दमक, माघ २८ / पूर्व विद्यार्थीहरूको पहलमा स्थापना गरिएको “बाल्यकालको साथी” संस्थाले आज दमकस्थित पृथ्वी माध्यमिक विद्यालयमा व्यानर अनावरण तथा विद्यालय घण्टीको इलेक्ट्रोनिक डिभाइस उद्घाटन कार्यक्रम सम्पन्न गरेको छ। सो अवसरमा करिब ३० हजार रुपैयाँ बराबरको शैक्षिक सामग्री विद्यालयलाई हस्तान्तरण गरिएको छ।
वि.सं. २०८२ सालमा स्थापना भएको “बाल्यकालको साथी” संस्था विभिन्न क्षेत्र तथा स्थानमा छरिएका बाल्यकालका साथीहरूलाई पुनः एकजुट गर्दै आपसी मित्रता अभिवृद्धि, समाजसेवा, शैक्षिक जागरण तथा सामाजिक क्षेत्रमा सहयोग पुर्याउने उद्देश्यका साथ गठन गरिएको हो। संस्थाका सबै सदस्यहरू पृथ्वी माविका पूर्व विद्यार्थीहरू रहेका छन्।
संस्थाका सचिव विनोद राईले सञ्चालन गर्नुभएको कार्यक्रम राष्ट्रिय गानबाट सुरु भएको थियो। संस्थाका अध्यक्ष चन्दन महतोको सभापतित्वमा सम्पन्न कार्यक्रममा विद्यालय व्यवस्थापन समिति अध्यक्ष मोहन थापा प्रमुख अतिथि रहनुभएको थियो। वडा सदस्य मान बहादुर खवास विशिष्ट अतिथिका रूपमा उपस्थित रहनुभएको थियो। अभिभावक संघका तर्फबाट लाल सुन्दर राई, कराते जिल्ला सदस्य आशिष राई लगायतका अतिथिहरूको पनि उपस्थिति रहेको थियो।
कार्यक्रममा विद्यालयका प्रधानाध्यापक विष्णु राई, विद्यालय व्यवस्थापन समितिका अध्यक्ष मोहन थापा, जनप्रतिनिधि मान बहादुर खवास तथा अभिभावक संघका प्रतिनिधि लाल सुन्दर राईलगायतले शुभकामना मन्तव्य व्यक्त गर्नुभएको थियो। कार्यक्रममा संस्थाको उद्देश्य र आगामी योजनाबारे अध्यक्ष महतोले औचित्य तथा समापन मन्तव्य प्रस्तुत गर्नुभएको थियो।
यसै अवसरमा विद्यालयमा जडान गरिएको इलेक्ट्रोनिक घण्टी प्रणालीको उद्घाटन गरिएको थियो। उक्त प्रणालीले विद्यालय सञ्चालनलाई थप व्यवस्थित, समयमै कक्षा सञ्चालन तथा अनुशासन कायम गर्न सहयोग पुग्ने विश्वास व्यक्त गरिएको छ।
कार्यक्रममा बोल्दै सचिव विनोद राईले “बाल्यकालको साथी” संस्थाले आगामी दिनहरूमा निष्पक्ष रूपमा पिछडिएका वर्ग, विभिन्न विद्यालय तथा गरिब–दुःखीलाई सहयोग गर्ने प्रतिबद्धता व्यक्त गर्नुभयो। संस्थालाई राजनीतिक प्रभावबाट टाढा राख्दै शुद्ध सामाजिक र शैक्षिक सेवामा केन्द्रित रहने उहाँको भनाइ थियो।
कार्यक्रमले पूर्व विद्यार्थीहरूबीचको सम्बन्ध सुदृढ बनाउनुका साथै विद्यालयप्रति उत्तरदायित्व र योगदानको भावना अझ बलियो बनाएको सहभागीहरूले बताएका छन्।
