झापा, कमल । पहिलो पाइला नेपाल प्रस्तावित कमल शाखाकी संयोजक सन्जु निरौलाले आफ्नो जन्मदिनको अवसरलाई सामाजिक सेवासँग जोड्दै उदाहरणीय कार्य गरेकी छन्। उनले कमल गाउँपालिकास्थित मङ्गलमय माध्यमिक विद्यालयका विपन्न तथा जेहेन्दार १५ जना विद्यार्थीलाई झोला, कापी, कलम लगायत विभिन्न शैक्षिक सामग्री वितरण गरेकी हुन्।
जन्मदिनलाई केवल व्यक्तिगत उत्सवमा सीमित नराखी समाजका आवश्यकता भएका बालबालिकाको अनुहारमा मुस्कान ल्याउने उद्देश्यले उक्त सहयोग गरिएको बताइएको छ। शैक्षिक सामग्री पाएपछि विद्यार्थीहरू निकै उत्साहित देखिएका थिए भने यसले उनीहरूमा पढाइप्रति थप हौसला मिलेको विद्यालयले जनाएको छ।
सन्जु निरौलाले समाज परिवर्तनका लागि सानो सहयोगले पनि ठूलो अर्थ राख्ने बताउँदै आगामी दिनमा पनि सामाजिक तथा मानवीय कार्यलाई निरन्तरता दिने प्रतिबद्धता व्यक्त गरिन्। पहिलो पाइला नेपालले विगतदेखि नै शिक्षा, स्वास्थ्य, सामाजिक सेवा तथा विपन्न समुदायको सहयोगमा विभिन्न कार्यक्रम सञ्चालन गर्दै आएको छ। जन्मदिनको अवसरमा गरिएको यस सहयोगले समाजमा सकारात्मक सन्देश प्रवाह गर्नुका साथै अन्य व्यक्तिलाई पनि सामाजिक कार्यमा प्रेरित गर्ने विश्वास लिइएको छ।
कमल गाउँपालिका उपाध्यक्ष प्रमिला न्यौपाने तिवारीको प्रमुख आतिथ्यतामा सम्पन्न कार्यक्रममा विद्यालयका प्रधानाध्यापक मोहन बगाले, सामाजिक व्यक्तित्व टीका सापकोटा, पहिलो पाइला दमकका अध्यक्ष राजु निरौला, केन्द्रीय कोषाध्यक्ष दिवस खतिवडा, जीवनचक्र समाजका अध्यक्ष गणेश गौतम, गणेश प्रधान, त्रिलोचन अधिकारी, अभिभावक, विद्यार्थी तथा पहिलो पाइला नेपालका सदस्य एवं पदाधिकारीहरूको उपस्थिति रहेको थियो।
