दमक । झापाको दमकमा कला, साहित्य र संगीतको प्रवर्द्धन गर्ने उद्देश्यले चारदिने सांस्कृतिक उत्सव आयोजना हुने भएको छ। नाता फाउन्डेसनको आयोजनामा कात्तिक १२ देखि १५ गतेसम्म विभिन्न कार्यक्रमसहित उत्सव सञ्चालन हुन लागेको हो।
आयोजकका अनुसार उत्सवअन्तर्गत कात्तिक १२ गते कला प्रदर्शनी तथा उद्घाटन समारोह, १३ गते दमक साहित्य महोत्सव, १४ गते कला कार्यशाला र १५ गते संगीत महोत्सव तथा सम्मान समारोह आयोजना गरिनेछ।
नाता फाउन्डेसनका अध्यक्ष जितेन सम्पाङ राईका अनुसार कला, साहित्य र संगीतको विकास तथा प्रवर्द्धन गर्ने उद्देश्यले कार्यक्रम आयोजना गर्न लागिएको हो। उत्सवका क्रममा विभिन्न विधाका कला, साहित्यिक सिर्जना तथा सांगीतिक प्रस्तुतिहरू समेटिने उहाँले जानकारी दिनुभयो।
उहाँका अनुसार कार्यक्रमले विशेषगरी युवाहरूमा रहेको सिर्जनात्मक प्रतिभा उजागर गर्न, नयाँ सिर्जनालाई प्रोत्साहन गर्न तथा कला, साहित्य र संगीतको क्षेत्रमा क्रियाशील सर्जकलाई आफ्नो प्रतिभा प्रस्तुत गर्ने अवसर प्रदान गर्ने लक्ष्य राखेको छ।
उत्सवले दमकसहित समग्र क्षेत्रको सांस्कृतिक पहिचानलाई थप सशक्त बनाउनुका साथै कला, साहित्य र संगीतप्रेमीबीच सिर्जनात्मक आदानप्रदानको वातावरण निर्माण गर्ने अपेक्षा गरिएको छ।
पाडाजुँङ्गी (कमल)–पृथ्वीनारायण शाहले शुरु गरेको नेपाल एकीकरणदेखि सुगौली सन्धिसम्मको इतिहासलाई समेटेर प्रस्तुत गरिएको चलचित्र ‘वीरताको गाथा’ झापाको कमल गाउँपालिकाबाट प्रदर्शन गरिनेभएको छ ।
वडा दशैं र तिहार लगायतका चार्डपर्वलाई अवसर बनाएर झापाको कमल–२ क्याम्पास्थित कमला–मदन आश्रित माध्यमिक विद्यालयमा (सोमबार) प्रर्दशन गरिनेभएको हो ।
सो चलचित्रका निर्देशक तथा निर्माता रिमेश अधिकारीले पत्रकारहरुसंग भेटघाट गरेर वीरताको गाथा को कथा वस्तु, यसको सन्देश र प्रदर्शनको तयारीका बारेमा जानकारी दिए ।
कमल–५ पाडाजुँङ्गीको रोड स्ट्रार पार्टी प्यालेसस्थित बनमारा क्याफेमा आइतबार चलचित्र वीरताको गाथा निर्माण पक्षले पत्रकार भेटघाट कार्यक्रमको आयोजना गरेको थियो ।
नेपाली सेनाको विशेष सहयोगमा तयार भएको चलचित्रलाई राष्ट्रिय र अन्तराष्ट्रिय स्तरमा प्रदर्शन गरिने निर्देशक तथा निर्माता अधिकारीले जानकारी दिए ।
निर्देशक तथा निर्माता अधिकारीका अनुसार वर्तमान नेपालको एकीकरण र निर्माणमा पृथ्वीनारायण शाहले देखाएको वीरता र सघर्षका कथा वस्तुलाई चलचित्रमा देखाउन खोजिएको हो । त्यस्तैं, पृथ्वीनारायण शाहले राज्यहरु एकीकरण गर्दै सुगौलीसन्धिसम्मको इतिहास चलचित्रको पर्दामा देखाउन प्रयत्न गरिएको अधिकारीले पत्रकारहरुलाई बताए ।
वीरताको गाथामा व्यवसायीक कलाकर्मी समावेश नगरिएको निर्देशक तथा निर्माता अधिकारीले जनाए । पुराना इतिहासका विषयवस्तु भएर हो, व्यवसायीक कलाकारहरु समावेश नगरिएको, अधिकारीले भने–एक घण्टा बढी समयसम्मको चलचित्रलाई मनोरञ्जन बनाउन दुईवटा गीत समावेश गरिएको छ । चलचित्र वीरताको गाथाले हाम्रो भाषा, संस्कति र पर्यट्रनको प्रचार–प्रसार र संरक्षणमा टेवा पुग्ने अधिकारीले बताए ।
२०५७ सालदेखि नेपाली चलचित्र निर्माणमा प्रवेश गरेका अधिकारीले यसअघि नालापानी, बसमा छैन यो मन, तस्वीर, बिरोध लगायतका चलचित्रहरु निर्देशन र निर्माण गरेका छन् ।
अधिकारी झापा कमल गाउँपालिकाका स्थाईवासी हुन् । पत्रकार भेटघाटमा पूर्वशिक्षक एबम् कवि विजय अधिकारी, पत्रकार नारायण वस्नेत लगायत सहभागि थिए ।
दमक। दमकस्थित दमक जेसीजले हरेक वर्ष दसैँ–तिहारको अवसरमा आयोजना गर्दै आएको सप्तमी साँझलाई यस वर्ष पनि निरन्तरता दिएको छ। दमकबासीबीच एकता, सद्भाव र आपसी भाइचाराको भावना अभिवृद्धि गर्ने उद्देश्यले कार्यक्रम आयोजना गरिएको हो।
दमक जेसीजका महासचिव रुवल अधिकारीका अनुसार हरेक वर्षझैँ यस वर्ष पनि विशेष कार्यक्रममार्फत शुभकामना आदानप्रदान गरिएको हो। कार्यक्रममा दसैँ, तिहार, छठलगायत चाडपर्वको शुभकामना साटासाट गर्नुका साथै गीत–संगीत र नृत्यका प्रस्तुतिमार्फत सहभागीलाई मनोरञ्जन प्रदान गरिएको थियो।
दमक जेसीजका अध्यक्ष राजेन्द्र बिमलीको अध्यक्षता तथा दमक नगरपालिकाका प्रमुख रामकुमार थापाको प्रमुख आतिथ्यतामा सम्पन्न कार्यक्रममा नगर उपप्रमुख रेगिना भट्टराई प्रसाईं, दमक उद्योग वाणिज्य संघका अध्यक्ष गोपाल गुरागाईंलगायत विभिन्न राजनीतिक दल, सामाजिक संघसंस्था तथा सरकारी र अर्धसरकारी निकायका प्रमुख तथा प्रतिनिधिहरूको उपस्थिति रहेको थियो।
कार्यक्रममा दमक जेसीजका पूर्वअध्यक्ष, बोर्ड सदस्य तथा जेसीजका सदस्यहरूको समेत सहभागिता रहेको थियो। कार्यक्रमले चाडपर्वका अवसरमा आपसी सम्बन्ध सुदृढ गर्दै सामाजिक एकता र सद्भाव कायम राख्न सहयोग पुग्ने विश्वास आयोजकले लिएको छ।
दमक। झापाको दमक निवासी बाल गायिका आश्मी भट्टराईको स्वरमा रहेको पहिलो गीत तथा म्युजिक भिडियो सार्वजनिक गरिएको छ। संगीतकार तथा गायक विशाल राईले एक संक्षिप्त कार्यक्रमबीच ‘मत सानी नानी……….’ बोलको बालगीत सार्वजनिक गरेका हुन्।
पूर्वाञ्चल मन्टेश्वरी इङ्लिस स्कुलकी छात्रा आश्मी सोही विद्यालयका संस्थापक निर्देशक माधव भट्टराई र प्रिन्सिपल सविता पोखरेलकी सुपुत्री हुन्। उनको पहिलो गीतको रचना संगीत प्रशिक्षक कमला खनालले गरेकी हुन् भने फणिन्द्र राईले संगीत भरेका छन्।
गीत सार्वजनिक कार्यक्रममा प्रमुख अतिथिका रूपमा रहेका संगीतकार तथा गायक विशाल राईले बालबालिका भविष्यका धरोहर भएको उल्लेख गर्दै उनीहरूमा रहेको प्रतिभाको पहिचान, विकास र प्रोत्साहन गर्नुपर्नेमा जोड दिए। उनले गायन प्रतिभालाई स्थापित गर्न गीतका शब्द रचना गर्ने तथा संगीत सिर्जना गर्ने सर्जकहरूको भूमिका पनि उत्तिकै महत्वपूर्ण रहेको बताए।
बालबालिकामा रहेका विशेष प्रतिभा उजागर गर्न अभिभावकको भूमिका महत्वपूर्ण हुने उल्लेख गर्दै राईले प्रतिभाको विकास र प्रवर्द्धनमा समाजको समेत सहयोग आवश्यक रहेको धारणा राखे।
कार्यक्रममा बिहानी कला केन्द्रकी प्रशिक्षक तथा गीतकार कमला खनालले आश्मीको सानै उमेरदेखिको गायनप्रतिको रुचि र सम्भावनाबारे जानकारी गराएकी थिइन्। प्रिन्सिपल सविता पोखरेलको सभापतित्वमा सम्पन्न कार्यक्रममा बाल प्रतिभालाई उचित अवसर, प्रोत्साहन र मार्गदर्शन दिन सके उनीहरूले भविष्यमा नेपाली गीतसंगीत क्षेत्रमा महत्वपूर्ण योगदान पुर्याउन सक्ने विश्वास व्यक्त गरिएको थियो।
आश्मीको पहिलो गीत तथा म्युजिक भिडियो सार्वजनिक भएसँगै उनको सांगीतिक यात्राले औपचारिक सुरुवात गरेको छ।
दमक। नेपाली मौलिक चाडपर्व, धर्म तथा संस्कृतिको संरक्षण र प्रवर्द्धन गर्ने उद्देश्यले दमक जेसीज वर्ष २०२६ ले दमकका दुई टोलमा लिङ्गे पिङ निर्माण गरी सम्बन्धित टोल विकास संस्थालाई हस्तान्तरण गरेको छ।
दमक नगरपालिका वडा नं. ८ स्थित आइतबारे टोल र वडा नं. ९ स्थित शुभबिहानी टोलमा एक–एक थान लिङ्गे पिङ निर्माण गरिएको हो। निर्माण सम्पन्न पिङको शुभारम्भ कार्यक्रमसहित सम्बन्धित टोल विकास संस्थालाई हस्तान्तरण गरिएको दमक जेसीजले जनाएको छ।
दमक जेसीज वर्ष २०२६ का अध्यक्ष जेसी राजेन्द्र बिमलीको अध्यक्षतामा सम्पन्न कार्यक्रममा वडा नं. ८ का वडाध्यक्ष धर्मप्रसाद दाहाल (दिपेश) र वडा नं. ९ का वडाध्यक्ष कुबेरप्रसाद भट्टराईले प्रमुख आतिथ्यता ग्रहण गर्नुभएको थियो।
कार्यक्रममा दमक जेसीज वर्ष २०१० का अध्यक्ष सिनेटर नेत्रप्रसाद चम्लागाईं, शुभबिहानी टोल विकास संस्थाका अध्यक्ष तथा रोटरी क्लब अफ दमकका पूर्वअध्यक्ष सन्दीप चापागाईं (दीपु), आइतबारे टोल विकास संस्थाका अध्यक्ष अमृत निरौला, बालुवाटार टोल विकास संस्थाका अध्यक्ष गणेश चौहान, सिनेटर मैना दाहाललगायत विभिन्न टोल विकास संस्थाका पदाधिकारी, स्थानीयवासी तथा जेसीज सदस्यहरूको उपस्थिति रहेको थियो।
कार्यक्रमको संयोजन दमक जेसीजका कार्यकारिणी उपाध्यक्ष जेसी साजन श्रेष्ठले गर्नुभएको थियो भने सञ्चालन महासचिव जेसी रूबल अधिकारीले गर्नुभएको थियो।
नेपाली चाडपर्वको रौनकलाई समुदायस्तरसम्म पुर्याउने, मौलिक संस्कृति तथा परम्पराको संरक्षण गर्ने र युवाहरूको सामाजिक उत्तरदायित्वलाई उजागर गर्ने उद्देश्यले कार्यक्रम आयोजना गरिएको दमक जेसीजले जनाएको छ। यस कार्यक्रमले स्थानीय समुदायमा चाडपर्वको उत्साह बढाउनुका साथै सामाजिक सद्भाव र जेसीजको सकारात्मक पहिचान स्थापित गर्न सहयोग पुग्ने अपेक्षा गरिएको छ।
दमक । आगामी दशौं राष्ट्रिय खेलकुद प्रतियोगिताका लागि झापामा जिल्लास्तरीय खेलाडी छनोट प्रतियोगिता सम्पन्न भएको छ। झापा जिल्ला खेलकुद विकास समितिको आयोजनामा दमकस्थित नमुना ब्याडमिन्टन हलमा प्रतियोगिता सञ्चालन गरिएको हो।
प्रतियोगिताबाट तौल समूह र पेटर्न विधातर्फ महिला तथा पुरुष खेलाडीहरू छनोट भएका छन्। कार्यक्रमको उद्घाटन दमक नगरपालिका वडा नम्बर ७ का वडाध्यक्ष भीमप्रसाद पौडेलको प्रमुख आतिथ्यमा भएको थियो। कार्यक्रमको अध्यक्षता नवीन तामाङले गरेका थिए।
महिलातर्फ ४०–४५ केजीमा प्रश्ना बेगा, ४५–५० केजीमा सरस्वती आले मगर, ५०–५५ केजीमा रिया लिम्बू, ५५–६० केजीमा हिमांशु थापा मगर, ६०–६५ केजीमा मिस्सी सुब्बा, ६५–७० केजीमा दीक्षा आचार्य र ७० केजीभन्दा माथि सिर्जना राई छनोट भएका छन्।
महिला पेटर्न विधातर्फ स्मारिका श्रेष्ठ (ब्लु बेल्ट), दिलसा राई (रेड बेल्ट), वन्दना श्रेष्ठ (कालो पेटी, पहिलो डान), दीक्षा तामाङ (कालो पेटी, दोस्रो डान) र रेश्मा सावा लिम्बू (कालो पेटी, तेस्रो डान) छनोट भएका छन्।
त्यसैगरी, पुरुषतर्फ ४५–५० केजीमा असल श्रेष्ठ, ५०–५५ केजीमा गगन श्रेष्ठ, ५५–६० केजीमा दीपक खड्का, ६०–६५ केजीमा मिसन श्रेष्ठ, ६५–७० केजीमा प्रीतम धिमाल, ७०–७५ केजीमा विक्रम श्रेष्ठ, ७५–८० केजीमा सक्सेस राई, ८०–८५ केजीमा रोशन मगर र ८५ केजीभन्दा माथिको समूहमा श्याम राई छनोट भएका छन्।
पुरुष पेटर्न विधातर्फ मिलन धामी (ब्लु बेल्ट), रोशन श्रेष्ठ (रातो बेल्ट), रोजेस श्रेष्ठ (कालो पेटी, पहिलो डान), अभिषेक राई (कालो पेटी, दोस्रो डान) र रोहन पौदार (कालो पेटी, तेस्रो डान) छनोट भएका छन्।
जिल्लास्तरीय छनोट प्रतियोगिताबाट छानिएका खेलाडीहरूले आगामी दशौं राष्ट्रिय खेलकुद प्रतियोगितामा सहभागी हुने लक्ष्यसहित आफ्नो खेल कौशल प्रदर्शन गर्ने अवसर पाउनेछन्।
दमक । झापाको कमल गाउँपालिका–५, पाडाजुङ्गीस्थित स्मारिका सामुदायिक बोर्डिङ स्कुलले नेपालीहरूको महान् चाड बडादशैंलाई लक्षित गर्दै विद्यार्थीलाई टीका लगाएर पर्व मनाएको छ।
विद्यालयका प्रधानाध्यापक गुणराज गिरीले विद्यार्थीलाई दशैंको टीका लगाइदिँदै आशीर्वाद प्रदान गर्नुभएको थियो। बालबालिकालाई नेपाली संस्कार, संस्कृति र परम्पराबारे व्यावहारिक ज्ञान प्रदान गर्ने उद्देश्यले विद्यालयले विभिन्न चाडपर्वमा विद्यार्थीको सहभागितामा यस्ता कार्यक्रम आयोजना गर्दै आएको जनाएको छ।
यसैगरी, छठ पर्वको मौलिकता झल्काउने उद्देश्यले विद्यालय परिसरमै पिङ निर्माण गरी पर्वसँग जोडिएका परम्परागत गतिविधिलाई प्रोत्साहन गर्ने काम गरिएको प्रधानाध्यापक गिरीले जानकारी दिनुभयो।
पुस्तकमा मात्र सीमित नराखी व्यवहारबाटै नेपाली संस्कार र संस्कृतिबारे विद्यार्थीलाई जानकारी गराउने उद्देश्यले यस्ता कार्यक्रम सञ्चालन गरिएको विद्यालयले जनाएको छ। यस्ता गतिविधिले नयाँ पुस्तामा नेपाली मौलिक संस्कृति, परम्परा र चाडपर्वप्रतिको महत्व बुझाउन सहयोग पुग्ने अपेक्षा गरिएको छ।
कमल । झापाको कमल गाउँपालिकाका सबै ७ वटै वडामा श्रावण, भाद्र र आश्विन महिनाका आमा समूहका नियमित बैठकहरू सम्पन्न भएका छन्। समुदायस्तरमा महिला, बालबालिका तथा परिवारको स्वास्थ्य, पोषण, सरसफाइ र सामाजिक सचेतना अभिवृद्धि गर्ने उद्देश्यले बैठकहरू सञ्चालन गरिएका हुन्।
कमल गाउँपालिकाको स्वास्थ्य शाखाको समन्वयमा सञ्चालन हुँदै आएका आमा समूहका बैठकहरू समुदायस्तरमा स्वास्थ्यसम्बन्धी जानकारी प्रवाह गर्ने, महिलाका स्वास्थ्य समस्याबारे छलफल गर्ने तथा स्थानीय स्वास्थ्य कार्यक्रमलाई प्रभावकारी बनाउन सहयोग पुर्याउने महत्त्वपूर्ण माध्यमका रूपमा रहेका छन्।
कमल गाउँपालिकामा राष्ट्रिय महिला सामुदायिक स्वास्थ्य स्वयंसेविका सदस्य सचिव रहने आमा समूहमा प्रत्येक महिना कम्तीमा एक दिन नियमित बैठक बस्ने व्यवस्था रहेको छ। महिला स्वास्थ्य स्वयंसेविकाको सहजीकरणमा सञ्चालन हुने बैठकमा समुदायका महिला तथा सदस्यहरूबीच स्वास्थ्य, सामाजिक समस्या र तिनको समाधानका उपायबारे छलफल तथा जानकारी आदानप्रदान गरिन्छ। आमा समूहको प्रत्येक बैठकमा स्वास्थ्यसम्बन्धी कम्तीमा एउटा विषयलाई अनिवार्य एजेन्डाका रूपमा समावेश गरी छलफल गर्नुपर्ने व्यवस्था रहेको छ।
बैठकका क्रममा बालविवाह तथा घरेलु हिंसा न्यूनीकरण, मर्यादित महिनावारी, पोषणयुक्त खानाको महत्त्व, व्यक्तिगत तथा वातावरणीय सरसफाइ, जापानिज इन्सेफलाइटिस (जेई) विरुद्धको खोप अभियान, पोषण र राष्ट्रिय भिटामिन ‘ए’ कार्यक्रम लगायतका विषयमा जानकारी दिँदै विस्तृत छलफल गरिएको थियो।
त्यसैगरी, गर्भवती तथा सुत्केरी महिलाको स्वास्थ्य र पोषण, बालबालिकाको उचित हेरचाह, नियमित खोप, रोगको रोकथाम, स्वास्थ्य संस्थाबाट उपलब्ध हुने सेवाको उपयोग तथा घरपरिवार र समुदायलाई स्वच्छ राख्नुपर्ने विषयमा समेत आमा समूहका सदस्यहरूलाई सचेत गराइएको छ। महिला स्वास्थ्य स्वयंसेविकाहरूले नियमित खोप कार्यक्रम तथा अन्य स्वास्थ्य अभियानमा सहभागी भई समुदायका नागरिकलाई जानकारी दिने, लक्षित वर्गको सहभागिता बढाउने र स्वास्थ्यकर्मीलाई सहयोग गर्ने कार्य गर्दै आएका छन्।
समुदायको घरदैलोसम्म स्वास्थ्य सेवा तथा जनचेतनामूलक कार्यक्रम पुर्याउन राष्ट्रिय महिला सामुदायिक स्वास्थ्य स्वयंसेविकाको भूमिका महत्त्वपूर्ण रहँदै आएको छ। आमा समूहको बैठक सञ्चालन, खोप कार्यक्रम तथा अन्य स्वास्थ्य गतिविधिमा सहभागिता, आफ्नो टोल तथा गाउँमा मासिक कार्यसम्पादन र सम्बन्धित स्वास्थ्य संस्थामा मासिक प्रतिवेदन पेस गर्नेलगायतका जिम्मेवारीमा स्वयंसेविकाहरू संलग्न रहँदै आएका छन्।
उक्त कार्यमा सहजीकरण गर्न संघीय सरकारबाट ससर्त कार्यक्रमअन्तर्गत महिला स्वास्थ्य स्वयंसेविकालाई तोकिएका गतिविधि सञ्चालन तथा प्रतिवेदन पेस गरेबापत यातायात खर्चस्वरूप मासिक १ हजार ५०० रुपैयाँ उपलब्ध गराउने व्यवस्था रहेको छ।
यसैगरी, कमल गाउँपालिकाले महिला स्वास्थ्य स्वयंसेविकाले समुदायमा पुर्याउँदै आएको योगदानलाई प्रोत्साहन गर्न पालिकाको तर्फबाट प्रत्येक स्वयंसेविकालाई मासिक ३ हजार ५०० रुपैयाँ यातायात खर्च उपलब्ध गराउँदै आएको गाउँपालिका अध्यक्ष हुकुमसिंह राईले जानकारी दिनुभयो।
अध्यक्ष राईका अनुसार महिला स्वास्थ्य स्वयंसेविकाहरू समुदाय र स्वास्थ्य संस्थाबीचको महत्त्वपूर्ण सम्पर्क सेतुका रूपमा रहेका छन्। उनीहरूको सक्रियताले स्वास्थ्यसम्बन्धी सूचना नागरिकको घरदैलोसम्म पुर्याउन, खोप अभियानमा लक्षित वर्गको सहभागिता बढाउन तथा महिला र बालबालिकाको स्वास्थ्य सुधारका कार्यक्रम सञ्चालन गर्न सहयोग पुग्ने अपेक्षा गरिएको छ।
आमा समूहका नियमित बैठकले महिलाहरूलाई आफ्ना स्वास्थ्यसम्बन्धी समस्या तथा जिज्ञासा राख्ने अवसर प्रदान गर्नुका साथै समुदायमा देखिने सामाजिक विकृति र स्वास्थ्यसम्बन्धी समस्याको पहिचान तथा समाधानमा सामूहिक सहभागिता बढाउन सहयोग पुर्याउँछन्।
कमल गाउँपालिकाको स्वास्थ्य शाखाले समुदायस्तरमा स्वास्थ्य सचेतना अभिवृद्धि गर्न, महिला तथा बालबालिकाको स्वास्थ्य सुधार गर्न र स्वास्थ्य कार्यक्रमको प्रभावकारी कार्यान्वयनमा आमा समूह तथा महिला स्वास्थ्य स्वयंसेविकाको भूमिकालाई महत्त्व दिँदै आएको छ।
स्वस्थ परिवार, सचेत महिला र समुन्नत समुदाय निर्माणका लागि आमा समूहका नियमित बैठक तथा महिला स्वास्थ्य स्वयंसेविकाको सक्रियता महत्त्वपूर्ण आधार हुन्। यस्ता प्रयासले स्वस्थ, सुरक्षित, हिंसामुक्त तथा बालविवाहमुक्त समाज निर्माणमा योगदान पुर्याउने विश्वास लिइएको अध्यक्ष राई ले बताउनु भयो ।
सुरुङ्गा, झापा। सफा, सुन्दर र स्वच्छ सुरुङ्गा निर्माण गर्ने उद्देश्यले सञ्चालन गरिएको ‘सफा सुरुङ्गा महाअभियान’ अन्तर्गत फोहोर संकलन दौड प्रतियोगिता सफलतापूर्वक सम्पन्न भएको छ। अभियानको पहिलो दिनमै ३६६ केजी नकुहिने फोहोर संकलन भएकाे कार्यक्रमम विद्यार्थी तथा स्थानीयवासीको उत्साहजनक सहभागिता रहेको थियो।
प्रतियोगितामा सन्दीप खत्रीको टोली प्रथम हुँदै १५ हजार रुपैयाँ पुरस्कार जित्न सफल भयो। त्यसैगरी, विल्सन थापालियाको टोली दोस्रो हुँदै १० हजार रुपैयाँ र रिदिमा संग्रौलाको टोली तेस्रो हुँदै ५ हजार रुपैयाँ पुरस्कार प्राप्त गर्न सफल भए। प्रतियोगिताको प्रथम पुरस्कार कनकाई सामुदायिक वन उपभोक्ता समूह, सुरुङ्गाले, दोस्रो पुरस्कार समाजसेवी दिपेश खत्रीले र तेस्रो पुरस्कार श्री पशुपति अङ्ग्रेजी माध्यमिक विद्यालयले प्रदान गरेका थिए।
यसैगरी, सरसफाइसम्बन्धी सामग्री निर्माण गरी सामाजिक सञ्जालमार्फत अभियानलाई प्रवर्द्धन गर्ने व्यक्तिका लागि ५ हजार रुपैयाँ पुरस्कारको व्यवस्था गरिएको छ। उक्त पुरस्कार न्यू संगीता ज्वेलरीका सञ्चालक रोज शंकरले प्रदान गर्ने भएका छन्। इच्छुक व्यक्तिले सरसफाइसम्बन्धी सामग्री निर्माण गरी आफ्नै सामाजिक सञ्जालमा प्रकाशित गरेर आयोजकलाई जानकारी गराउनुपर्नेछ।
प्रतियोगितामा श्री हरिकुल, कनकाई माध्यमिक विद्यालय, कनकाई बहुमुखी क्याम्पसलगायतका शैक्षिक संस्थाका विद्यार्थी तथा स्थानीयवासीले सहभागिता जनाएका थिए। कार्यक्रममा झापा क्षेत्र नं. ४ का सांसद शम्भु सुस्केरा र कनकाई उद्योग वाणिज्य संघका अध्यक्ष जनक कार्कीले सम्बोधन गर्दै स्वच्छ सुरुङ्गा निर्माणका लागि आफ्नो तर्फबाट तथा सम्बन्धित संस्थामार्फत आवश्यक सहयोग र प्रतिबद्धता व्यक्त गरे।
कार्यक्रमलाई सफल बनाउन कनकाई नगरपालिका वडा नं. ३ को वडा कार्यालय, कनकाई उद्योग वाणिज्य संघ, सुरुङ्गा तथा सुरुङ्गा खानेपानी तथा सरसफाइ समितिको सहयोग रहेको थियो। प्रतियोगिताका क्रममा सहभागी बिरामी भएमा उपचारका लागि सुरुङ्गा मेडिसिन सेन्टर एण्ड क्लिनिकसमेत तयारी अवस्थामा रहेको थियो।
महाअभियान अन्तर्गत आगामी कार्यक्रमका रूपमा भाेली असाेज २८गते सरसफाइयुक्त सुरुङ्गा निर्माणका लागि प्रतिबद्धता जनाउने हस्ताक्षर अभियान तथा असोज २९ गते वृक्षरोपण कार्यक्रम ता असाेज ३० गते सम्मान ता पुरस्कार वितरण कार्यक्रमआयोजना गरिने जनाइएको छ।
अभियानका संयोजक दिवस कार्कीले यस अभियानले सुरुङ्गालाई स्वच्छ, सुन्दर र व्यवस्थित सहर बनाउन महत्वपूर्ण योगदान पुर्याउने विश्वास व्यक्त गरे। उनले भने, “सुरुङ्गालाई यस्तो राम्रो सहर बनाऊँ कि यहाँ आउने प्रत्येक व्यक्तिले आफ्नो ठाउँमा पुगेर पनि सुरुङ्गाजस्तै सफा र राम्रो सहर बनाउन खोजोस्।”
फोहोर संकलन दौड प्रतियोगितामार्फत सुरु भएको यस अभियानले सरसफाइप्रति जनचेतना अभिवृद्धि गर्नुका साथै वातावरण संरक्षणमा सामूहिक सहभागिता र जिम्मेवारीबोध बढाउने अपेक्षा गरिएको छ।
दार्जिलिङ, / रसिक ग्राम सुधार समितिको आयोजनामा प्रथम अच्छा राई रसिक पुरस्कार–२०२६ तथा शरद् क्षेत्री सम्मान समारोह साहित्यिक एवं सांस्कृतिक कार्यक्रमका साथ सम्पन्न भयो। समारोहमा साहित्य, पत्रकारिता, शिक्षा तथा सामाजिक क्षेत्रमा उल्लेखनीय योगदान पुर्याउने विभिन्न व्यक्तित्वहरूलाई सम्मान जनाइयो।
यस वर्षको प्रथम अच्छा राई रसिक पुरस्कार साहित्यकार छुदेन काविमोको उपन्यास ‘उरमाल’लाई प्रदान गरियो। वरिष्ठ साहित्यकार डा. गोकुल सिन्हाको बाहुलीबाट काविमोलाई उक्त पुरस्कार अर्पण गरिएको थियो। यस अवसरमा दिपेश प्रधानले अभिनन्दन पत्र वाचन गरे भने नवीन पेगाले खदा तथा सन्तवीर थामीले नेपाली टोपी अर्पण गरे। पुरस्कार ग्रहणपछि साहित्यकार काविमोले आफ्नो मन्तव्य राखे।
समारोहमा शरद् क्षेत्री पत्रकारिता सम्मान ‘नेपाल प्रज्ञा प्रतिष्ठान’ का प्राज्ञ दीपक सापकोटालाई प्रदान गरियो। पत्रकारिता क्षेत्रमा पुर्याएको योगदानको कदरस्वरूप उनलाई सम्मानित गरिएको हो। प्रवीना खातुनले अभिनन्दन पत्र वाचन गरेको उक्त सम्मान कार्यक्रममा डा. गोकुल सिन्हाले सम्मान प्रदान गरे भने नवीन पेगाले खदा र सन्तवीर थामीले नेपाली टोपी अर्पण गरे।
त्यसैगरी, शरद् क्षेत्री विद्यावारिधि सम्मानबाट डा. वीणा हाङखिम र डा. नमिता थापालाई सम्मानित गरियो। डा. हाङखिमको अभिनन्दन पत्र नवीन पी. लिम्बूले वाचन गरे। उनलाई सन्तवीर थामीले सम्मान, सुलोचना क्षेत्रीले खदा तथा नवीन बी.के.ले शाल अर्पण गरे। अर्की सम्मानित व्यक्तित्व डा. नमिता थापाको अभिनन्दन पत्र सृजना थामीले वाचन गरिन् भने नवीन पेगाले सम्मान, रुपेश तामाङले खदा र नवीन बी.के.ले शाल अर्पण गरे।
कार्यक्रमअन्तर्गत रसिक ग्राम सुधार समितिको विशेष सम्मानबाट पूर्ण गिरी, श्री प्रदीप लामा (डेनिस), दीपक क्षेत्री तथा श्री आर.के. गुरुङलाई सम्मानित गरियो।
पूर्ण गिरीको अभिनन्दन पत्र सोनु राईले वाचन गरिन्। उनलाई मिठु प्रधानले खदा तथा चन्द्रकला मुखियाले सम्मानपत्र प्रदान गरिन्। त्यसैगरी, प्रदीप लामाको अभिनन्दन पत्र सृजना थामीले वाचन गरिन् भने रतन गुरुङले खदा अर्पण गर्दै सम्मान प्रदान गरे। दीपक क्षेत्रीको अभिनन्दन पत्र अनिशाले वाचन गरिन् भने सन्तवीर थामीले खदा तथा सम्मान प्रदान गरे। श्री आर.के. गुरुङको अभिनन्दन पत्र नवीन पी. लिम्बूले वाचन गरे।
शैक्षिक उपलब्धिको कदर गर्दै रसिक ग्राम सुधार समिति उत्कृष्ट विद्यार्थी पुरस्कार अनिशा रोकालाई प्रदान गरियो। उक्त पुरस्कार नवीन पी. लिम्बूले प्रदान गरे।
दीपक सापकोटाले दार्जिलिङको साहित्यबारे विशेष मन्तव्य राखे। उनले दार्जिलिङको साहित्यिक परिवेशलाई केन्द्रमा राखेर आफ्ना विचार प्रस्तुत गरे। त्यस्तै, देवाङ योञ्जनले पुरस्कारको महत्त्व र सान्दर्भिकतामाथि विशेष मन्तव्य राखे।
कार्यक्रमको सांस्कृतिक पक्ष पनि आकर्षक रह्यो। स्वागत नृत्यबाट आरम्भ भएको समारोहमा रिया सेठले सरस्वती वन्दना प्रस्तुत गरिन्। साहित्यकार मनोज बोगटीद्वारा रचित ‘तिम्रो सम्झना आउँछ’ कविता दिपेश प्रधानले वाचन गरे। कवि प्रवीण खालिङले पनि कविता सुनाए।
साङ्गीतिक प्रस्तुतिअन्तर्गत अभिदान हाङ पेगा र गायिका सोनु राई, सिर्जना थामीले आधुनिक गीत प्रस्तुत गरे भने उमंग तामाङले लोकगीत सुनाएर समारोहलाई थप जीवन्त बनाए।
साहित्यिक सिर्जना, पत्रकारिता, प्राज्ञिक उपलब्धि, सामाजिक योगदान तथा विद्यार्थी प्रतिभालाई एउटै मञ्चबाट सम्मान गरिएको यस समारोहले दार्जिलिङको साहित्यिक एवं सांस्कृतिक क्षेत्रमा महत्त्वपूर्ण सन्देश दिएको छ। प्रथम अच्छा राई रसिक पुरस्कारको थालनीसँगै रसिक ग्राम सुधार समितिले साहित्यिक स्रष्टाहरूको योगदानलाई संस्थागत रूपमा सम्मान गर्ने नयाँ अध्याय सुरु गरेको निबन्धकार सैलिका छेत्रीले जनाएकी छन्।
