Blog

माघ ३, दमक / दमक उद्योग वाणिज्य संघको १९औँ शपथग्रहण तथा पद हस्तान्तरण कार्यक्रम शुक्रबार दमक–६ स्थित मातृभूमि पार्टी प्यालेसको सभाहलमा सम्पन्न भएको छ। पुस १८ गते सम्पन्न निर्वाचनबाट निर्वाचित नयाँ कार्यसमितिका पदाधिकारी तथा सदस्यहरूले सो अवसरमा शपथ ग्रहण गरेका हुन्।

कार्यक्रमको अध्यक्षता नवनिर्वाचित अध्यक्ष देवीप्रसाद गुरागाईं (गोपाल)ले गर्नुभएको थियो। निर्वाचन अधिकृत लिलानाथ गुरागाईंले अध्यक्ष गुरागाईंलाई शपथ गराउनुभएको थियो भने अध्यक्ष गुरागाईंले संघका निर्वाचित पदाधिकारी, कार्यसमिति सदस्य तथा लेखा समिति पदाधिकारीहरूलाई शपथ गराउनुभएको थियो।

शपथ ग्रहण गर्ने पदाधिकारीहरूमा वरिष्ठ उपाध्यक्ष भगवान बस्नेत, प्रथम उपाध्यक्ष रुवल अधिकारी, द्वितीय उपाध्यक्ष टिकाराम खतिवडा, तृतीय उपाध्यक्ष सुवास गड्तौला तथा महिला उपाध्यक्ष संगीता तुम्बापो रहेका छन्।

यसैगरी, कार्यसमिति सदस्यहरूमा भरत दुलाल, चिरन न्यौपाने, कविन श्रेष्ठ, कुमार श्रेष्ठ, टंकप्रसाद आचार्य, सहदेव भट्टराई, हेमसागर अधिकारी, कृष्णराज दाहाल, टंक ढकाल, डुका कुमाल, बुद्धिशेखर बजगाईं, गोकुल खड्का, खेमराज पाण्डे तथा महिला सदस्यहरू संगीता प्रसाईं र उर्मिला गुरुङ रहेका छन्। लेखा समिति संयोजकमा भेनस श्रेष्ठ तथा सदस्यहरूमा रुपक सापकोटा र राजकुमार अधिकारीले शपथ ग्रहण गरेका छन्।

कार्यक्रमकै अवसरमा निवर्तमान कार्यसमितिलाई स–सम्मानसहित विदाई गरिएको थियो। नवनिर्वाचित अध्यक्ष गुरागाईंले व्यवसायिक हित, उद्योग–व्यवसायको प्रवर्द्धन तथा दमकको आर्थिक विकासका लागि संघले समन्वयात्मक र सक्रिय भूमिका खेल्ने प्रतिबद्धता व्यक्त गर्नुभयो।

माघ ३, झापा / कमल गाउँपालिका–५ स्थित सितापुरी उत्तरमा रहेको किराँत समुदायको ऐतिहासिक साकेला थानमा प्रतीकात्मक सुप्तुलुङ, माङ्पा सामा र बुम्छुत का छुट्टाछुट्टै प्रतिमा अनावरण गरिएको छ।

कमल गाउँपालिका अध्यक्ष हुकुमसिंह राईले औपचारिक कार्यक्रमका बीच ती प्रतिमाहरूको अनावरण गरेका हुन्। अनावरणसँगै उक्त प्रतिमाहरू किराँत राई यायोक्खा झापा जिल्ला समितिलाई हस्तान्तरणसमेत गरिएको छ।

किराँत राई यायोक्खा कमल गाउँ समितिको पहलमा स्वदेश तथा विदेशमा रहेका किराँतसम्बद्ध सहयोगदाताहरूको आर्थिक सहयोगबाट प्रतिमाहरू निर्माण गरिएको हो। कार्यक्रमका अवसरमा यायोक्खा कमलतर्फबाट प्रतिमा निर्माण समिति संयोजक भिमराज राईले यायोक्खा झापाका अध्यक्ष गणेश राईलाई सम्पदा हस्तान्तरण गरे। अध्यक्ष राईले संरचनाहरूको संरक्षण, आवश्यक रेखदेख तथा सदुपयोग गर्ने प्रतिबद्धता व्यक्त गरे।

यायोक्खा कमल गाउँ समिति सदस्य भिमराज राईका अनुसार प्रतिमा निर्माणका लागि ८ लाख ६४ हजार रुपैयाँ खर्च भएको छ। साथै उनले निर्माण प्रक्रियामा भएको आम्दानी तथा खर्चको विवरणसमेत सार्वजनिक गरेका थिए।

कार्यक्रमका प्रमुख अतिथि अध्यक्ष हुकुमसिंह राईले साकेला थानको रक्षा र किराँत सम्पदाको संरक्षणका लागि सबै किराँत धर्मावलम्बीहरू एकजुट हुनुपर्ने आवश्यकता औंल्याए। यस्ता पहलहरूले नयाँ पुस्तामा किराँत धर्म, संस्कृति र पहिचानप्रति अभिप्रेरणा जगाउने विश्वास व्यक्त गरे।

प्रथम किराँत राजा यलम्बरले शुरु गरेको येले सम्वत ५०८६ नयाँ वर्ष तथा माघे संक्रान्तिको अवसरमा शुभकामना आदान–प्रदानसहित सम्पन्न कार्यक्रममा स्थानीय किराँत धर्मप्रेमी तथा सामाजिक अगुवाहरूको उल्लेखनीय सहभागिता रहेको थियो। विशिष्ट अतिथिका रूपमा कोशी प्रदेशका पूर्व सांसद अर्जुन राईले शुभकामना मन्तव्य राखेका थिए।

किराँत राई यायोक्खा कमल गाउँ समिति अध्यक्ष हरिचन्द्र राईको अध्यक्षतामा सम्पन्न कार्यक्रममा स्वागत मन्तव्य सल्लाहकार संयोजक सन्तोष राईले राखेका थिए भने कार्यक्रम सञ्चालन सदस्य चन्द्रप्रकाश राईले गरेका थिए।

माघ ३, झापा / राष्ट्रिय प्रजातन्त्र पार्टी (राप्रपा) ले झापा निर्वाचन क्षेत्र नम्बर ५ मा पार्टीका केन्द्रीय सदस्य लक्ष्मी प्रसाद संग्रौलालाई आगामी प्रतिनिधि सभा निर्वाचनका लागि आधिकारिक उम्मेदवार बनाउने निर्णय गरेको छ। पार्टीभित्र लामो समयदेखि सक्रिय रहँदै संगठन विस्तार र स्थानीय तहमा प्रभावशाली नेतृत्वको पहिचान बनाइसकेका संग्रौला उम्मेदवार चयन भएसँगै झापा–५ को राजनीतिक सरगर्मी थप बढेको छ।

झापा–५ हाल देशकै सबैभन्दा चर्चित र प्रतिस्पर्धात्मक निर्वाचन क्षेत्रका रूपमा उभिएको छ। पूर्वप्रधानमन्त्री तथा एमाले अध्यक्ष केपी शर्मा ओली र काठमाडौं महानगरपालिकाका मेयर बालेन शाहबीचको सम्भावित प्रतिस्पर्धाले यस क्षेत्रलाई राष्ट्रिय स्तरमै चर्चा र चासोको केन्द्र बनाएको छ। यही पृष्ठभूमिमा राप्रपाले पनि आफ्ना तर्फबाट बलियो र स्थापित उम्मेदवारका रूपमा संग्रौलालाई अघि सारेको हो।

राप्रपाका नेताहरूका अनुसार संग्रौलाको उम्मेदवारीले झापा–५ मा त्रिकोणात्मक प्रतिस्पर्धा झन् रोचक बन्ने विश्वास गरिएको छ। स्थानीय नेताहरूले संग्रौलालाई इमानदार, संगठनमैत्री र कार्यकर्तामाझ लोकप्रिय व्यक्तित्वका रूपमा चिनिने नेता भएको बताएका छन्।

बढ्दो राजनीतिक चहलपहल र बहसलाई ध्यानमा राख्दै पार्टीको सुदृढ उपस्थिति जनाउने उद्देश्यसहित संग्रौलालाई उम्मेदवार बनाइएको राप्रपाले जनाएको छ। निर्वाचन मिति नजिकिँदै जाँदा उम्मेदवार चयन, चुनावी तयारी, रणनीति तथा सम्भावित गठबन्धनका कारण झापा–५ को राजनीतिक वातावरण थप तातिँदै गएको छ। अब विभिन्न दलका उम्मेदवारबीचको प्रतिस्पर्धा कसरी अघि बढ्छ भन्ने विषयले देशव्यापी राजनीतिक वृत्तमा विशेष चासो पैदा गरेको छ।

माघ २, दमक / निर्वाचन आयोग नेपालको मातहतमा प्रतिनिधि सभा सदस्य निर्वाचन २०८२ का लागि झापा क्षेत्र नम्बर ५ मा निर्वाचन अधिकृतको कार्यालय स्थापना गरिएको छ। कोशी प्रदेशअन्तर्गत झापा जिल्लाको दमक नगरपालिका–८ मा रहेको अर्गानिक कृषि बजारको खाली भवनमा कार्यालय स्थापना गरी निर्वाचनसम्बन्धी सम्पूर्ण काम–कारबाही अगाडि बढाइएको छ।

झापा क्षेत्र नम्बर ५ का लागि निर्वाचन अधिकृत विदुर कार्कीको नेतृत्वमा ९ जना कर्मचारी खटिएका छन्। कार्यालयमा एक जना मुख्य निर्वाचन अधिकृत, एक जना सहायक निर्वाचन अधिकृत, नासु वा खरिदार सरहका एक जना कर्मचारी, एक जना कम्प्युटर अपरेटर, दुई जना कार्यालय सहयोगी, एक जना सवारी चालक तथा एक जना पीएसओ कार्यरत रहेका छन्।

निर्वाचन प्रयोजनका लागि यस क्षेत्रमा ६१ वटा मतदान स्थल र १ सय ८५ वटा मतदान केन्द्र तोकिएका छन्। निर्वाचन कार्यालयका अनुसार झापा क्षेत्र नम्बर ५ मा कुल १ लाख ६३ हजार ३ सय ७९ जना मतदाता रहेका छन्।

निर्वाचनलाई स्वच्छ, निष्पक्ष र व्यवस्थित रूपमा सम्पन्न गर्न आवश्यक प्रशासनिक तथा प्राविधिक तयारी तीव्र रूपमा अघि बढाइएको निर्वाचन अधिकृतको कार्यालयले जनाएको छ। कार्यालयको शुभारम्भसँगै व्यवस्थापनसम्बन्धी कार्यहरू सुरु भइसकेको निर्वाचन अधिकृत विदुर कार्कीले जानकारी दिनुभयो । निर्वाचन सफल पार्न सबै सरोकारवालासँग समन्वय गर्दै अघि बढ्ने प्रतिबद्धता निर्वाचन अधिकृतको कार्यालयले जनाएको छ।

माघ २, काठमाडौं — निर्वाचन आयोगले गगनकुमार थापा नेतृत्वको नेपाली कांग्रेसलाई आधिकारिकता दिएको छ। आयोगको शुक्रबार बसेको बैठकले थापालाई नेपाली कांग्रेसको सभापतिको मान्यता दिने निर्णय गरेको हो।

राजधानीको भृकुटीमण्डपमा पुस २७ देखि ३० गतेसम्म सम्पन्न विशेष महाधिवेशनमा बहुमत महाधिवेशन प्रतिनिधिको उपस्थितिमा गगन थापा सभापति चयन भएका थिए। सभापति चयनपछि बिहीबार बसेको केन्द्रीय समिति बैठकको निर्णयसहित थापा आधिकारिकता दाबी गर्दै निर्वाचन आयोग पुगेका थिए।

आयोगले दुवै पक्षबाट बुझाइएका कागजात, निर्णय र प्रक्रिया अध्ययन गरेपछि थापा नेतृत्वको केन्द्रीय समितिलाई आधिकारिकता दिएको जनाएको छ। यससँगै नेपाली कांग्रेसको चुनाव चिह्न ‘रुख’ र चारतारे झण्डा शेरबहादुर देउवा पक्षबाट गुमेको छ। देउवा पक्षले पनि आफू नै आधिकारिक भएको दाबी गर्दै आयोगमा कागजात पेश गरेको थियो।