वैशाख ९, दमक / झापाको दमकबाट प्रकाशन हुँदै आएको झापा पोष्ट दैनिक र किङ मिडिया ग्रुप प्रालिद्वारा सञ्चालित रेडियो किङ एफएम आजदेखि औपचारिक रूपमा एउटै स्वामित्वमा सञ्चालनमा आएका छन् ।
बुधबार आयोजित ‘मिडिया एकता — नयाँ दिशा’ संयुक्त घोषणा कार्यक्रममार्फत दुवै सञ्चारमाध्यमको एकीकरण तथा संयुक्त सञ्चालनबारे जानकारी गराइएको हो । दुवै सञ्चारमाध्यम किङ मिडिया ग्रुप प्रालि अन्तर्गत सञ्चालन हुनेछन् । संस्थाको अध्यक्षमा अनिल सुबेदी र प्रबन्ध निर्देशकमा मिलन आचार्य रहने जनाइएको छ ।
कार्यक्रमका प्रमुख अतिथि दमक नगरपालिकाका प्रमुख रामकुमार थापाले सञ्चारमाध्यमले व्यवसायिक पत्रकारितामा विशेष ध्यान दिनुपर्नेमा जोड दिए । उनले पछिल्लो समय तथ्यगत समाचारको अभाव देखिएको उल्लेख गर्दै सत्य र विश्वसनीय समाचार प्रकाशनमार्फत मात्र पत्रकारिताको विश्वसनीयता जोगाउन सकिने बताए । सञ्चार क्षेत्रले विभिन्न चुनौती सामना गरिरहेको उल्लेख गर्दै उनले नगरपालिकाको तर्फबाट आवश्यक सहयोग रहने प्रतिबद्धता पनि व्यक्त गरे ।
त्यस्तै, नेपाल पत्रकार महासंघ झापाका उपाध्यक्ष सुब्रत न्यौपानेले झापा पोष्ट दैनिक पछिल्लो समयमा पाठकको रोजाईमा पर्दे गएको र अब रेडियो किङ एफ एम संगको समायोजमा सूचना प्रदानमा थप टेवा पुग्ने बताए ।
उनले पछिल्लो समय सञ्चारमाध्यम धरायसी बन्दै गएको अबस्थामा मिडिया एकिकरण नयाँ उदाहरण बनेको बताए । यसले सूचना प्रबाहको भूमिकामा ससक्त योगदान पु¥याउने दाबी गर्दै आर्थिक भारलाई समेत केहि हदसम्म सहयोग पु¥याउने उल्लेख गरे ।
दमक उद्योग वाणिज्य संघका अध्यक्ष गोपाल गुरागाईंले वर्तमान अवस्थामा व्यवसाय क्षेत्र कमजोर बन्दै गएको उल्लेख गर्दै सञ्चारमाध्यम पनि त्यसबाट प्रभावित भएको बताए । उनले कठिनाइका बाबजुद सञ्चारमाध्यमले आफ्नो व्यवसायिक धर्म र जिम्मेवारीबाट विचलित नहुन जोड दिदै किङ मिडिया ग्रुपले सत्य तथ्य समाचार प्रकाशन र प्रसारण गर्नेमा बिश्वस्त रहेको उल्लेख गरे । सस्थाका अध्यक्ष अनिल सुबेदीले पछिल्लो समयमा गलत र भ्रम सूचनाको बाढी आईरहेको अवस्थामा सत्य र निष्पक्ष समाचार प्रकासन र प्रसारणमा जोड दिने बताउदै छापा पत्रकारीता र रेडियोमार्फत आम नागरिकका आवाज सधै प्राथमिकतामा पर्ने स्पष्ट पारे ।
यस्तै प्रबन्ध निर्देशक मिलन आचार्यले समाजमा रहेको बिकृति र बिसंगतीका बिरुद्धमा हिजो पनि उठाईदै आएको बताउदै भोलिका दिनमा थप जिम्मेवारीका साथ पत्रकारीतामा जोड दिने बताए । संस्थाका अध्यक्ष अनिल सुबेदीको अध्यक्षतामा सम्पन्न कार्यक्रममा प्रमुख अतिथि दमक नगरपालिका प्रमुख रामकुमार थापा रहेका थिए भने कार्यक्रम सञ्चालन बिमल लामिछानेले गरेका थिए ।
कार्यक्रममा नेपाल पत्रकार महासंघका कार्यसमिति सदस्य मनकुमार गदाल, राष्ट्रिय स्वतन्त्र पार्टी झापा क्षेत्र नम्बर ५ का सभापति भेषराज भट्टराई, राप्रपा दमक नगर सभापति हेम सुबेदी, प्याब्सन दमक नगर अध्यक्ष नवीन योगीलगायत विभिन्न सामाजिक संघसंस्थाका प्रतिनिधि तथा सञ्चारकर्मीहरूको उपस्थिति रहेको थियो ।