सुरुङ्गा, माघ २४ । सुरुङ्गा जेसीजको आयोजनामा बहुशाखा संसदीय बैठक प्रक्रिया सम्बन्धी तालिम कार्यक्रम शनिबार सम्पन्न भएको छ। मिति २०८२ माघ २४ गते सुरुङ्गा जेसीजको सभाहलमा सम्पन्न उक्त तालिममा नेपाल जेसीज वर्ष २०१० का राष्ट्रिय अध्यक्ष तथा वर्ष २०११ का जेसीआई उपाध्यक्ष सिनेटर राजु खत्री प्रमुख प्रशिक्षकका रूपमा सहभागी हुनु भएको थियो।
कार्यक्रमका प्रमुख अतिथि नेपाल जेसीज वर्ष २०२६ क्षेत्र ‘क’ का लागि निरुपित राष्ट्रिय कार्यकारिणी उपाध्यक्ष जेसी योगेश राजवंशी रहनु भएको थियो। तालिममा १७ वटा जेसीज शाखाका ७५ जना भन्दा बढी सदस्यहरूको सक्रिय सहभागिता रहेको थियो। तालिमले सहभागीहरूलाई संसदीय प्रक्रिया सम्बन्धी व्यवहारिक ज्ञान, नेतृत्व विकास तथा संस्थागत कार्यकुशलता अभिवृद्धि गर्न उल्लेखनीय योगदान पुर्याएको एक सहभागीले बताएका छन्।
कार्यक्रममा नेपाल जेसीज वर्ष २०२६ का राष्ट्रिय उपाध्यक्षद्वय जेसी देवु बानियाँ र जेसी मेनुका ओली, क्षेत्र ‘क’ का तालिम निर्देशक जेसी लक्ष्मी बराल, जेसीज पूर्व अध्यक्ष समाज झापाका अध्यक्ष जेसी रमेश पोखरेल, विभिन्न शाखाका शाखा अध्यक्षहरू, सुरुङ्गा जेसीजका पूर्व अध्यक्षहरू तथा शाखा पदाधिकारीहरूको उल्लेखनीय उपस्थिति रहेको थियो।
तालिम कार्यक्रमको संयोजन सुरुङ्गा जेसीज वर्ष २०२६ की तालिम निर्देशक जेसी सुस्मिता बाँस्कोटाले गर्नु भएको थियो भने कार्यक्रमको अध्यक्षता सुरुङ्गा जेसीज वर्ष २०२६ की अध्यक्ष जेसी मेनुका उप्रेतीले गर्नु भएको थियो। कार्यक्रम सञ्चालन सुरुङ्गा जेसीज वर्ष २०२६ का महासचिव जेसी जेनिस चम्लागाईंले गर्नु भएको थियो।
