झापामा १३ वर्षीया बालिकामाथि जबरजस्ती करणी गर्ने युवक पक्राउ

झापा, असोज २४ — झापामा १३ वर्षीया बालिकालाई जबरजस्ती करणी गरेको आरोपमा एक युवक पक्राउ परेका छन्। पक्राउ पर्नेमा गौरादह नगरपालिका–५, कटकपुर निवासी १८ वर्षीय राघव धमला रहेका छन्।

प्रहरीका अनुसार उनले गत चैत २५ गते आफ्नै घर नजिकको बाँसघारीमा १३ वर्षीया बालिकालाई डर र त्रास देखाई जबरजस्ती करणी गरेका थिए। पीडित बालिका गर्भवती भएपछि घटना सार्वजनिक भएको बताइएको छ।

पीडितकी आमाले इलाका प्रहरी कार्यालय झिलझिलमा उजुरी दिएपछि प्रहरी टोलीले धमलालाई नियन्त्रणमा लिएको हो। हाल उनलाई इलाका प्रहरी कार्यालय झिलझिलमा राखी अनुसन्धान भइरहेको प्रहरीले जनाएको छ।

प्रहरीले घटनाबारे थप विवरण संकलन गर्दै आवश्यक कानुनी प्रक्रिया अघि बढाइरहेको छ।