Category: घटना

दमक / बिहीबार दमक बजारमा भएको भीषण आगलागीबाट क्षति व्यहोरेको सेवारो सेकुवा कर्नर होटल सञ्चालकलाई राहतस्वरूप होटल व्यवसायी संघका विभिन्न तहबाट आर्थिक सहयोग प्रदान गरिएको छ।

एक विशेष कार्यक्रमका बीच होटल व्यवसायी महासंघ कोशी प्रदेश, होटल व्यवसायी संघ झापा, र क्षेत्रीय होटल व्यवसायी संघ दमकको संयुक्त पहलमा पीडित होटल सञ्चालकलाई २० हजार रुपैयाँ आर्थिक सहयोग प्रदान गरिएको हो।

सहयोग हस्तान्तरण कार्यक्रममा होटल व्यवसायी महासंघ कोशी प्रदेश अध्यक्ष राजन दङ्गाल, झापा जिल्ला अध्यक्ष इन्दिरा श्रेष्ठ, दमक होटल व्यवसायी संघका महासचिव भूपेन्द्र न्यौपाने लगायत संघका पदाधिकारीहरूको उपस्थिति रहेको थियो।

दमक नगरपालिकाका नगरप्रमुख रामकुमार थापाले कार्यक्रमलाई सम्बोधन गर्दै नगरपालिकाको तर्फबाट सक्दो सहयोग गरिने प्रतिबद्धता जनाउनुभयो। वडा नं. ६ का अध्यक्ष टेकबहादुर थापाले पीडित परिवारप्रति सान्तना प्रकट गर्दै वडा कार्यालयबाट पनि आवश्यक सहयोग गर्ने बताउनुभयो।

कार्यक्रममा दमक उद्योग वाणिज्य संघका अध्यक्ष गोपाल गुरागाईंले सबै व्यवसायीलाई संघसंस्थामा दर्ता भई सक्रिय रहन आग्रह गर्नुभयो। उहाँले संघको सदस्यता लिई व्यवसायलाई व्यवस्थित बनाएमा भविष्यमा यस्ता संकटमा राहत तथा सहयोग सहज हुने उल्लेख गर्नुभयो।

त्यस्तै, दमक उद्योग वाणिज्य संघका वरिष्ठ उपाध्यक्ष राजु खड्का, सुरुंगा होटल व्यवसायी संघ, र अन्य क्षेत्रीय संघसंस्थाका प्रतिनिधिहरूको उपस्थिति तथा सहभागितामा सो सहयोग रकम हस्तान्तरण गरिएको थियो।

होटल व्यवसायी महासंघका अध्यक्ष दङ्गालले संस्थागत एकताले संकटमा परेका व्यवसायीलाई साथ दिन सकिने स्पष्ट पार्दै सबै व्यवसायीलाई संघसंस्थामा आबद्ध हुन आह्वान गर्नुभयो।

दमक / इलाका प्रहरी कार्यालय अनारमनी, झापाले प्रतिबन्धित लागूऔषधको ठूलो परिमाणसहित एक युवकलाई पक्राउ गरेको छ। विशेष सूचनाका आधारमा साउन १ गते विर्तामोड नगरपालिका–५, मंगलदीप टोलस्थित मनकुमार सङ्ग्रौलाको दुईतले घरको भुइँतल्लामा रहेको दुई कोठामा छापा मार्दा लागूऔषध लुकाएर भण्डारण गरिएको अवस्थामा फेला पारिएको हो।

पक्राउ परेका व्यक्ति झापा जिल्ला अर्जुनधारा नगरपालिका–६, दासपुर्व बस्ने २५ वर्षीय विनोद घिमिरे हुन्। छापा मारिएको स्थानबाट प्रहरीले घिमिरेको साथबाट दुई थान मोबाइल फोन, जसमा ९७६२३५९६२६ र ९८१५९२६४२६ नम्बरका सिम प्रयोग भएका थिए, र यामाहा कम्पनीको प्रदेश १–०१–०१३ प ८९०४ नम्बरको मोटरसाइकल समेत बरामद गरेको छ। मोटरसाइकलको इञ्जिन नम्बर जी३के५ई०१५८१७९ र च्यासिस नम्बर एमईआईआरजी५९१सीएल००२८५२० रहेको प्रहरीले जनाएको छ।

प्रहरीले घटनास्थलबाट ठूलो मात्रामा प्रतिबन्धित औषधिहरू बरामद गरेको छ। बरामद औषधिहरुमा एक लाख तीन हजार आठ सय थान ट्रामाडोल हाइड्रोक्लोराइड क्याप्सुल, एक हजार आठ सय सत्तरी थान ट्रामाडोल हाइड्रोक्लोराइड सुई, चार हजार पचास थान ट्रामाडोल र पेरासिटामोल मिश्रित ट्याब्लेट, सन्तानबन्ने दुखाइ नियन्त्रणका लागि प्रयोग गरिने डाइसाइक्लोमिन हाइड्रोक्लोराइडका ९७ हजार ट्याब्लेट, यौन उत्तेजकको रूपमा चिनिने सिलेन्डाफिलका आठ हजार नौ सय ट्याब्लेट तथा गर्भपतनमा प्रयोग हुने माइफेप्रीस्टोन र मिसोप्रोस्टोलयुक्त सात हजार छ सय पचास थान औषधि किटहरू रहेका छन्।

इलाका प्रहरी कार्यालय अनारमनीका अनुसार प्रतिबन्धित लागूऔषधको भण्डारण तथा ओसारपसारमा संलग्न आशंकामा पक्राउ परेका घिमिरेविरुद्ध लागूऔषध सम्बन्धी मुद्दा दर्ता गरी थप अनुसन्धान अघि बढाइएको छ। बरामद औषधिको स्रोत, ओसारपसारको सञ्जाल र संलग्न अन्य व्यक्तिहरूको पहिचानका लागि अनुसन्धान जारी रहेको प्रहरीले जनाएको छ।

दमक / सुनसरीबाट प्रहरीले बिहीबार दिउँसो ३ सय किलोग्राम गाँजा बरामद गरेको छ । रामधुनी नगरपालिका–७ क्वाटर डाँडास्थित बाँसको झ्याङबाट गाँजा बरामद भएको हो ।

सुनसरी प्रहरी प्रवक्ता डीएसपी योगराज खतिवडाका अनुसार दिउँसो १२ः३० बजेतिर गाँजा भेटिएको थियो । बाँस झ्याङमा लुकाएर राखिएको अवस्थामा गाँजा फेला पारिएको उनको भनाइ छ ।गाँजा लुकाएर राखिएको विशेष सूचनाका आधारमा नियन्त्रणमा लिन अस्थायी प्रहरी पोष्ट पञ्चायन र इलाका प्रहरी कार्यालय पकलीबाट संयुक्त टोली खटिएको थियो । कालो प्लाष्टिकले बेरिएको १० पोका गाँजा प्रहरीले फेला पारेको हो ।

तौल लिँदा ३ सय किलोग्राम भएको छ । गाँजा कसले लुकाएर राखेको हो भन्ने यकिन छैन । बरामद भएको गाँजालाई इलाका प्रहरी कार्यालय पकलीमा ल्याएर राखिएको छ । यस विषयमा इन्स्पेक्टर लेखनाथ दाहाल नेतृत्वको टोलीले थप अनुसन्धान गरिरहेको छ ।

दमक । झापा जिल्लाको दमक नगरपालिका वडा नं. ५ स्थित भृकुटी चोकमा रहेको सेवारो होटल एन्ड सेकुवा कर्नर मा भीषण आगलागी भएको छ।

दिलमाया लावतीको सञ्चालकत्वमा रहेको सो होटलमा भान्साको ग्यास पाइप लिक भएर आगो लागेको प्रारम्भिक अनुसन्धानबाट खुलेको हाे ।

स्थानीयवासी, नेपाल प्रहरी र दमक नगरपालिकाको बारुण यन्त्रको सहयोगमा आगो नियन्त्रणमा आएको थियो।

दमक नगरपालिकाको दमकल टोली तत्कालै घटनास्थलमा पुगेको छ र नियन्त्रणका प्रयास जारी छन्। हालसम्म मानवीय क्षतिको विवरण प्राप्त नभए पनि होटल पूर्ण रूपमा जलेर नष्ट भएको पुष्टि गरिएको छ।

प्रहरीले आगलागीको पूर्ण विवरण र क्षतिको मूल्यांकन भइरहेको बताएका छन्।

इलाम– इलामको सूर्याेदय नगरपालिका–१, भालुखोपमा एक जनाको हत्या गरिएको छ । एक जना गम्भीर घाइते छन् ।

स्थानीय काजी तामाङको घरमा गएराति माइजोगमाई २, तारसिंह गाउँ बस्ने २१ वर्षे प्रकाश चापागाईको धारिलो हतियार प्रहारबाट हत्या गरिएको प्रहरीले जनाएको छ । ३२ वर्षे निरोज चापागाई गम्भीर घाइते छन् ।

प्रकाशलाई लिइ निरोज ससुरालीघर गएका बेला सूर्याेदय १, शिरिसेका ३३ वर्षे किरण शेर्पासँग झगडा परेको थियो । त्यसैक्रममा शेर्पाले प्रकाशमाथि धारिलो हतियार प्रहार गर्दा उनको घटनास्थलमै मृत्यु भएको प्रहरीले जनाएको छ । पेटमा धारिलो हतियार प्रहारबाट निरोज गम्भीर घाइते छन् । घाइते निरोजको उपचार भइरहेको छ ।

शेर्पालाई प्रहरीले नियन्त्रणमा लिएको छ भने घटनाबारे थप अनुसन्धान भइरहेको जिल्ला प्रहरी कार्यालयले जनाएको छ ।

दमक / पाँचथरमा सहकारी भवनको निर्माणाधीन सेफ्टी ट्याङ्कीको सेटिङ खोल्ने क्रममा अक्सिजनको कमी भई निसासिएर एकजनाको मृत्यु भएको छ भने अन्य दुईजनाको अवस्था चिन्ताजनक रहेको छ ।

आज दिउँसो पाँचथरको फाल्गुनन्द गाउँपालिका–५, पञ्चमी बजार नजिकै निर्माणाधीन सहकारी भवनको सेप्टी ट्याङ्कीमा काम गर्ने क्रममा चार जना कामदार बेहोस भएका थिए।ट्याङ्कीभित्र सटिङ खोल्ने क्रममा अक्सिजनको कमी हुँदा उनीहरू बेहोस भएका हुन्।बेहोस भएका मध्ये ३५ वर्षीय रतन चेम्जोङलाई इलाम अस्पताल लगिएको थियो, जहाँ चिकित्सकले उनलाई मृत घोषणा गरेका छन्।

२४ वर्षीय भिष्म चेम्जोङ र ४० वर्षीय विरू चेम्जोङको अवस्था गम्भीर रहेको र थप उपचारका भइरहेको जनाइएको छ।३० वर्षीय सन्तोष चेम्जोङको अवस्था सामान्य रहेको प्रहरीले जनाएको छ।

घटनापछि स्थानीयबासी र प्रहरीको सहयोगमा स्काभेटर प्रयोग गरी ट्याङ्की फोरेर उद्धार गरिएको थियो ।सबै कामदारहरू फाल्गुनन्द – ५ निवासी हुन् । उनीहरु घुर्बिसे पञ्चमी बचत तथा ऋण सहकारी संस्थाको भवनमा निर्माण कार्यमा संलग्न थिए । प्रहरीका अनुसार घटनाबारे थप अनुसन्धान भइरहेको छ।

दमक / जिल्ला प्रहरी कार्यालय झापाले चालु आर्थिक वर्ष २०८१/८२ मा फैसला कार्यान्वयनतर्फ उल्लेखनीय सफलता हासिल गर्दै ५३४ जना फरार प्रतिवादीलाई पक्राउ गरेको छ।

जिल्ला प्रहरी कार्यालय झापा र मातहतका प्रहरी युनिटहरूबाट खटिएको टोलीले विभिन्न मुद्दा शिर्षकमा फरार रहेका ४६३ जना पुरुष, ७० जना महिला र १ जना यौनिक अल्पसङ्ख्यक गरी कुल ५३४ जना फरार प्रतिवादीलाई पक्राउ गरी सम्मानित झापा जिल्ला अदालतमा उपस्थित गराएको हो।

पक्राउ परेकामध्ये कैद असुल बाँकी रहेका प्रतिवादीलाई अदालतको आदेशअनुसार झापा कारागार पठाइएको छ भने जरिवाना मात्र बाँकी रहेकाहरूको जरिवाना दाखिला गराई कानुनी प्रक्रिया पूरा गरिएको जिल्ला प्रहरी कार्यालय झापाले जनाएको छ।

उक्त कार्यान्वयनबाट कुल २४८ वर्ष १० महिना १४ दिन कैद र सात करोड सताईस लाख चौबिस हजार आठ सय एक्काइस रूपैयाँ छैसठ्ठी पैसा जरिवाना असुल गरिएको हो।

प्रहरीका अनुसार पक्राउ परेका उल्लेखनीय प्रतिवादीहरूमध्ये निम्न फरारहरू रहेका छन्:

खेमराज पोखरेल, ४८ वर्ष, भद्रपुर नगरपालिका–८: जबरजस्ती करणी तथा हाडनाता करणी मुद्दामा सर्वोच्च अदालतको मिति २०८०।०७।१९ को फैसलाअनुसार १० वर्ष कैद।

प्रदिप राई, ३२ वर्ष, मेचिनगर नगरपालिका–७: उच्च अदालत विराटनगर इलाम इजलासको मिति २०७२।०३।१६ को फैसलाअनुसार जबरजस्ती करणी र चोरी मुद्दामा १० वर्ष कैद।

अमिर लगुन बिश्वकर्मा, ३० वर्ष, बिर्तामोड नगरपालिका–८: उच्च अदालत पाटनको मिति २०८०।११।२९ को फैसलाअनुसार राजश्व चुहावट मुद्दामा १ वर्ष २ महिना १५ दिन कैद र रु. २,८४,५८,६०५ जरिवाना।

प्रहरीले फरार अपराधीविरुद्ध निरन्तर खोज, निगरानी र सूचना संकलनलाई प्राथमिकतामा राखी फैसला कार्यान्वयनमा कठोरता ल्याउने जनाएको छ।

जिल्ला प्रहरी कार्यालय झापाले सार्वजनिक शान्ति, सुरक्षाको प्रत्याभूति दिलाउन तथा न्यायिक प्रक्रियालाई सबल बनाउन यस्ता अभियानलाई थप सशक्त बनाइने प्रतिबद्धता जनाएको छ।