झापा , असोज १५ । झापाको बुट्टाबारीमा भएको दुर्घटनामा ३ जनाको मृत्यु भएको पुष्टि भएको छ ।
आज बिहान ९.३० बजे बिर्तामोड ६ स्थित बुट्टाबारीमा पश्चिमबाट पूर्वतर्फ जाँदै गरेको प्रदेश १–०११–००१ ख ४४५९ नम्बरको सगरमाथा यातायातको यात्रुबाहक बस अनियन्त्रित भई सडकबाट ५ मिटर तल्तिर पल्टदा त्यसमा सवारमध्ये एकजनाको घटनास्थलमै मृत्यु भएको हो । अन्य दुईजनाको अस्पताल लाँदै गर्दा मृत्यु भएको बताइएको छ । दुर्घटनामा एक दर्जनभन्दा बढी घाइते भएकाले प्रहरी र स्थानीयले उद्धार गरि नजिकको अस्पताल लैजाने कार्य भैरहेको छ ।
inअसाेज १३, दमक / झापाको दमकमा भोकमान्डु रिसोर्ट एण्ड लज औपचारिक रुपमा सञ्चालनमा आएको छ। सोमबार एक विशेष समारोहका बीच नेपाल उद्योग वाणिज्य महासङ्घका केन्द्रीय सदस्य गोकुल श्रेष्ठले रिबन काटी होटलको समुद्घाटन गर्नुभयो।
समुद्घाटन कार्यक्रममा प्रमुख अतिथि श्रेष्ठले होटल व्यवसाय संसारकै सबैभन्दा धेरै सुरु हुने र सबैभन्दा बढी चुनौतीपूर्ण व्यवसाय भएको भन्दै, सञ्चालनपछि पहिलो दुई वर्ष टिक्न सकेका होटल व्यवसायहरू दीर्घकालीन रुपमा सफल हुने धारणा व्यक्त गर्नुभयो।
भोकमान्डु होटल एण्ड लजका सञ्चालक विनोद लावतीले होटलमा चौबीसै घण्टा पिउने पदार्थ तथा खाद्य परिकारको होम
डेलिभरी सेवा उपलब्ध रहेको जानकारी दिनुभयो।
कार्यक्रमको सञ्चालन सञ्चारकर्मी सुमन धमलाले गर्नुभएको थियो भने अध्यक्षता सञ्चालक लावतीले गर्नुभएको थियो। कार्यक्रममा ट्राफिक प्रहरी कार्यालय दमकका प्रमुख विजय राई, दमक उद्योग वाणिज्य सङ्घका वरिष्ठ उपाध्यक्ष राजु खड्का, होन्डा शोरुमका प्रतिनिधि सक्सेस भट्टराई, होटल सञ्चालकका अभिभावक लगायतको उपस्थिति रहेको थियो।
असाेज १३, दमक / दमकस्थित न्यु नेपाल सुनचाँदी पसलका सञ्चालक प्रेमराज नेपालले ट्राफिक प्रहरी कार्यालय दमकलाई २० हजार बराबरको सिरक सहयोग गर्नुभएको छ।
भदौ २३ र २४ गते भएको जेन्जी आन्दोलनका क्रममा ट्राफिक प्रहरी कार्यालयसहितका विभिन्न सरकारी कार्यालय जलेर ध्वस्त भएका थिए। कार्यालयलाई पुनः पूर्ण रुपमा स्थापना गर्ने उद्देश्यले यो सहयोग गरिएको सञ्चालक नेपालले जानकारी दिनुभयो।
दशैँको फूलपानीको अवसर पारेर आयोजित कार्यक्रममा ट्राफिक प्रहरीलाई खादामाला लगाएर स्वागत पनि गरिएको थियो। कार्यक्रममा प्रमुख अतिथि रहनुभएका दमक उद्योग वाणिज्य सङ्घका वरिष्ठ उपाध्यक्ष राजु खड्काले आन्दोलनपछि कार्यालयमा केही पनि नरहेको र स्थानीयस्तरको पहलमा पुनर्निर्माणको काम सम्पन्न हुन लागेको उल्लेख गर्नुभयो।
त्यस्तै, ट्राफिक प्रहरी कार्यालय दमकका प्रमुख विजय राईले आन्दोलनका कारण ड्युटी गर्न असहज वातावरण सिर्जना भए पनि यस्ता सहयोगहरूले आगामी दिनमा सहज कार्यसम्पादनमा टेवा पुग्ने बताउनुभयो।
कार्यक्रम सञ्चालन पूर्व प्रहरी मोहनकुमार बोगटीले गर्नुभएको थियो। कार्यक्रममा २० हजार बराबरका ११ थान सिरक वितरण गरिएको थियो। साथै ओम लक्ष्मी ज्वेलरीका सञ्चालक सीताराम नेपालको पनि उपस्थिति रहेको थियो।
असाेज १२ , दमक / दमकस्थित पुरानो अस्पताल लाइफलाइन अस्पतालमा सञ्चालन भइरहेको डायलासिस सेवालाई विस्तार गरिएको छ। रोटरी क्लब अफ दमकको सहकार्यमा सञ्चालित डायलासिस सेवामा थप ४ वटा बेड थपिएसँगै अब १० बेडबाट नियमित सेवा सञ्चालन हुने भएको छ।
अस्पताल तथा स्वास्थ्य विज्ञान प्रतिष्ठानका अध्यक्ष बालचन्द्र सुब्बाको अध्यक्षतामा आयोजित कार्यक्रममा दमक नगर प्रमुख राम थापाले विस्तारित डायलासिस सेवा उद्घाटन गर्नुभयो। उनले बिरामीहरूको बढ्दो मागअनुसार सेवा थपिएको उल्लेख गर्दै आगामी दिनमा पनि आवश्यकताअनुसार अस्पतालका सेवाहरू विस्तार गरिने बताए।
कार्यक्रममा शुभकामना दिँदै रोटरी क्लब अफ दमकका अध्यक्ष केशव अग्रवालले डायलासिस सेवाको गुणस्तर वृद्धिका लागि क्लब निरन्तर सहकार्य गर्ने प्रतिबद्धता व्यक्त गर्नुभयो।
सो अवसरमा लाइफलाइन अस्पताल सञ्चालक समिति सदस्य तथा लाइफलाइन कलेज व्यवस्थापन समितिका अध्यक्ष डाक्टर सूर्यनारायण शाह, दमक अस्पतालका मेडिकल सुपरिटेन्डेन्ट डाक्टर कृष्ण शाह, आमदा अस्पतालका मेडिकल सुपरिटेन्डेन्ट डाक्टर शिखर कटेल लगायतले शुभकामना मन्तव्य राख्नुभएको थियो।
कार्यक्रममा दमक नगरपालिका वडा नम्बर ७ का वडाध्यक्ष भीमप्रसाद पौडेल, दमक नगर प्रहरी प्रमुख रुद्रजङ कार्की लगायतको उपस्थिति रहेको थियो।
असाेज ११, दमक / झापाको दमकमा टोलस्तरीय क्लबहरूबीच आयोजित हाजिरी जवाफ र श्रुतिलेखन प्रतियोगिताको पुरस्कार वितरण कार्यक्रम सम्पन्न भएको छ।
शनिबार दमक नगरपालिका वडा नम्बर ७ को सभाहलमा आयोजित कार्यक्रममा वडा बाल सञ्जालको आयोजनामा र वडा कार्यालयको सहकार्यमा प्रतियोगिता सम्पन्न गरिएको हो।
श्रुतिलेखन प्रतियोगितामा नव सिर्जना टोल विकास संस्थाले प्रथम, पञ्चमुखी टोल विकास संस्थाले द्वितीय र क्षितिज टोल विकास संस्थाले तृतीय स्थान हासिल गरेका छन्। त्यस्तै, हाजिरी जवाफ प्रतियोगितामा आत्मा ज्ञान टोल विकास संस्थाले प्रथम, पञ्चमुखी टोल विकास संस्थाले द्वितीय र क्षितिज टोल विकास संस्थाले तृतीय स्थान प्राप्त गरेका छन्।
कार्यक्रमका प्रमुख अतिथि वडा नम्बर ७ का वडाध्यक्ष भीमप्रसाद पौडेलले भौतिक संरचना मात्र नभई सामाजिक, शैक्षिक तथा बौद्धिक गतिविधिहरू पनि उतिकै आवश्यक रहेको बताउनुभयो। कार्यक्रममा वडा सदस्य मानबहादुर गुरुङ, तारा रणपहेली, वडा सचिव योगेश भट्टराईसहित टोल विकास संस्थाका अध्यक्षहरूको सहभागिता रहेको थियो।
दमक नगरपालिका वडा नम्बर ७ बाल क्लबकी अध्यक्ष सुवेक्षा बिमलीको अध्यक्षतामा कार्यक्रम सम्पन्न भएको हो।
असाेज ११, दमक । दमक नमुना ब्याडमिन्टन एकेडेमीको आन्तरिक ब्याडमिन्टन प्रतियोगिता २०८२ तथा शुभकामना आदानप्रदान कार्यक्रम सम्पन्न भएको छ ।
असोज १० र ११ गते दुई दिन एकेडेमीको हलमा सञ्चालित प्रतियोगिता दुई क्याटोगोरीमा सम्पन्न भएको थियो । ए र बि मिक्स फाइनल खेलमा कुशल बस्नेत र कविध्वज राईको जोडीले दिल कुमार आचार्य र रोशन कालिकोटेको जोडीलाई २१-१९ र २१-१४ को सोझो सेटमा पराजित गर्दै उपाधि हात पारेको हो । सेमिफाइनल खेलमा विजेता टिमले सुदेन राई र डम्बर तुम्रोकको जोडीलाई १४-२१, २१-१३ र २५-२३ को सेटमा जित्दै ङ फाइनल प्रवेश गरेको थियो । यसैगरी उपविजेता टिमले पुष्पराज पाण्डे र सुवास राईको जोडीलाई २१-१२ र २१-११ को सोझो सेटमा हराएको थियो ।
आजै सम्पन्न अर्को सि र डि मिक्सको फाइनल खेलमा मनु चाम्लिङ र दिपक मगरको जोडी च्याम्पियन बन्यो । उनीहरुले नरेश तामाङ र दिलु सुब्बाको जोडीलाई फाइनलमा २१-१२ र २१-१३ को सोझो सेटमा पाखा लगाएको थियो । सेमिफाइनलमा विजेताले रमेश राई र दिपक अधिकारीलाई २१-१४ र २१-७ को सेटमा हराएको थियो भने उपविजेताले निराजन श्रेष्ठ र ज्ञानु लिम्बूलाई २१-१९ र २१-१६ को सेटमा हराउदै उपाधि भिडन्त पक्का गरेको थियो ।
‘समाज विकाससँगै खेलकुदमा व्यावसायिकता, स्वास्थ्यको लागि राष्ट्रको लागि खेलकुद आजको आवश्यकता’ भन्ने मूल नाराका आयोजना गरिएको प्रतियोगिताको राइजिङ प्लेयरको उपाधि विगेन बस्नेत र आर्यन नेपालीले पाए ।
यसका साथै दशैं तिहारको अवसरमा गरिएको शुभकामना आदानप्रदान कार्यक्रममा प्रमुख अतिथि दमक नगर प्रमुख राम थापा, अतिथि दमक ७ वडा अध्यक्ष भिम पौडेल, इलामको चुलाचुली गाउँपालिकाका प्रमुख प्रशासकीय अधिकृत विकास बिक लगायतले शुभकामना मन्तव्य राखेका थिए ।
कार्यक्रममा विभिन्न खेलकुद समितिका पदाधिकारी तथा सदस्य, ब्याडमिन्टन संघका पदाधिकारी तथा सदस्यहरु सहितको उपस्थिति रहेको थियो ।
असाेज ११, दमक / इलाका प्रहरी कार्यालय पुनर्निर्माणको महान् उद्देश्यलाई साथ दिँदै विभिन्न संघ–संस्थाहरूबाट सहयोग जारी छ। यसै क्रममा एक्टिभ आइरन दमक र उर्लाबारीका सञ्चालक तथा राष्ट्रिय स्वतन्त्र पार्टी दमक नगर अध्यक्ष सामाजिक व्यक्तित्व तीर्थ लामिछानेले रु. ५१,०००/- को चेक हस्तान्तरण गर्नुभएको छ।
दमक नगरपालिकाले गठन गरेको पुनर्निर्माण समितिका अध्यक्ष एवं नगर प्रमुख रामकुमार थापा, दमक उद्योग वाणिज्य सङ्घका अध्यक्ष तथा समितिका कोषाध्यक्ष गोपाल गुरागाई र इलाका प्रहरी कार्यालय दमकका प्रमुख राम तिमल्सिनालाई उक्त सहयोग हस्तान्तरण गरिएको हो।
यससँगै लामिछानेले ट्राफिक प्रहरी कार्यालयका लागि पनि एउटा ढोका प्रदान गरी योगदान गर्नुभएको छ।
प्रहरी प्रशासनको सुदृढीकरण र शान्ति–सुरक्षाको संवर्द्धनमा लामिछानेले गरेको यो सह्रदय सहयोग सामाजिक उत्तरदायित्व र समर्पणको उज्ज्वल उदाहरण बनेको समितिले जनाएको छ।