन्।

कार्यक्रमका माध्यमबाट रोटरी तथा रोट्रयाक्ट क्लवको सामाजिक उत्तरदायित्वलाई समुदायमा चिनाउने प्रयास गरिएको र भजन कीर्तनसहित भक्तिभावपूर्ण वातावरण सिर्जना गरिएको रोट्रयाक्ट क्लव अफ दमकका अध्यक्ष दिवाकर पाँचकोटीले जानकारी दिए।
यस सामाजिक अभियानमा उषा चापागाईं फाउण्डेशन, आरसी फर्निचर र शुभ इम्पेक्सले मुख्य सहयोग प्रदान गरेका थिए।

फाउण्डेशनका संरक्षक तथा रोटरी क्लव अफ दमकका पूर्वअध्यक्ष सन्दिप ‘दिपु’ चापागाईं र हालका अध्यक्ष केशव अग्रवालको व्यवसायिक प्रतिष्ठान आरसी फर्निचर तथा शुभ इम्पेक्सको विशेष योगदान रहेको कार्यक्रम संयोजक तथा रोट्रयाक्ट क्लव अफ दमकका सर्भिस चेयर युवराज पराजुलीले जानकारी दिए ।

साउनको अन्तिम सोमबारको दिन, धनेश्वर मन्दिर संरक्षण समितिले पनि कार्यक्रम सञ्चालनमा सहयोग गरेको थियो ।समितिले रोटरी, रोट्रयाक्ट र इन्ट्रयाक्ट क्लवका प्रतिनिधिहरुलाई प्रशंसा पत्र प्रदान गर्दै धन्यवाद प्रकट गरेको छ। सामाजिक सेवामा सक्रिय यी क्लवहरूको यो पहलले धार्मिक अवसरलाई सेवा–प्रेरित उदाहरणका रूपमा प्रस्तुत गरेको छ।

साउन १५, दमक – डिपिएल दमकले सावन महिनाभरि प्रत्येक सोमबार भक्तजनलाई पानी, फलफूल, जुस र महजस्ता प्रसाद सामग्री वितरण गर्दै आएको छ। पहिलो सोमबारदेखि सुरु भएको यो अभियान दोस्रो, तेस्रो सोमबार हुँदै आज अन्तिम सोमबारसम्म निरन्तर सञ्चालन भएको हो।

कार्यक्रम डिपिएल दमकका अध्यक्ष अश्विन तिम्सिना र उपाध्यक्ष अर्जुन निरौलाको नेतृत्वमा सम्पन्न भएको हो। डिपिएल नेपालकी राष्ट्रिय अध्यक्ष अनु आचार्य भण्डारीले यसबारे जानकारी दिँदै संस्था निरन्तर समाजसँग जोडिने विभिन्न कार्यक्रम गर्दै आएको बताइन्।

कार्यक्रममा समाजसेवी तथा एक्युमेरिका पानी फ्याक्ट्रीका सञ्चालक पदम राउतको पनि विशेष उपस्थिति रहेको थियो। डिपिएल दमकले यसअघि पनि समुदायमुखी गतिविधिहरू गर्दै स्थानीय स्तरमा सक्रिय भूमिका निर्वाह गर्दै आएको छ।

झापा, दमक — दमक नगरपालिकामा सिटी सफारीको अत्यधिक भीड र बढ्दो दुर्घटना जोखिमका कारण ट्राफिक प्रहरी कार्यालय दमकले सिटी सफारी चेकजाँचलाई तीव्र पारेको छ।

ट्राफिक प्रहरी कार्यालय दमकका प्रमुख विजय राईको कमाण्डमा पूर्व–पश्चिम राजमार्गमा घाम–पानी नभनी जवानहरू सक्रिय रूपमा खटिइरहेका छन्। विशेष गरी बिलबुक, लाइसन्स नभएका सिटी सफारीलाई प्रहरीले आफैं चलाएर कार्यालयसम्म ल्याई कानुनी कारबाहीको दायरामा पुर्‍याइरहेको छ।

यात्रुहरूबाट चर्को भाडा असुल्ने र लापरवाहीपूर्ण सञ्चालनबारे गुनासो बढेपछि ट्राफिक प्रहरीले यो अभियान अघि बढाएको हो। चेकजाँचकै क्रममा बिहानै मदिरा सेवन गरी विद्यालयका विद्यार्थी बोकेको पाइएको एक चालकले ट्राफिकलाई घुस दिन खोजेको घटनासमेत सार्वजनिक भएको छ।

यातायातमा शिस्त कायम गर्न, मापसे नियन्त्रण गर्न र यात्रुहरूलाई सुरक्षित सेवा सुनिश्चित गर्न इलाका प्रहरी कार्यालय दमक, नगरपालिका र ट्राफिक प्रहरी कार्यालयको संयुक्त पहलमा यो कारबाही सञ्चालन भइरहेको ट्राफिक प्रमुख राईले बताए।

दमक प्रहरीले सिटी सफारी चालकहरूलाई कानुन अनुसार सञ्चालन गर्न र यात्रुहरूको सुरक्षालाई प्राथमिकता दिन आग्रह गरेको छ।

दमक, २७ साउन — दमक ५ स्थित ओम शान्ति डेन्टल हस्पिटलले दाँत सम्बन्धी सबै समस्या समाधान गर्दै बिरामीको विश्वास जित्दै आएको छ। आरामदायी वातावरण, अनुभवी डाक्टर, र सहृदय कर्मचारीका कारण यो अस्पताललाई यहाँका बासिन्दाले सबैभन्दा विश्वासिलो ठानेका छन्।

उपचारका लागि आउनु भएकि निशा राई जसले पहिले अन्य क्लिनिकमा उपचार गराए पनि समस्या समाधान नभएपछि यहाँको सेवा लिनुभएको थियो, भन्नुहुन्छ, “यहाँ डाक्टरको राम्रो चेकअप र सल्लाह अनुसार दाँत सफा गरिरहेको छु। वातावरण निकै राम्रो छ, जसले मलाई खुशी बनायो।”

दमकबाट उपचारका लागि आएकी अनु बस्नेतले भन्नुभयो, “मेरो दाँतमा पिप पाकेको थियो, सफा गराएँ र तीन वटा दाँत पनि खोलेँ। उपचारमा कुनै पीडा भएन, सेवा र सुविधा निकै मन पर्यो।”

ओम शान्ति डेन्टल हस्पिटलमा कार्यरत डा. सर्जन काशमी श्रेष्ठका अनुसार धेरै बिरामी समस्या गम्भीर भएपछि मात्र आउँछन्। “नियमित जाँच र सफाइलाई प्राथमिकता दिने हो भने दाँतका जटिल समस्या टार्न सकिन्छ। इन्फेक्सनले अरू स्वास्थ्य समस्यासमेत निम्त्याउन सक्छ,” उहाँले बताउनुभयो। अस्पतालले महिनामा २–३ पटक क्याम्प सञ्चालन गर्दै ओपीडी र परामर्शमा २० प्रतिशत छुट र केही बिरामीलाई निःशुल्क उपचार सुविधा उपलब्ध गराउँदै आएको छ।

अस्पतालका व्यवस्थापक कमल गैरेका अनुसार ओम शान्ति डेन्टल हस्पिटलको लक्ष्य दाँतको स्वास्थ्यलाई प्राथमिकता दिँदै सुन्दर मुस्कान र स्वास्थ्य जीवन सुनिश्चित गर्नु हो। अस्पतालले आफ्नो गुणस्तरीय सेवा, अनुभवी चिकित्सक, र मित्रवत् व्यवहारका कारण दमकमा सबैको मन जित्दै आएको छ।