Blog

माघ २, दमक / झापाको दमक नगरपालिका–१ स्थित सुकुम्बासी बस्तीमा बस्दै आएका डेकबहादुर थापाको घरभित्र लुकाइछिपाई राखिएको अवस्थामा हातहतियारको पार्टपुर्जा फेला परेको छ।

प्रहरीका अनुसार गोप्य सूचनाको आधारमा इलाका प्रहरी कार्यालय दमकबाट डिएसपी किशोर लम्सालको कमाण्डमा खटिएको प्रहरी टोलीले थापा बस्दै आएको जस्ताको छानो भएको टहरामा खानतलासी गरेको थियो। सो क्रममा टहराको भुईँमा बालुवाले पुरेर राखिएको अवस्थामा सर्टगनको बटको भाग (बटमा १३२०४४७ नम्बर लेखिएको) थान–१ बरामद गरिएको प्रहरीले जनाएको छ।

बरामद गरिएको उक्त हातहतियारको पार्टपुर्जा मिति २०८२/०५/२४ गते Gen-Z आन्दोलनको क्रममा इलाका प्रहरी कार्यालय दमकबाट लुटिएको अभिलेखसँग मेल खाएको प्रहरीको भनाइ छ।

प्रहरीले बरामद गरिएको हातहतियारको पार्टपुर्जा कानून बमोजिम नियन्त्रणमा लिई आवश्यक अनुसन्धान प्रक्रिया अघि बढाएको जनाएको छ। घटनामा संलग्न अन्य व्यक्तिहरूको खोजी तथा थप अनुसन्धान जारी रहेको इप्रका दमकले जानकारी दिएको छ।

पुष ३०, झापा / मिडिया नेपाल झापा शाखाको सह–सचिव पदमा युवा पत्रकार सुजन गौतम मनोनित भएका छन्। मिडिया नेपालको कार्यसमितिको निर्णयअनुसार गौतमलाई सह–सचिव पदमा मनोनयन गरिएको हो।

तेह्रथुमको म्याङ्लुङ नगरपालिकामा जन्मिएका गौतम हाल झापाको दमक नगरपालिकामा बसोबास गर्दै आएका छन्। उनी नेक्स्ट नेपाल मिडिया प्रा.लि.द्वारा सञ्चालित मल्टिमिडिया डट कमका सञ्चालकसमेत हुन्। साथै, न्युज झापा अनलाइन र पूर्व सन्देश पत्रिका लगायत विभिन्न सञ्चार माध्यम तथा संस्थामा उनी आबद्ध रहँदै आएका छन्।

२२ वर्षे उमेरमै पत्रकारितामा सक्रिय गौतमले पाँच वर्षभन्दा बढी समयदेखि निरन्तर पत्रकारिता गर्दै आएका छन्। स्थानीयदेखि राष्ट्रिय विषयवस्तुमा समाचार, सूचना र जनसरोकारका मुद्दा उठाउँदै आएका उनी युवामाझ परिचित नाम हुन्। मनोनयन पत्रमा मिडिया नेपालले गौतमको अनुभव, सक्रियता र प्रतिबद्धताले संस्थाको सुदृढीकरणमा महत्वपूर्ण योगदान पुग्ने विश्वास व्यक्त गरेको छ।

साथै, संस्थाको विधान, नियम र निर्णयअनुसार जिम्मेवारी निर्वाह गर्दै आगामी दिनमा संस्थाका गतिविधिमा सक्रिय भूमिका खेल्ने अपेक्षा गरिएको छ। गौतमको मनोनयनसँगै मिडिया नेपाल झापा शाखामा युवाको सहभागिता थप सशक्त हुने विश्वास गरिएको छ।

सुजन गाैतम / पुष २९, दमक /नेपालकै नम्बर–१ ब्रान्ड भनेर प्रचार गरिँदै आएको बर्जर पेन्ट्स दमकमा गम्भीर विवादमा फसेको छ। उपभोक्तालाई ठग्ने, गल्ती लुकाउन लाखौँ रुपैयाँको अफर गर्ने र सत्य बाहिर ल्याउन खोज्दा कुटपिटसम्म गर्ने आरोपसहित बर्जर पेन्ट्सको कथित ‘लुट धन्दा’ सार्वजनिक भएको हो।

दमक नगरपालिका–४ का अनूप कटुवालले आफ्नो घरमा १० वर्ष टिक्ने वारेन्टीसहित लगाइएको भनिएको बर्जर पेन्ट्स मात्र २० दिनमै खुुइलिन थालेपछि कम्पनीको वास्तविकता उजागर भएको बताए। घरको बाहिरी तथा भित्री भागको रंग बिग्रिएर सम्पूर्ण घर नै कुरुप बने अवस्थ भएको अनुप कटुवालको भनाइ छ। कटुवालका अनुसार उजुरी गरेपछि समस्या समाधान गर्नुको सट्टा कम्पनी पक्षले “मिडियामा नलैजानू” भन्दै करिब २० लाख रुपैयाँ दिने प्रस्ताव गर्‍यो। उनले रंगको गुणस्तर खराब भएको विषय सार्वजनिक गर्ने अडान लिएपछि भने कम्पनीबाट आएका करिब ७ जना व्यक्तिहरु दादागिरी शैलीमा घर वरिपरि आएर गएका पनि थिए।

आफ्नो गल्ती लुकाउन बर्जर पेन्ट्सका कथित ‘सलाहकार’ भन्दै ९८५१०९८०९२ नम्बरबाट पटक–पटक फोन गरी लाखौँ रुपैयाँ दिन्छौँ, चुप लाग भन्ने दबाब दिइएको कटुवालले खुलासा गरेका छन्। तर पैसा लिएर भाग्नुको सट्टा सत्य बाहिर ल्याउनु नै उचित ठानेको उनले बताए। घटना दमक–५ बेलडाँगी रोडमा रहेको बर्जर पेन्ट्सको एक डिलरबाट खरिद गरिएको पेन्ट प्रयोग गरेपछि भएको पीडितको दाबी छ। तर आश्चर्यजनक रूपमा कम्पनीले आफ्नो आधिकारिक पत्रमार्फत “उक्त घरमा बर्जर पेन्ट्स प्रयोग नै भएको छैन” भन्ने दाबी गर्दै उल्टै उपभोक्तामाथि नै दोष थोपरेको छ।

यसै विषयमा दमक–५ बेलडाँगी रोडमै रहेको विशपति सिरेमिक एन्ड कलर हाउसका सञ्चालक बिलास बरालले आफ्नो पसलमार्फत बिक्री हुने पेन्ट कम्पनीबाटै आउने र कम्पनीकै निर्देशनअनुसार ग्राहकलाई उपलब्ध गराइने स्पष्ट पारेका छन्। यसले बर्जर पेन्ट्सको आधिकारिक दाबीमाथि गम्भीर प्रश्न खडा गरेको छ। मंगलबार दमकमा आयोजित पत्रकार सम्मेलनमा पीडित अनूप कटुवालले बर्जर पेन्ट्सको ठगी, दबाब, धम्की र हिंसाको श्रृंखला सार्वजनिक गर्दै उपभोक्तामाथि कम्पनीले निषेधाज्ञा जस्तै मुद्दा हालेर आतंक मच्चाएको सम्म बताउनुभयो ।नेपालभर गुणस्तरको नाममा बजार कब्जा गर्दै आएको बर्जर पेन्ट्सको यो प्रकरणले साधारण उपभोक्ताको सुरक्षा कति कमजोर छ? भन्ने गम्भीर प्रश्न उठाएको छ।

पुष २७ , दमक / ‘इन्डियन आइडल’ विजेता तथा चर्चित गायक एवं अभिनेता प्रशान्त तामाङको ४३ वर्षको उमेरमा निधन भएको छ। भारतको दिल्लीस्थित आफ्नै अपार्टमेन्टमा आज (आइतबार) बिहान हृदयघातका कारण उनको निधन भएको पारिवारिक स्रोतले पुष्टि गरेको छ। सन् २००७ मा इन्डियन आइडलको उपाधि जितेर चर्चामा आएका तामाङले नेपाली सुगम संगीत र चलचित्र क्षेत्रमा ठूलो योगदान दिएका छन्।

गायक तथा अभिनेता तामाङले ‘गोर्खा पल्टन २’ बाट नेपाली फिल्ममा अभिनय यात्रा सुरु गरेका थिए भने ‘परदेशी’, ‘निशानी’, र ‘अँगालो मायाको’ जस्ता फिल्ममा मुख्य भूमिका निर्वाह गरेका थिए। उनले अभिनय गरेको बलिउड फिल्म ‘ब्याटल अफ गलवान’ प्रदर्शनको तयारीमा थियो।

वीर गोर्खाली’ र ‘असारे महिनामा’ जस्ता लोकप्रिय गीतका गायक प्रशान्त कुनै समय कोलकाता प्रहरीमा समेत कार्यरत थिए। उनका श्रीमती र एक छोरी छन्।उनको असामयिक निधनले कला र संगीत क्षेत्रमा अपूरणीय क्षति पुगेको छ।

पुष २६, दमक / पर्यटकीय स्थल चपेटीमा बसोबास गर्दै आउनु भएका एक बयोवृद्ध तथा शारीरिक रूपमा अशक्त बाघधन राईलाई लायन्स क्लब अफ द हेल्पिङ हार्ट्सले खाद्यान्न तथा आवश्यक सामग्री सहयोग गरेको छ। जाडो मौसममा कष्टकर जीवन बिताइरहेका राईको शारीरिक अवस्था कमजोर बन्दै गएकाले मानवीय सहयोग स्वरूप क्लबले राईकै निवासमा पुगेर चामल, नुन, तेल, चिनी, म्याट्रेस, जुत्ता र ज्याकेट हस्तान्तरण गरेको हो।

सहयोग कार्यक्रमबारे जानकारी दिँदै लायन्स क्लबका रिजन चियरपर्सन युवराज गजमेरले सामाजिक उत्तरदायित्वअन्तर्गत क्लबले बालबालिका, महिला तथा ज्येष्ठ नागरिकको सेवामा निरन्तर कार्यक्रम सञ्चालन गर्दै आइरहेको बताउनुभयो। कार्यक्रमको समापनमा निर्माणाधीन लायन्स पार्कका कोअर्डिनेटर विश्वदीप देबले प्रमुख अतिथि तथा उपस्थित अतिथिहरूलाई धन्यवाद मन्तव्य व्यक्त गर्नुभएको थियो।