भदौ २, दमक / झापाको दमकमा एक महिलाले आफ्नो शरीरमा पेट्रोल छर्केर आगो लगाई आत्मदाहको प्रयास गरेकी छन् । आज दिउँसो ४.३० बजे दमक नगरपालिका १ भानुभक्त चोक बस्ने मनोज साहकी श्रीमती ३० वर्षीया शोभा साहले आफ्नै तीनतले पक्की घरको दोस्रो तलामा आफू सुत्ने कोठाको ढोका थुनेर पेट्रोल आफ्नो शरीरमा छर्की आगो लगाएकी हुन् ।
घाइतेलाई दमक अस्पताल दमकमा ल्याई सामान्य उपचारपश्चात् थप उपचारको लागि वीपी कोइराला स्वास्थ्य विज्ञान प्रतिष्ठान धरान पठाइएको छ । बोल्न नसक्ने उनको अबस्था गम्भीर रहेको प्रहरीले जनाएको छ ।
साउन २९ , दमक / मोरङको पथरी बजारमा बिहिवार साँझ करिब ७ः ३० बजे नम्बर नखुलेको मिनि ट्रकले ठक्कर दिँदा एक महिलाको मृ,त्यु भएको छ ।
पूर्व–पश्चिम राजमार्गको पथरीस्थित गोर्खा डिपार्टमेन्ट स्टोर अगाडि भएको उक्त दु,र्घट,ना भएको थियो । दुर्घटनामा परि उपचारका लागी लैजाने क्रममा ती महिलाको मृ,त्यु भएको हो ।
मृ,त्यु हुने महिलाको पहिचान खुल्न नसकेको ईलाका प्रहरी कार्यालय पथरीका प्रमुख प्रहरी नायब उपरीक्षक तुलसीराम अर्यालले जानकारी दिए ।
स्थानीयका अनुसार मृ,तक महिला करिब ४० वर्षकी थिइन् र उनी बेवारिसे अवस्थामा बजार वरपर घुमफिर गर्ने गर्थिन्। प्रहरीले जनाएअनुसार ठक्कर दिने मिनि ट्रकको नम्बर खुल्न नसकेको र घ,टनापछि फरार भएको छ।
दुर्घटना गराई फरार भएको ट्रक भाउन्नेमा दुर्घटनामा परेको अवस्थामा प्रहरीले फेला पारेको छ । दुर्घटनाग्रस्त सवारी साधनको चालक भने फरार रहेको र घटनाको विस्तृत अनुसन्धान गरिरहेको प्रहरीले जनाएको छ।
साउन २८ ,दमक / झापाको दमक नगरपालिका–१० मा आज बिहान खोलामा डुबेर एक बालकको मृत्यु भएको छ। इलाका प्रहरी कार्यालय दमकका अनुसार बिहान करिब ७ बजेतिर स्थानीय ११ वर्षीय धर्मेन्द्र प्रसाई र सोही उमेरका भुपेन्द्र ढकाल खेल्दै भालु खोलामा पौडी खेल्ने क्रममा दुर्घटना भएको हो।
धर्मेन्द्र प्रसाईलाई खोलाले करिब ६०० मिटर टाढासम्म बगाएको स्थानीयले देखेपछि तत्काल उद्धार गरी उपचारका लागि निम्स अस्पताल दमक पुर्याइएको थियो। तर अस्पताल पुर्याउनासाथ चिकित्सकले बिहान ७:५० बजे मृत घोषित गरेका हुन्।
घटनास्थलमा थप अनुसन्धान तथा कानूनी प्रक्रिया अघि बढाउन इलाका प्रहरी कार्यालय दमकका प्रहरी नायब निरीक्षक नविन राईको नेतृत्वमा टोली खटिएको प्रहरीले जनाएको छ।
शीतल अधिकारी – साउन २७ / गौरादह नगरपालिकाका उपप्रमुख जलवर्षा राजवंशी चौधरीले नेपाल स्काउटमार्फत दक्षिण कोरिया भ्रमण गरी नेपाल स्काउटको रकम नतिरेको दाबी सामाजिक सञ्जालमा भाइरल भइरहेको छ ।तर हाम्रो तथ्य जाँचमा उक्त दाबी पूर्णतः भ्रामक रहेको पाइएको छ । उपमेयर राजवंशीले कोरिया भ्रमण गरेको कुनै प्रमाण छैन, तर फरक सन्दर्भमा साइप्रस भ्रमण गरेको भने पुष्टि हुन्छ ।
के हो दावी ?
राष्ट्रिय समाचार एजेन्सी न्युज २४ का पत्रकार राजिब खत्रीले २०८२ श्रावण २६ गते बेलुका ४:३१ मा पोष्ट सार्वजनिक गर्दै एमाले नेता महेश बस्नेतले राष्ट्रीय स्वतन्त्र पार्टीका उपसभापति डिपी अर्यालको सुमेरू टुर एण्ड ट्राभल मार्फत नेपाल स्काउटबाट भिजिट भिषामा कोरिया र डेनमार्क पुगेका केहि व्यक्ती उतै लुकेको र सोहि कार्यक्रममा कोरिया पुगेको तर नेपाल स्काउटको रकम तिर्न बाँकी रहेको भनी उपप्रमुख राजवंशी सहित अन्य ३ जना जनप्रतिनिधिको नाम सार्वजनिक गरी पैसा नतिरेको दाबी गरिएको छ । यो दाबी सामाजिक सञ्जालमा व्यापक रूपमा फैलिएको छ, जसमा उनको नाम कोरिया र डेनमार्क प्रकरणसँग जोडिएको छ ।
उदाहरणका लागि, फेसबुकमा केही पोस्टहरूमा उनलाई ‘स्काउटको कोरिया कार्यक्रममा गएर पैसा नतिरेको’ भन्दै सूची सार्वजनिक गरिएको छ ।
हेर्नुस् स्क्रिनसट –
यो तथ्य जाँच तयार पार्दा सम्म यस पोस्टमा ८७०० हजार रियाक्ट र ११०० सेयरहरू देखिएका छन् । यसैगरी, अन्य सामाजिक सञ्जालमा पनि सोही दाबीसहित पोस्टहरू भेटिन्छन् ।
भाइरल विषय भएकोले हामीले यसको तथ्य जाँच गरेका छौँ । के हो तथ्य ?
हामी यस विषयमा उपमेयर जलवर्षा राजवंशीलाई प्रश्न गर्दा यो आरोपलाई पूर्णतः खण्डन गर्दै स्पष्ट पारेकी छन्, उनको अनुसार हाल सम्म उनी दक्षिण कोरिया कहिल्यै नगएको उनको दावी छ । उनको भनाइअनुसार, निर्वाचित भएपछि उनी नेपाल स्काउटको कार्यक्रममा सहभागी हुन साइप्रस गएकी थिइन्, जुन २०२३ मा भएको ३८औँ WAGGGS विश्व सम्मेलन थियो । यो सम्मेलन युरोपियन युनिभर्सिटी साइप्रसमा आयोजित भएको थियो ।
हामीले यो दावीलाई पुष्टि गर्न 38th WAGGGS विश्व सम्मेलनको विवरणहरु खोज्दै जाँदा नेपाल स्काउटको आधिकारिक इन्स्टाग्राम आईडीबाट २०८० साउन १२, शुक्रवार पोष्ट गरिएको यी तस्बिरहरूमा देब्रे पट्टीको तेस्रो तस्बिरमा गौरादह नगरपालिका उप-प्रमुख जलबर्षा राजवंशी चौधरीलाई देख्न सकिन्छ l उक्त तस्बिरहरूमा सम्मेलनको बोर्डमा ‘38th WAGGGS World Conference CYPRUS 2023’ स्पष्ट देखिन्छ, जसमा स्काउट लोगो र नेपाली प्रतिनिधिहरू सहभागी छन् । तस्बिरहरूमा नेपाल स्काउटका प्रमुख आयुक्त लोकबहादुर भण्डारी, माननीय सांसद सुनीता बराललाई समेत देख्न सकिन्छ l
यस विषयमा गौरादह नगरपालिकाका मेयर छत्रपति सुबेदीले पनि प्रतिक्रिया दिँदै भनेका छन्, “उपमेयर कोरिया वा डेनमार्क गएको मलाई थाहा छैन, किनकि स्थानीय तहका पदाधिकारीहरूको विदेश भ्रमणका लागि नेपाल सरकारको मनोनयनपछि कार्यपालिकाको स्वीकृति अनिवार्य हुन्छ । यस्तो कुनै प्रस्ताव कार्यपालिकामा आएको नै छैन ।”
तथ्यः भ्रामक सूचना । दक्षिण कोरिया भ्रमण गरेको दाबी गर्दै फैलाइएको सूचना भ्रामक हो । उपमेयर राजवंशीले दक्षिण कोरिया भ्रमण गरेको छैनन् । उनी २०२३ मा साइप्रसमा भएको WAGGGS विश्व सम्मेलनमा सहभागी भएकी थिइन्, जसमा आर्थिक दायित्व पूरा भएको उनको दावी छ ।
उर्लाबारी ४ स्थित वशिष्ठ रिसोर्ट नजिक आज बिहान भएको सवारी दुर्घटनामा एक जना मोटरसाइकल चालक घाइते भएका छन्।
पश्चिमबाट पूर्वतर्फ आउँदै गरेको प्रदेश ०१–०२–०५१ प नम्बरको मोटरसाइकललाई पूर्वबाट पश्चिमतर्फ जाँदै गरेको रातो बसले ठक्कर दिएको प्रहरीले जनाएको छ। घाइते मोटरसाइकल चालकको पहिचान खुल्न बाँकी रहेको छ। उनलाई तत्कालै उद्धार गरी उर्लाबारी–५ स्थित अरनिको अस्पताल लगिएको छ।
ठक्कर दिने रातो बस भने दुर्घटनापछि फरार भएको र घटनाबारे अनुसन्धान जारी रहेको इलाका प्रहरी कार्यालय उर्लाबारीले जनाएको छ।
दमक / झापाको दमकबाट तेह्रथुमका लागि सेवा दिने पशुपति यातायात नामको गाडीले यात्रुहरूबाट गैरकानुनी रूपमा चर्को शुल्क असुल गर्ने गरेको पाइएको छ। प्र.१-०२-००१ख ९५६५ नम्बरको पशुपति यातायातको गाडीले दमक आकाशी पुलबाट बिहान ५ बजे छुट्ने क्रममा एक यात्रुबाट सामान ढुवानी वापत ५ सय मात्र लिने भनिएकोमा गन्तव्यस्थल तेह्रथुमको जिरखिम्तीमा पुगेर सो भन्दा दोब्बर रकम अर्थात् १ हजार असुल गरेको गुनासो आएको छ।
सामान पठाउने यात्री किरण गौतमका अनुसार, गन्तव्यमा पुगेर चालकले पहिले भनिएको भन्दा दोब्बर भाडा मागेपछि सम्पर्क गरेर सोधपुछ गर्न खोज्दा “जे गर्न सक्छस् गर” भनेर धम्की दिएको बताइएको छ। त्यतिमात्र होइन, बारम्बार सम्पर्क गर्न खोज्दा नम्बर समेत ब्लक गरेर सम्पर्कविहीन भएको गौतमले गुनासो गर्नुभयो। उक्त गाडीमा तीनवटा ३० केजी जाने बोरामा केही कपडा र सामान रहेको थियो भने टेबल सेट र एउटा ग्यास सिलिन्डर रहेको उहाँले बताउनुभयो।
यात्रुहरूले लामो समयदेखि पहाडी रुटमा यात्रा गर्दा यस्तो समस्याको सामना गर्दै आएको जनाउँदै आएका छन्। दमकबाट तेह्रथुमजस्ता पहाडी जिल्लामा जाने यात्रुहरूले बारम्बार असजिलो महसुस गर्दै आएका छन्। गाडी लाइनमा काम गर्दै आउनुहुने रमेश प्रसाईले गाडीको नामबारे जानकारी दिनुभएको थियो।
यस घटनाले सार्वजनिक यातायातमा निगरानी अभाव देखिएको छ। स्थानीय स्तरमै यातायात व्यवस्थापन समितिले तत्काल ध्यान दिनुपर्ने देखिएको छ।सम्बन्धित निकायलाई तत्काल कारबाही र सुधारका लागि चासो दिनुपर्ने देखिन्छ।
दमक / झापाको कमल गाउँपालिकाका कर्मचारी चढेको सरकारी स्कारपियो गाडी आइतबार बिहान दमक–ताराबारी डिपु सडक खण्डमा दुर्घटनामा परेको छ।गाउँपालिकाको जिन्सी शाखा प्रमुख पर्वत भण्डारीसहित अर्का कर्मचारी सन्तोष गाैतम चढेको प्रदेश १–०१–००१ झ २७६ नम्बरको स्कारपियो सडकबाट अनियन्त्रित भई फुटपाथसम्म पुगेको हो। दुर्घटनामा गाडीको अगाडिको भाग पूर्ण रूपमा क्षतिग्रस्त भएको छ।
दुर्घटनापछि घाइते भएका दुवै जनालाई तत्काल दमकस्थित आम्दा अस्पतालमा स्वास्थ्य परीक्षण तथा उपचारका लागि पठाइएको इलाका प्रहरी कार्यालय दमकले जनाएको छ।उक्त गाडीमा सामान्यतया गाउँपालिकाका उपाध्यक्ष प्रमिला न्यौपाने तिवारी यात्रा गर्दै आउनुभएको भए पनि घटनाको समयमा उहाँ सवार नभएको जनाइएको छ।
इलाका प्रहरी कार्यालय दमकका डीएसपी रामप्रसाद तिमल्सिनाका अनुसार घटनास्थलमा अनुसन्धान भइरहेको छ। दुर्घटनाको कारण भने अहिलेसम्म स्पष्ट भएको छैन। गाडी सडक किनारबाट चिप्लिँदै पैदल यात्रु हिंड्ने ठाउँसम्म पुगेको थियो। प्रहरीले घटनाबारे थप अनुसन्धान गरिरहेको छ।