चैत २८, दमक / ‘साहित्यकास’ कार्यक्रमअन्तर्गत डिपिएल (DPL) दमकको आयोजनामा कवि अमृता स्मृतिको एकल कविता वाचन कार्यक्रम सम्पन्न भएको छ। डिपिएल दमककी अध्यक्ष पूर्णिमा तिम्सिनाको सभापतित्वमा आयोजित उक्त कार्यक्रममा स्थानीय साहित्यकार, पत्रकार तथा साहित्यप्रेमीहरूको उल्लेखनीय सहभागिता रहेको थियो।

कार्यक्रममा कवि अमृता स्मृतिले आफ्ना सशक्त कविताहरू वाचन गर्दै नेपाली समाजमा विद्यमान विभिन्न विकृति र विसङ्गतिहरूलाई मार्मिक ढंगले प्रस्तुत गरिन्। उनका कविताहरू विशेषगरी नारी जीवन, वर्गीय विभेद, प्रेम र सामाजिक यथार्थका विविध आयामहरूमा केन्द्रित थिए।

कार्यक्रमलाई सम्बोधन गर्दै अध्यक्ष तिम्सिनाले युवापुस्तालाई साहित्यसँग जोड्न यस्ता सिर्जनात्मक कार्यक्रमहरूको आवश्यकता औंल्याइन्। साथै उनले समाजमा बढ्दै गएका बेइमानी, ठगी र अन्य विकृतिविरुद्ध साहित्यले सशक्त आवाज उठाउनुपर्ने धारणा व्यक्त गरिन्।

उक्त कार्यक्रममा दमकका विभिन्न साहित्यिक संघसंस्थाका प्रतिनिधि, युवा कवि तथा सञ्चारकर्मीहरूको उपस्थिति रहेको थियो। आयोजकका अनुसार यस्ता कार्यक्रमहरूले दमकलाई साहित्यिक नगरीको रूपमा विकास गर्न थप टेवा पुग्ने विश्वास लिइएको छ।

कवि अमृता स्मृति नेपाली साहित्यमा उदाउँदै गरेको प्रगतिशील र सचेत आवाजका रूपमा चिनिन्छिन्। उनका रचनाहरूमा प्रेम, प्रकृति, सहअस्तित्व र मानवीय संवेदनासँगै लैङ्गिक तथा वर्गीय विभेदजस्ता विषयहरू प्रमुख रूपमा अभिव्यक्त हुने गरेका छन्।