दमक पशुहाटको नालीभित्र अज्ञात पुरुषको शव फेला

झापा, असोज २४। झापाको दमक–७ स्थित पशुहाट परिसरभित्र एक अज्ञात पुरुषको शव फेला परेको छ। शुक्रबार बिहान स्थानीय बासिन्दाले टिनको छानो भएको पशु राख्ने टहरामा गाईवस्तुले पानी खाने नालीभित्र शव देखेपछि प्रहरीलाई खबर गरेका थिए।

इलाका प्रहरी कार्यालय दमकका अनुसार मृतक करिब ५० देखि ५५ वर्ष उमेर समूहका पुरुष हुन्, तर हालसम्म उनको पहिचान खुल्न सकेको छैन। जिल्ला प्रहरी कार्यालय झापाका अनुसार मृतकको दाहिने गालामा धारिलो हतियार प्रहार गरिएको जस्तो देखिएको छ।

घटनाको प्रकृति र कारणबारे प्रहरीले थप अनुसन्धान सुरु गरेको जनाएको छ। शव परीक्षणका लागि दमक अस्पताल ल्याइएको छ भने घटनास्थलमा प्रहरी टोली पुगेर आवश्यक कानुनी प्रक्रिया अघि बढाइएको प्रहरीले जनाएको छ।