चैत २६, कटहरी / मोरङको कटहरी गाउँपालिका–३ स्थित कटहरी स्वास्थ्य चौकीमा एक दिवसीय प्रजनन स्वास्थ्य सम्बन्धी निःशुल्क स्वास्थ्य शिविर सम्पन्न भएको छ। बिराटनगर नर्सिङ क्याम्पस (बि.एन.एस) दोस्रो वर्षमा अध्ययनरत विद्यार्थीहरूको आयोजनामा शिविर सञ्चालन गरिएको हो।
शिविरमा महिलाहरूमा देखिने आङ्ग खस्ने समस्या, पाठेघरको मुखको क्यान्सर, स्तन क्यान्सर, प्रसव–फिस्टुला तथा निःसन्तानसम्बन्धी समस्याको एकीकृत व्यवस्थापनबारे स्वास्थ्य सेवा प्रदान गरिएको थियो। साथै स्वास्थ्य प्रदर्शनी कार्यक्रम पनि आयोजना गरिएको थियो।
समुदाय स्वास्थ्य नर्सिङ पाठ्यक्रमअन्तर्गत एक महिनाको समुदाय पोस्टिङका क्रममा विद्यार्थीहरूले कटहरी गाउँपालिका–३ का विभिन्न टोलमा सर्वेक्षण गरी संकलित तथ्यांकको प्रस्तुतीकरण समेत गरेका थिए।
कार्यक्रमका प्रमुख अतिथि कटहरी गाउँपालिकाका अध्यक्ष देवराज चौधरीले यस्तो महत्त्वपूर्ण कार्यक्रम आयोजना गरेकोमा धन्यवाद दिँदै आगामी दिनमा पनि सहकार्य गर्न गाउँपालिका तयार रहेको बताए। त्यस्तै, विशिष्ट अतिथि तथा क्याम्पस प्रमुख मेनुका भण्डारीले कार्यक्रमको प्रशंसा गर्दै सहयोगी निकायहरूलाई धन्यवाद ज्ञापन गरिन्। उनले यस्ता कार्यक्रमले समुदायमा स्वास्थ्य सचेतना अभिवृद्धि गर्न महत्वपूर्ण भूमिका खेल्ने बताइन्।
कार्यक्रममा क्याम्पस व्यवस्थापन समिति संयोजक पुनम कुमारी मण्डल, कटहरी गाउँपालिका स्वास्थ्य शाखा प्रमुख सकल शाह, उपाध्यक्ष सीता देवी राजबंशी, वडा नम्बर ३ का अध्यक्ष जदुलाल कामत लगायत विभिन्न शाखाका प्रमुख, कर्मचारी, शिक्षक, महिला स्वयंसेविका, विद्यार्थी तथा सेवाग्राहीहरूको उल्लेखनीय उपस्थिति रहेको थियो।
बि.एन.एस दोस्रो वर्षमा अध्ययनरत सोनी भण्डारीको सभापतित्वमा सम्पन्न कार्यक्रममा स्वागत मन्तव्य आस्मा पाण्डेले राखेकी थिइन् भने कार्यक्रम सञ्चालन जेनिस चम्लागाईंले गरेकी थिइन्।शिविरबाट १५० भन्दा बढी सेवाग्राहीहरूले स्वास्थ्य सेवा लिएको आयोजकले जनाएको छ।
