फागुन १५, दमक / सर्वोदय बोर्डिङ स्कुल दमकमा वार्षिक सांस्कृतिक तथा पुरस्कार वितरण कार्यक्रम भव्य रूपमा सम्पन्न भएको छ। विद्यालय परिसरमा आयोजित कार्यक्रममा विद्यार्थी, अभिभावक, शिक्षक तथा सरोकारवालाहरूको उल्लेख्य उपस्थिति रहेको थियो।
विद्यालयका अध्यक्ष अनिल सुवेदीको अध्यक्षतामा सम्पन्न कार्यक्रमको उद्घाटन प्रमुख अतिथि राम थापाले गर्नुभएको थियो। कार्यक्रममा बोल्दै नगर प्रमुख थापाले शिक्षाले समाजको समग्र विकासमा महत्वपूर्ण भूमिका खेल्ने उल्लेख गर्दै विद्यालयको निरन्तर प्रगतिप्रति शुभकामना व्यक्त गर्नुभयो। उहाँले गुणस्तरीय शिक्षा, अनुशासन र सिर्जनशीलतामा जोड दिनुपर्ने आवश्यकता औंल्याउनुभयो। दक्ष नागरिक उत्पादनमा निजी क्षेत्रको उल्लेख्य भूमिका रहेको बताउँदै नगर प्रमुख थापाले आवश्यक सहजीकरणका लागि नगरपालिका तयार रहेको धारणा राख्नुभयो।
स्वागत मन्तव्य राख्दै विद्यालयका प्रिन्सिपल नवीन योगीले अभिभावकहरूको निरन्तर सहयोग, शिक्षकहरूको प्रतिबद्धता र विद्यार्थीहरूको मेहनतकै कारण विद्यालय शैक्षिक तथा अतिरिक्त क्रियाकलापमा उत्कृष्ट बन्दै गएको बताउनुभयो। उहाँले आगामी दिनमा पनि व्यवहारिक, प्रविधिमैत्री र प्रतिस्पर्धात्मक शिक्षा प्रदान गर्न विद्यालय प्रतिबद्ध रहने जानकारी दिनुभयो।
वार्षिक कार्यक्रम अन्तर्गत ‘सर्वोदय गड ट्यालेन्ट’ शीर्षकमा गायन तथा नृत्य प्रतियोगिता आयोजना गरिएको थियो। कार्यक्रममा विद्यार्थीहरूले विविध प्रतिभा प्रस्तुत गर्दै दर्शकको मन जित्न सफल भएका थिए। साथै फुड फेस्टिवल, साइन्स एक्जिबिसन, नाटक, सांस्कृतिक नृत्य तथा विभिन्न सृजनात्मक प्रस्तुति प्रदर्शन गरिएको थियो।
कार्यक्रमको अन्त्यमा शैक्षिक, अतिरिक्त क्रियाकलाप तथा विभिन्न प्रतियोगितामा उत्कृष्ट हुने विद्यार्थीहरूलाई पुरस्कार तथा प्रमाणपत्र वितरण गरिएको थियो। उक्त अवसरमा दुईजना शिक्षकलाई सम्मानसमेत गरिएको विद्यालयले जनाएको छ।
कार्यक्रममा विशिष्ट अतिथिका रूपमा दमक नगरपालिका वडा नम्बर ९ का वडा अध्यक्ष तथा शिक्षा समिति संयोजक कुबेर प्रसाद भट्टराईको पनि उपस्थिति रहेको थियो।
