दमक, भदौ ९ – झापा दमकमा प्राविधिक र सिपमूलक स्नातक तहका नयाँ शैक्षिक कार्यक्रम सञ्चालन हुने भएका छन्। आस्था कलेज दमक, नमुना कलेज इटहरी र अर्किड इन्टरनेशनल कलेज काठमाडौंको संयुक्त व्यवस्थापनमा “युनिर्भसल कलेज अफ टेक्नोलोजी एण्ड म्यानेजमेन्ट” संचालनमा आउने भएको हो।
कलेजले यस वर्षदेखि त्रिभुवन विश्वविद्यालय (T.U) सँग सम्बन्धन प्राप्त B.I.T (Bachelor in Information Technology) र B.H.M (Bachelor in Hotel Management) कार्यक्रम सञ्चालन गर्ने जानकारी आज पत्रकार सम्मेलनमार्फत दिइएको हो।

आस्था कलेजका कार्यकारी निर्देशक टेकनाथ भण्डारीका अनुसार, “यस क्षेत्रका विद्यार्थीलाई गुणस्तरीय प्राविधिक शिक्षा प्राप्त गर्न अब काठमाडौं धाउनुपर्ने बाध्यता हटेको छ। घरमै बस्दै अन्तर्राष्ट्रिय स्तरको प्राविधिक शिक्षा लिन सहज हुनेछ।”
चार वर्षे आठ सेमेष्टरमा सञ्चालन हुने यी कार्यक्रमअन्तर्गत Non-credit कोर्सहरू पनि थपिनेछन्, जसले विद्यार्थीलाई करियरमा थप प्रतिस्पर्धी बनाउन सहयोग गर्ने बताइएको छ। साथै, विद्यार्थीहरूले पढ्दापढ्दै कमाउने अवसर पाउने र राष्ट्रिय तथा अन्तर्राष्ट्रिय स्तरमा इण्टर्नशिप को सुविधा प्राप्त गर्नेछन्।

यसैबीच T.U ले B.I.T र B.H.M कार्यक्रमका लागि CMAT फारम भर्ने म्याद भदौ १३ गतेसम्म तोकेको छ भने प्रवेश परीक्षा भदौ २१ गते हुने तय भएको छ। फारम भर्ने विद्यार्थीका लागि बिहान ७ बजेबाट आस्था कलेज दमकमा निःशुल्क तयारी कक्षा सुरु भइसकेको कलेजले जनाएको छ।

आस्था कलेज अफ म्यानेजमेन्टले विगत दुई दशकदेखि कोसी प्रदेशमा उत्कृष्ट नतिजा निकाल्दै आएको छ। कलेजमा हालै शैक्षिक सत्र २०८२ का लागि BBS प्रथम वर्षमा पनि भर्ना खुला गरिएको र नियमित पठनपाठन सुरु भएको जानकारी दिइएको छ।