असोज २६ , काठमाडौँ / बिराटनगर किंग्सले कोशी प्रदेश क्रिकेट संघको सहकार्यमा आयोजना गरेको DREAM TO PLAY प्रतियोगिता हिजोबाट सुरु भएको छ। मेची बहुमुखी क्याम्पसको खेल मैदानमा सम्पन्न पहिलो दिनका खेलहरूमा सुनसरी र मोरंगले विजयी सुरुवात गर्दै दुई दुई अंक जोडेका छन्।
प्रतियोगिताको उद्घाटन खेलमा मोरंगले उदयपुरलाई ५६ रनले पराजित गरेको थियो। पहिलो ब्याटिंग गर्न उत्रिएको मोरंगले ओपनर अनिश राजबंशीको ३२ रनको मद्धतले निर्धारित २० ओभरमा ८ विकेट गुमाउँदै ९२ रन बनायो। ९३ रनको लक्ष्य पछ्याउने क्रममा उदयपुर केवल १४ ओभरमा ३६ रनको न्यून योगफलमा समेटियो। खेलमा पाँच विकेट प्राप्त गरेका उदयपुरका सुयोग कार्की प्लेयर अफ द म्याच चुनिएका थिए।
त्यस्तै, दिनको दोस्रो खेलमा सुनसरीले इलामलाई ३७ रनले पराजित गर्यो। प्लेयर अफ द म्याच समेत चुनिएका ओपनर आकाश सर्राफको ३१ बलमा ४५ रनको विष्फोटक पारी र अन्तिममा समिर तिम्सिनाले जोडेको ३१ रनको मद्धतले सुनसरीले निर्धारित २० ओभरमा ११८ रनको योगफल तयार पारेको थियो। जवाफी ब्याटिंगमा उत्रिएको इलामले २० ओभरमा केवल ८१ रन मात्र जोड्न सक्यो।
कोशी प्रदेशका झापा, मोरंग, सुनसरी, उदयपुर र इलाम गरी पाँच जिल्लाका अण्डर-२३ टिमहरूले एक आपसमा प्रतिष्पर्धा गर्ने यस क्रिकेट प्रतियोगिता मार्फत् उदयीमान खेलाडीहरूलाई उत्कृष्ट खेलकौशल प्रदर्शन गर्ने र आफ्नो क्रिकेट सपनालाई साकार बनाउने प्लेटफर्म मिल्ने आयोजकको विश्वास छ। प्रतियोगितामा उच्च प्रदर्शन गर्ने युवा खेलाडीहरूले बिराटनगर किंग्सको डेभलपमेन्ट स्क्वाडमा स्थान पक्का गर्ने छन् भने उनीहरूले टिमसँगै अभ्यासमा सहभागी हुने, कौशलको विकास गर्ने र व्यवसायिक खेल जीवन अगाडी बढाउने विभिन्न अवसरहरू प्राप्त गर्ने छन्। योसँगै, डेभलपमेन्ट स्क्वाडमा छानिएका मध्ये एकजना खेलाडीले आसन्न नेपाल प्रिमियर लिग (एनपीएल) मा बिराटनगर किंग्सको मुख्य स्क्वाडमा स्थान बनाउने विशेष अवसर प्राप्त गर्ने छन्।
