दमक, २४ माघ / झापाको कमल गाउँपालिका–५ स्थित नेपाल रेडक्रस सोसाइटी कमल उपशाखाले रेडक्रस अभियानका जन्मदाता जाँ हेनरी ड्यूनाँको अर्धकद प्रतिमा अनावरण गरेको छ।
रेडक्रस भवन परिसरमा निर्माण गरिएको प्रतिमाको शनिबार कमल गाउँपालिकाका अध्यक्ष हुकुमसिंह राईले अनावरण गर्नुभयो। सो अवसरमा प्रतिमा निर्माणमा सहयोग पुर्याउने दाता कमल–६ निवासी विवेक मिश्रसहित अन्य दाताहरुलाई सम्मान तथा मायाको चिनो प्रदान गरिएको थियो। हाल अमेरिकामा बसोबास गर्दै आउनु भएका मिश्रले प्रतिमा निर्माणका लागि रु ५० हजार ५ सहयोग गर्नुभएको हो।
त्यसैगरी, सुम्निमा कृषि सहकारी संस्थाले सामाजिक उत्तरदायित्व अन्तर्गत रेडक्रस कमल उपशाखालाई रु १० हजारको चेक हस्तान्तरण गरेको छ। उक्त चेक सहकारीका उपाध्यक्ष पदम उप्रेतीले प्रदान गर्नुभएको थियो।
रेडक्रस कमल उपशाखाका सभापति चन्द्र साहको अध्यक्षतामा सम्पन्न कार्यक्रममा रेडक्रसका आजीवन सदस्य तथा शुभेच्छुकहरुको सहयोगबाट प्रतिमा निर्माण गरिएको सचिव पारसमणि राईले जानकारी दिनुभयो।
कार्यक्रममा नेपाल रेडक्रस सोसाइटी झापा जिल्ला शाखाका सभापति लोकराज ढकाल, रेडक्रस बुद्धशान्ति उपशाखाका सचिव टेकप्रसाद निरौला लगायत वक्ताहरुले छोटो समयमै रेडक्रस कमल उपशाखाले गरेका सामाजिक कार्य प्रशंसनीय रहेको उल्लेख गर्नुभएको थियो।
कार्यक्रममा रेडक्रस कमल उपशाखाकी उपसभापति नरमाया तामाङले स्वागत मन्तव्य राख्नुभएको थियो। कार्यक्रममा जिल्लाका रेडक्रस पदाधिकारी, स्वास्थ्यकर्मी, सामाजिक अगुवा तथा जनप्रतिनिधिहरुको उपस्थिति रहेको थियो।
