दमक, ३० भदौ / सोमबार साँझ ४ बजे बसेको दमक नगरपालिका कार्यपालिकाको आकस्मिक बैठकले हालसालै भएको जेनजी प्रदर्शन र त्यस क्रममा भएका घटना–दुर्घटनालाई लिएर पाँच बुँदे निर्णय गरेको छ।
बैठकले प्रदर्शनका क्रममा सहादत प्राप्त गर्ने सहिदहरूलाई श्रद्धाञ्जली अर्पण गर्दै घाइतेहरूलाई शीघ्र स्वास्थ्यलाभको कामना गरेको छ। साथै, आन्दोलनको क्रममा सार्वजनिक वा व्यक्तिगत सम्पत्तिमा आगजनी, लुटपाटजस्ता अवाञ्छित गतिविधि गर्ने जो–कोहीलाई नेपाल सरकारबाट कडा कारबाहीको माग गर्ने निर्णय गरेको छ।
नगरपालिकाले भोलि ३१ गतेदेखि वडा कार्यालय र स्वास्थ्य क्षेत्रका सम्भव हुने सबै सेवाप्रवाह निरन्तर गर्ने तथा सामुदायिक, निजी र आवासीय विद्यालयहरूमा पठनपाठन सञ्चालन गर्ने व्यवस्था मिलाउने निर्णय गरेको छ।
शान्ति–सुरक्षाको लागि इलाका प्रहरी कार्यालय, ट्राफिक प्रहरी, बाखोर चौकी र बेलडाँगीस्थित सशस्त्र प्रहरी क्याम्पलाई थप सशक्त बनाउन र नगरवासीलाई सुरक्षित वातावरण दिन नेपाल सरकारसँग अनुरोध गर्ने निर्णय बैठकले गरेको छ। यस्तै, सरकारी सुरक्षा व्यवस्थामा ढिलाइ भएमा प्रत्येक टोलमा टोल विकास समितिले वडा कार्यालयसँग समन्वय गरी गस्ती व्यवस्था मिलाउने व्यवस्था गर्न भनिएको छ।
बैठकले संक्रमणकालीन अवस्थामा कालोबजारी वा कृत्रिम अभाव सिर्जना नगर्न आग्रह गर्दै त्यस्तो गतिविधि भेटिए कानुनअनुसार कारबाही गरिने चेतावनी दिएको छ। साथै, आन्दोलनका क्रममा भएको सरकारी, संस्थागत र व्यक्तिगत सम्पत्तिको हानीनोक्सानी कानुनी रूपमा मुजुल्का गर्न सम्बन्धित निकायलाई अनुरोध गरेको छ।
