चैत १, दमक / झापाको दमकमा निजी तथा सार्वजनिक विद्यालयका बसहरूमा बढ्दो गुनासोपछि दमक ट्राफिक प्रहरीले कडाइका साथ चेकजाँच सुरु गरेको छ। आइतबार दमकको पशुहाट डाँडामा गरिएको विशेष चेकिङका क्रममा करिब १५ वटा विद्यालय बस जाँच गरिएको थियो।

चेकजाँचका क्रममा चालकको अल्कोहल परीक्षण, सिटको अवस्था तथा विद्यार्थी सुरक्षासम्बन्धी आवश्यक मापदण्डहरूको विशेष निरीक्षण गरिएको ट्राफिक प्रहरीले जनाएको छ। विद्यार्थीहरूले चर्को शुल्क तिरे पनि सुरक्षित र व्यवस्थित यातायात सुविधा नपाएको गुनासो बढेपछि ट्राफिक प्रहरी सक्रिय भएको हो।

दमक ट्राफिक प्रहरी कार्यालयका प्रमुख विजय राईका अनुसार केही विद्यालयका बसहरूले नियम उल्लंघन गरेको पाइएको छ। विशेष गरी झापाको दमकमा रहेको आस्था कलेज र एकता एकेडेमीका विद्यालय बसहरूले सिट क्षमता भन्दा बढी विद्यार्थी बोकेको भेटिएको उहाँले जानकारी दिनुभयो। राईका अनुसार ती बसहरूलाई यसअघि पनि पटकपटक कारबाही गरिएको भए पनि सुधार नदेखिएको र विद्यालय व्यवस्थापन पक्षको गम्भीर कमजोरी समेत देखिएको छ।

“विद्यार्थीको सुरक्षामा कुनै पनि लापरबाही सह्य हुँदैन। नियम पालना नगर्ने विद्यालय बसमाथि निगरानी र आवश्यक कारबाही निरन्तर जारी रहनेछ,” प्रमुख राईले भन्नुभयो। यसैबीच ट्राफिक प्रहरीले चेकिङकै क्रममा विद्यार्थीहरूलाई सडक सुरक्षा तथा बसमा यात्रा गर्दा अपनाउनुपर्ने सावधानीबारे छोटो सचेतना सन्देश समेत दिएको जनाएको छ।