२०८३ मंसिर ७ आईतवार
२०८३ मंसिर ७ आईतवार

दमक। आस्था, श्रद्धा र शुद्धताको महापर्व छठ आज बिहान उदाउँदो सूर्यलाई अर्घ अर्पण गरेसँगै झापाको दमकलगायत विभिन्न स्थानमा विधिवत् रूपमा सम्पन्न भएको छ।

छठ पर्वको अन्तिम दिन आज बिहानैदेखि दमकसहित झापाका विभिन्न नदी, पोखरी, तलाउ तथा जलाशयमा निर्माण गरिएका छठघाटमा व्रतालु, श्रद्धालु तथा भक्तजनहरूको उल्लेख्य उपस्थिति रहेको थियो। व्रतालुहरूले उदाउँदो सूर्यलाई अर्घ अर्पण गर्दै परिवारको सुख, शान्ति, समृद्धि, सुस्वास्थ्य तथा दीर्घायुको कामना गरेका छन्।

चार दिनसम्म श्रद्धा र भक्तिपूर्वक मनाइने छठ पर्वको समापनसँगै छठघाटहरूमा भक्तिमय वातावरण देखिएको थियो। यस पर्वले आपसी सद्भाव, सामाजिक एकता, पारिवारिक प्रेम तथा धार्मिक सहिष्णुताको सन्देशसमेत दिएको छ।

अस्ताउँदो र उदाउँदो सूर्यलाई पूजा तथा अर्घ अर्पण गरिने छठ पर्व तराई–मधेसको मौलिक संस्कृति, परम्परा र पहिचानका रूपमा स्थापित छ। पछिल्लो समय पहाडी तथा हिमाली क्षेत्रमा समेत छठ पर्वप्रतिको आकर्षण बढ्दै गएको छ।

दमक । सामाजिक सेवामा सक्रिय रहँदै आएको संस्था पहिलो पाइला नेपालले छठ पर्वको अवसरमा दमक–१ स्थित रतुवा खोलामा छठ पूजा गर्न तथा अवलोकन गर्न आउने भक्तजनहरूलाई निःशुल्क चिया वितरण गरेको छ।

विगतका वर्षहरूमा झैँ यस वर्ष पनि आपसी सद्भाव, भाइचारा र सामाजिक सेवाको भावनालाई आत्मसात् गर्दै निःशुल्क चिया वितरण कार्यक्रम सञ्चालन गरिएको संस्थाकी सचिव पूजा दाहालले बताइन्।

संस्थाका अध्यक्ष राजु निरौलाको नेतृत्वमा सम्पन्न कार्यक्रममा सल्लाहकार गणेश प्रधान, महेश घिमिरे, पूर्वअध्यक्ष सुरेश बराल, कमल शाखा सचिव दीपेन्द्र खतिवडा, गौरादह सचिव प्रदीप धमला जुनु रेग्मी ,गायतको उपस्थिति रहेको थियो।

छठ पर्व मनाउन तथा पूजा अवलोकन गर्न आएका भक्तजनहरूले संस्थाको सामाजिक कार्यको प्रशंसा गर्दै धन्यवाद व्यक्त गरेका थिए। यसैगरी छठ पूजा समितिका सचिव पुजन चौधरीले भक्तजनलाई लक्षित गरी निःशुल्क चिया वितरण गरेकोमा पहिलो पाइला नेपालप्रति आभार व्यक्त गरेका थिए।

सामाजिक उत्तरदायित्व, धार्मिक सहिष्णुता र मानवीय सेवाको भावनालाई जोड्दै संस्थाले पर्व तथा विभिन्न अवसरमा सामाजिक गतिविधि सञ्चालन गर्दै आएको छ।

कमल / जन्मदिनलाई व्यक्तिगत उत्सवमा मात्र सीमित नराखी सामाजिक तथा मानवीय सेवासँग जोड्दै झापा कमल ६ का युवा भीम पौडेलले उदाहरणीय कार्य गरेका छन् ।

पौडेलले आफ्नो जन्मदिनको अवसर पारेर कमल गाउँपालिकाका अति विपन्न तथा समस्यामा परेका चार परिवारलाई खाद्यान्न सामग्री सहयोग गरेका हुन् । उनले कमल गाउँपालिका–६ निवासी एकल महिला तथा प्यारालाइसिसबाट प्रभावित सिजा दर्नाल, चुड्के मुर्मु
राम ग्वाल र
अमन यादबको परिवारलाई चामल नुन तेल सहित सामग्री सहयोग गरेका हुन् ।

व्यक्तिगत खुसीलाई सामाजिक उत्तरदायित्वसँग जोड्दै दुःख र अभावमा रहेका परिवारलाई केही राहत पुर्‍याउने उद्देश्यले सहयोग गरिएको पौडेलले बताउनुभयो।

यस प्रकारको सामाजिक कार्यले समस्यामा रहेका परिवारको जीवनमा केही राहत र खुसी थप्नुका साथै अरूलाई पनि मानवीय सेवामा प्रेरित गर्ने दमक उद्योग वाणिज्य संघका अध्यक्ष गोपाल गुरागाईंले बताउनुभयो। उहाँले व्यक्तिगत उत्सवलाई सामाजिक सेवासँग जोड्ने पौडेलको प्रयास प्रशंसनीय रहेको उल्लेख गर्नुभयो। कार्यक्रममा लायन्स क्लब इन्टर नेशन ३२५ सीका गभर्नर लीला चिमरिया,

बाणिज्य संघका अध्यक्ष गुरागाईं , पहिलो पाइला नेपालका सल्लाहकार गणेश प्रधान, विवेक बजगाईं, पहिलो पाइला नेपाल दमक शाखाका अध्यक्ष राजु निरौला, कमल शाखाका अध्यक्ष सञ्जु निरौला,युवराज भट्टराई, लायन्सकर्मी तथा पहिलो पाइला नेपाल कमल शाखाका पदाधिकारीहरूको उपस्थिति रहेको थियो।

जन्मदिनमा गरिने खर्च र उत्सवलाई असहाय, विपन्न तथा समस्यामा परेका व्यक्तिको सहयोगमा रूपान्तरण गर्ने यस्तो अभ्यासले समाजमा मानवीय संवेदना, परोपकार र सामाजिक उत्तरदायित्वको संस्कार विकास गर्न सकारात्मक योगदान पुर्‍याउने अपेक्षा गरिएको छ।

हल्दिबारी ।आफ्नो प्रतिभामार्फत हल्दिबारीको पहिचान स्थापित गर्ने यात्रामा रहेकी गायिका सुशिला हस्दालाई ढडुवा युवा क्लब परिवारले आर्थिक सहयोग गर्दै हौसला प्रदान गरेको छ।

कोशी डान्सिङ एन्ड सिङ्गिङ आइडल सिजन–४ मा उत्कृष्ट २५ भित्र स्थान बनाउन सफल हल्दिबारी गाउँपालिका–४ निवासी हस्दालाई क्लबले कुल १४ हजार ३०५ रुपैयाँ सहयोग हस्तान्तरण गरेको हो। उक्त रकममध्ये क्लबको तर्फबाट ५ हजार रुपैयाँ र क्लबको अगुवाइमा विभिन्न व्यक्तिहरूबाट संकलित ९ हजार ३०५ रुपैयाँ रहेको छ।

क्लबका अध्यक्ष गोपाल न्यौपानेको संयोजकत्वमा हस्दाकै निवास पुगेको टोलीले एक कार्यक्रमका बीच सहयोग रकम हस्तान्तरण गरेको थियो। टोलीमा क्लबका सदस्यहरू ॐ भट्टराई, दिनेश मेचे, खड्ग बिष्ट तथा श्री पञ्चायत माध्यमिक विद्यालयका विद्यालय व्यवस्थापन समिति सदस्य अस्मिता मेयाङ्वोलगायतको उपस्थिति रहेको थियो।

हस्दाको प्रतिभा, मेहनत र सांगीतिक यात्रालाई प्रोत्साहन गर्ने उद्देश्यले सहयोग गरिएको क्लबका सचिव एवं युवा अभियानकर्मी अभिषेक खतिवडाले बताउनुभयो। उहाँका अनुसार हल्दिबारीको प्रतिनिधित्व गर्दै गायन क्षेत्रमा अघि बढिरहेकी प्रतिभालाई आवश्यक समयमा साथ दिनु क्लबको सामाजिक दायित्वसमेत हो।

उहाँले भन्नुभयो, “सुशिला बहिनीले आफ्नो प्रतिभामार्फत हल्दिबारीलाई चिनाउने प्रयास गरिरहनुभएको छ। उहाँको यो यात्रा केवल व्यक्तिगत सफलता मात्र नभई हाम्रो गाउँ, समाज र क्षेत्रको गौरवसँग पनि जोडिएको छ। यस्तो प्रतिभालाई प्रोत्साहन गर्नुपर्ने समयमा हामी चुप लागेर बस्न उचित ठानेनौँ। त्यसैले क्लबको अगुवाइमा सहयोग संकलन गरी उहाँकै निवासमा पुगेर हस्तान्तरण गरेका हौँ।”

क्लबका अध्यक्ष गोपाल न्यौपानेले सहयोग रकम हस्तान्तरण गर्नुभएको थियो। सहयोग प्राप्त गरेपछि गायिका हस्दाले ढडुवा युवा क्लब परिवारले आफ्नो कला, प्रतिभा र सांगीतिक यात्राप्रति देखाएको माया, सद्भाव र सहयोगका लागि हार्दिक धन्यवाद व्यक्त गर्दै कृतज्ञता प्रकट गर्नुभएको थियो।

पछिल्लो समय ढडुवा युवा क्लब परिवार समाज रूपान्तरणका अभियान, सामाजिक सचेतना, स्थानीय प्रतिभाको पहिचान तथा प्रोत्साहन, आर्थिक सहयोग हस्तान्तरण र सामाजिक उत्तरदायित्वसँग सम्बन्धित विभिन्न गतिविधिमा सक्रियतापूर्वक अघि बढिरहेको छ। समुदायका आवश्यकता र समस्यालाई आत्मसात् गर्दै मानवीय सहयोग, सामाजिक एकता र सकारात्मक परिवर्तनका लागि क्लबले निरन्तर अग्रसरता देखाउँदै आएको छ।

क्लबको यस पहलले स्थानीय प्रतिभाको सफलतामा समुदायको साथ, सहयोग र सद्भाव कति महत्वपूर्ण हुन्छ भन्ने सन्देश दिएको छ। प्रतिभा पहिचान गर्ने मात्र होइन, उनीहरूको यात्रामा आवश्यक साथ र हौसला प्रदान गर्ने संस्कारको विकास गर्नु नै सामाजिक उत्तरदायित्वको सुन्दर अभ्यास हो।

कमल, झापा । बालबालिकाको स्वास्थ्य, पोषण तथा समग्र शारीरिक विकासलाई प्रवर्द्धन गर्ने उद्देश्यसहित कमल गाउँपालिकामा राष्ट्रिय भिटामिन ‘ए’ क्याप्सुल तथा जुकाको औषधि खुवाउने कार्यक्रम सफलतापूर्वक सम्पन्न भएको छ। नेपाल सरकारको राष्ट्रिय कार्यक्रमअन्तर्गत २०८३ साल कार्तिक १७ र १८ गते गाउँपालिकाका सातवटै वडामा एकैसाथ अभियान सञ्चालन गरिएको हो।

गाउँपालिकाका २४ जना महिला सामुदायिक स्वास्थ्य स्वयंसेविकाको सक्रिय सहभागितामा सञ्चालन गरिएको अभियानमार्फत लक्षित उमेर समूहका बालबालिकालाई भिटामिन ‘ए’ क्याप्सुल तथा जुकाको औषधि खुवाउनुका साथै बालबालिकाको पोषण अवस्था परीक्षण र नियमित खोप सेवाको अवस्थाबारे समेत खोज तथा पहिचान गरिएको थियो।

कार्यक्रमअन्तर्गत ६ महिनादेखि ५ वर्षमुनिका बालबालिकालाई राष्ट्रिय भिटामिन ‘ए’ क्याप्सुल तथा १ वर्षदेखि ५ वर्षमुनिका बालबालिकालाई जुकाको औषधि (अल्बेन्डाजोल) खुवाइएको थियो। भिटामिन ‘ए’ ले बालबालिकाको रोग प्रतिरोधात्मक क्षमता कायम राख्न तथा आँखाको स्वास्थ्य संरक्षण गर्न महत्वपूर्ण भूमिका खेल्दछ भने जुकाको औषधिले पेटमा हुने परजीवीको संक्रमण नियन्त्रण गरी बालबालिकाको स्वास्थ्य तथा पोषण अवस्थामा सुधार ल्याउन सहयोग पुर्यािउँछ।

पालिकास्तरबाट प्राप्त अन्तिम प्रतिवेदनअनुसार भिटामिन ‘ए’ क्याप्सुल वितरणतर्फ कुल ३ हजार ४७८ जना बालबालिकाको लक्ष्य निर्धारण गरिएकोमा ३ हजार ६४१ जना बालबालिकालाई सेवा प्रदान गरिएको छ। यसअनुसार लक्ष्यको १०४.६९ प्रतिशत प्रगति हासिल भएको छ।

त्यसैगरी जुकाको औषधि वितरणतर्फ ३ हजार १५३ जना बालबालिकाको लक्ष्य रहेकोमा ३ हजार ३८० जना बालबालिकालाई औषधि खुवाइएको छ। यो लक्ष्यको १०७.२ प्रतिशत प्रगति हो। दुवै कार्यक्रमको लक्ष्यभन्दा बढी बालबालिकाले सेवा प्राप्त गर्नु अभियानको सकारात्मक उपलब्धिका रूपमा रहेको स्वास्थ्य शाखा प्रमुख दिपक प्रसाद दहाल ले जानकारी दिए ।

यस अभियानलाई भिटामिन ‘ए’ तथा जुकाको औषधि वितरणमा मात्र सीमित नराखी बालबालिकाको पोषण अवस्था पहिचान तथा स्वास्थ्य सेवाको पहुँच सुनिश्चित गर्ने अभियानका रूपमा समेत सञ्चालन गरिएको थियो। कार्यक्रमका क्रममा ३ हजार ३२ जना बालबालिकाको पोषण स्क्रिनिङ गरिएको थियो। बालबालिकाको पाखुराको मध्य भागको परिधि (MUAC) मापन गरी पोषण अवस्थाको लेखाजोखा गरिएको थियो। यसबाट पोषण जोखिममा रहेका बालबालिकाको पहिचान गरी आवश्यक परामर्श तथा सेवाका लागि सहजीकरण गर्न सहयोग पुगेको छ।

त्यसैगरी अभियानका क्रममा नियमित खोप सेवा लिन छुटेका बालबालिकाको खोज तथा पहिचानसमेत गरिएको थियो। प्राप्त अन्तिम विवरणअनुसार खोप लगाउन छुटेका बालबालिका नभेटिनुले गाउँपालिकामा पूर्ण खोप सुनिश्चितता तथा दिगोपनाका लागि भइरहेका प्रयासलाई थप सकारात्मक बनाएको छ।

गाउँपालिकाका सातवटै वडामा एकैसाथ सञ्चालन भएको यस अभियानलाई सफल बनाउन २४ जना महिला सामुदायिक स्वास्थ्य स्वयंसेविकाले महत्वपूर्ण भूमिका निर्वाह गरेका थिए। स्वास्थ्य संस्थाका प्रमुख तथा स्वास्थ्यकर्मीहरूको समन्वय, सहजीकरण र अनुगमन तथा अभिभावकहरूको सक्रिय सहभागिताले कार्यक्रमलाई व्यवस्थित र प्रभावकारी रूपमा सम्पन्न गर्न सहयोग पुर्याईएको थियो।

कार्यक्रम सफलतापूर्वक सम्पन्न भएको अवसरमा कमल गाउँपालिकाका अध्यक्ष हुकुम सिंह राईले अभियानमा खटिनुभएका महिला सामुदायिक स्वास्थ्य स्वयंसेविका, स्वास्थ्य संस्थाका प्रमुख तथा सम्पूर्ण स्वास्थ्यकर्मी, जनप्रतिनिधि, कर्मचारी र सहयोगी सबैप्रति हार्दिक धन्यवाद तथा आभार व्यक्त गर्नुभएको छ।

अध्यक्ष राईले बालबालिकाको स्वास्थ्य र पोषण सुधार स्थानीय सरकारको महत्वपूर्ण प्राथमिकता भएको उल्लेख गर्दै यस्ता जनस्वास्थ्यसम्बन्धी कार्यक्रमलाई प्रभावकारी बनाउन स्वास्थ्यकर्मी, महिला सामुदायिक स्वास्थ्य स्वयंसेविका, जनप्रतिनिधि तथा अभिभावकबीचको सहकार्य आवश्यक रहेको सन्देश दिनुभएको छ।

बालबालिकाको स्वस्थ जीवन, पोषणयुक्त भविष्य र रोगमुक्त समाज निर्माणका लागि नियमित खोप, पोषण परीक्षण, भिटामिन ‘ए’ तथा जुकाको औषधि वितरणजस्ता जनस्वास्थ्यका कार्यक्रमलाई निरन्तर प्रभावकारी रूपमा सञ्चालन गर्दै जाने कमल गाउँपालिकाको प्रतिबद्धता रहेको छ।

झापाको दमकमा ६ वर्षीया बालिका एन्जिलिका लिम्बु आँखाको ट्युमर क्यान्सरबाट पीडित बनेकी छन्। समयमै उपचार गर्नुपर्ने भए पनि परिवारको कमजोर आर्थिक अवस्थाका कारण उनको उपचारमा समस्या भइरहेको छ।

दमक नगरपालिका–१ स्थित डी टाउन नजिकै मामा चोक–हिमालय माध्यमिक विद्यालय जाने सडकमा भाडाको कोठामा बस्दै आएका दीपक लिम्बु र सुमित्रा राईकी छोरी एन्जिलिकाको आँखामा दुई महिनाअघि सानो फोकाजस्तो देखिएको थियो। सुरुमा सामान्य समस्या ठाने पनि परीक्षणका क्रममा आँखामा ट्युमर देखिएको र पछि क्यान्सर भएको चिकित्सकले पुष्टि गरेको परिवारले जनाएको छ।

छोरीको उपचारका लागि बिर्तामोड र भद्रपुरका विभिन्न अस्पताल पुर्‍याउँदा परिवारले आफ्नो भएको सम्पत्तिसमेत खर्च गरिसकेको आमा सुमित्रा राईले बताइन्। तर, उपचार अझै पूरा नभएकाले थप ठूलो रकम आवश्यक परेको उनको भनाइ छ।

पेसाले मिस्त्री रहेका एन्जिलिकाका बुबा दीपकको दैनिक ज्यालाबाट घरखर्च चलाउनै मुस्किल छ। आमा सुमित्रा भने छोरीको हेरचाहमा घरमै बस्दै आएकी छन्। तीन वर्षका भाइसमेत रहेकी एन्जिलिका अहिले उपचारको पर्खाइमा छिन्।

कलिलो उमेरमै गम्भीर रोगसँग जुधिरहेकी एन्जिलिकालाई समयमै थप उपचार गराउन परिवारले सहयोगको अपेक्षा गरेको छ। आर्थिक अभावका कारण बालिकाको उपचार प्रभावित भइरहेकाले सहयोगी मन र संघसंस्थाको साथ आवश्यक देखिएको छ।

शिवसताक्षी – झापाको शिवसताक्षी नगरपालिका–८ झिलझिलेस्थित बुद्धचोकमा रहेको युङ्गी क्याफे एण्ड रेष्टुरेन्टका सञ्चालक तथा होटल व्यवसायी तुला बोखिमले समाज परिवर्तन र राजनीतिक रूपान्तरणमा सञ्चारकर्मीहरूको भूमिका हिजोदेखि आजसम्म महत्वपूर्ण रहँदै आएको बताउनुभएको छ।

आइतबार स्थानीय सञ्चारकर्मीहरूसँगको भेटघाट तथा शुभकामना आदानप्रदान कार्यक्रममा बोल्दै बोखिमले मुलुकमा भएका विभिन्न राजनीतिक आन्दोलन, द्वन्द्व र परिवर्तनका समयमा सञ्चारकर्मीहरूले पुर्याेएको योगदानको प्रशंसा गर्नुभयो। उहाँले सञ्चारकर्मीहरूले समाज र राजनीतिमा सकारात्मक परिवर्तन ल्याउन महत्वपूर्ण भूमिका निर्वाह गरेको उल्लेख गर्नुभयो।

शुभदीपावली, छठ, नेपाल संवत्, उधौली–उभौली तथा राष्ट्रिय विभूति महागुरु फाल्गुनन्दको जन्मजयन्तीको अवसर पारेर व्यवसायी बोखिमले उक्त कार्यक्रम आयोजना गर्नुभएको थियो।
कार्यक्रममा उहाँले तीनै तहका सरकारका गतिविधि नागरिकसम्म पुर्या्उने तथा सरकारका गलत प्रवृत्तिविरुद्ध खबरदारी र भण्डाफोर गर्ने जिम्मेवारीबाट सञ्चारकर्मीहरू पछि हट्न नहुने बताउनुभयो। नेपाली कांग्रेसको १५औँ महाधिवेशनबाट महाधिवेशन प्रतिनिधिसमेत बन्नुभएका बोखिमले पछिल्लो समय सरकार पत्रकारिताप्रति आक्रामक देखिएको भन्दै चिन्ता व्यक्त गर्नुभयो। उहाँले नयाँ सरकारले जनताप्रति उत्तरदायी भएर काम गर्नुपर्नेमा जोड दिनुभयो।

यसैगरी, पूर्वको प्रसिद्ध धार्मिक तथा पर्यटकीयस्थल सताक्षीधाम धार्मिक तथा पर्यटन विकास संस्थाका अध्यक्षसमेत रहनुभएका बोखिमले सताक्षीधामको विकासका लागि विभिन्न योजना अघि सारिएको जानकारी दिनुभयो। उहाँका अनुसार धाममा आश्रय लिएर रहेका पशुचौपायाका लागि उचित चरनस्थलको खोजी गर्ने तथा पिसाब र गोबर संकलन गरी बहुउपयोगी बनाउने योजना रहेको छ।

त्यस्तै, सताक्षीधाम परिसरमा सताक्षी देवीको मन्दिर निर्माणका लागि उपसमिति गठन गरी जिम्मेवारीसमेत प्रदान गरिएको उहाँले बताउनुभयो। कार्यक्रममा सहभागी सञ्चारकर्मीहरूले विभिन्न जिज्ञासा, राय तथा सुझाव राख्नुका साथै व्यवसायी एवं राजनीतिक व्यक्तित्व बोखिमलाई शुभकामना व्यक्त गरेका थिए।

हल्दिबारी, झापा । स्थानीय आवश्यकता पहिचान गर्दै सार्वजनिक हितका काममा युवाहरूको सक्रिय सहभागिता र सामूहिक पहलकदमीको उदाहरण प्रस्तुत गर्दै हल्दिबारीमा सडक सुरक्षा तथा सचेतनामूलक अभियान सम्पन्न भएको छ।

सडक दुर्घटना न्यूनीकरण, पैदलयात्रीको सुरक्षित आवागमन, ट्राफिक अनुशासनको प्रवर्द्धन तथा सार्वजनिक स्थलको सौन्दर्य अभिवृद्धि गर्ने उद्देश्यले हल्दिबारीका युवाहरूको अगुवाइमा हल्दिबारी गाउँपालिका–२ स्थित भजन चोकमा उक्त अभियान सञ्चालन गरिएको हो। अभियानअन्तर्गत जेब्रा क्रस निर्माण, सडक सुरक्षा सचेतना, ट्राफिक कोन व्यवस्थापन तथा चोक सौन्दर्यकरणका कार्य सम्पन्न गरिएका छन्।

कार्यक्रमको उद्घाटन कोशी प्रदेश सभा सदस्य माननीय छविलाल चुडालले पानसमा दीप प्रज्वलन गरी गर्नुभएको थियो।

उद्घाटन समारोहमा हल्दिबारी गाउँपालिका अध्यक्ष रविन्द्र प्रसाद लिङ्देन, वडा नं. २ का वडाध्यक्ष शुकलाल राजवंशी, वडा नं. ४ का वडाध्यक्ष सन्तु थापा मगर, गाउँपालिकाका पूर्व प्रमुख प्रशासकीय अधिकृत मानबहादुर वन (महेन्द्र), जिल्ला ट्राफिक प्रहरी प्रमुख प्रहरी निरीक्षक सन्तोष राई, नेपाल रेडक्रस सोसाइटी हल्दिबारी उपशाखाका अध्यक्ष कर्णखर प्रसाईं, उद्योग वाणिज्य संघ हल्दिबारीका महासचिव कृष्ण प्रसाईं, एकता बहुउद्देश्यीय सहकारी संस्थाका अध्यक्ष हरिकृष्ण अधिकारी, हल्दिबारी माध्यमिक विद्यालयका प्रधानाध्यापक टंक प्राखरिनलगायत जनप्रतिनिधि, सामाजिक अभियन्ता, स्थानीय युवा, सञ्चारकर्मी तथा सुरक्षाकर्मीहरूको उपस्थिति रहेको थियो।

कार्यक्रममा जिल्ला ट्राफिक प्रहरी प्रमुख प्रहरी निरीक्षक सन्तोष राईले सडक सुरक्षाका मापदण्ड, ट्राफिक नियमको पालना, सवारीसाधन सञ्चालनसम्बन्धी कानुनी व्यवस्था तथा सडक दुर्घटना न्यूनीकरणका उपायबारे जानकारी गराउनुभएको थियो। उहाँले सडक सुरक्षालाई व्यक्तिगत सावधानीमा मात्र सीमित नराखी सामूहिक जिम्मेवारीका रूपमा आत्मसात् गर्नुपर्ने बताउँदै स्थानीय सरकार, सुरक्षा निकाय र नागरिकको सहकार्यमा सञ्चालन हुने यस्ता अभियानले दुर्घटना न्यूनीकरण तथा ट्राफिक सचेतना अभिवृद्धिमा महत्त्वपूर्ण योगदान पुर्‍याउने धारणा राख्नुभयो। युवाहरूको सक्रियता र सामाजिक उत्तरदायित्वप्रतिको प्रतिबद्धता प्रशंसनीय रहेको उहाँको भनाइ थियो।

त्यसैगरी गाउँपालिका अध्यक्ष रविन्द्र प्रसाद लिङ्देनले सुरक्षित सडक र व्यवस्थित आवागमन विकासको महत्त्वपूर्ण आधार भएको उल्लेख गर्नुभयो। उहाँले ट्राफिक नियमको पालना, सडक अनुशासन र दुर्घटना न्यूनीकरणका लागि स्थानीय सरकारसँगै प्रत्येक नागरिक जिम्मेवार बन्नुपर्ने बताउँदै यस्ता अभियानमा सामुदायिक सहभागिता र सहकार्य आवश्यक रहेको धारणा व्यक्त गर्नुभयो।

प्रमुख अतिथि चुडालले युवाहरूको अगुवाइमा स्थानीय स्तरमा भइरहेका सकारात्मक, सिर्जनात्मक तथा समाजोपयोगी कार्यको प्रशंसा गर्नुभयो। उहाँले समाज रूपान्तरणका लागि युवाहरूको ऊर्जा, सोच र सिर्जनशीलतालाई रचनात्मक कार्यमा परिचालन गर्नुपर्ने उल्लेख गर्दै भजन चोकमा गरिएको यस प्रयासले सुरक्षित आवागमन र जिम्मेवार नागरिक व्यवहारको विकासमा सहयोग पुर्‍याउने विश्वास व्यक्त गर्नुभयो। साथै, यस्ता अभियानलाई हल्दिबारीका अन्य बजार तथा चोकहरूमा समेत विस्तार गर्दै लैजानुपर्नेमा जोड दिनुभयो।

अभियानअन्तर्गत भजन चोकको स्तम्भमा नेपालको राष्ट्रिय झण्डा स्थापना, पैदलयात्रीका लागि जेब्रा क्रस निर्माण तथा सवारीसाधनको आवागमन व्यवस्थित गर्न ट्राफिक कोन राखिएको छ। यी कार्यले चोकको स्वरूपलाई थप व्यवस्थित र आकर्षक बनाउनुका साथै पैदलयात्री तथा सवारी चालकलाई सडक सुरक्षाप्रति सचेत गराउन सहयोग पुग्ने अपेक्षा गरिएको छ।

अभियानका संयोजक असीम मैनालीको अध्यक्षतामा सम्पन्न कार्यक्रमको सञ्चालन तथा सहजीकरण सामाजिक अभियन्ता अभिषेक खतिवडाले गर्नुभएको थियो।

कार्यक्रमको उद्देश्य र औचित्यमाथि प्रकाश पार्दै संयोजक मैनालीले स्थानीय आवश्यकतालाई प्राथमिकतामा राखेर युवाहरूको सामूहिक प्रयास, सकारात्मक सोच र सहयोगबाट अभियानलाई सफलतापूर्वक सम्पन्न गर्न सकिएको बताउनुभयो। उहाँले अभियानलाई सफल बनाउन प्रत्यक्ष तथा अप्रत्यक्ष रूपमा योगदान पुर्‍याउने जनप्रतिनिधि, सरकारी निकाय, संघसंस्था, सुरक्षाकर्मी, स्थानीयवासी तथा सम्पूर्ण सहयोगी महानुभावहरूप्रति आयोजकका तर्फबाट धन्यवाद तथा आभार व्यक्त गर्नुभयो।

सडक सुरक्षा केवल ट्राफिक नियमको पालना मात्र नभई नागरिकको जीवन रक्षा, सार्वजनिक सम्पत्तिको संरक्षण र सभ्य समाज निर्माणसँग जोडिएको विषय हो। यही जिम्मेवारीबोधलाई व्यवहारमा उतार्दै युवाहरूले अघि सारेको यस अभियानले स्थानीय विकासमा नागरिक सहभागिता र सामूहिक पहलकदमीको महत्त्वलाई थप उजागर गरेको छ।

समस्या पहिचान गर्ने चेतना, समाधानका लागि अघि बढ्ने साहस र परिवर्तनका लागि एकजुट हुने सामूहिक भावना नै समाज विकासको वास्तविक आधार हो भन्ने सन्देश भजन चोकमा सम्पन्न यस अभियानले दिएको छ।

कमल – झापाको कमल गाउँपालिकामा नयाँ पुस्तालाई नेपाली मौलिक संस्कार, संस्कृति तथा धार्मिक परम्पराको महत्वबारे जानकारी गराउने उद्देश्यले स्मारिका सामुदायिक बोर्डिङ स्कुलको आयोजनामा ‘स्मारिका सांस्कृतिक संगम १.०’ कार्यक्रम सम्पन्न भएको छ।

कमल–५ स्थित विद्यालयको प्राङ्गणमा आयोजित कार्यक्रम कमल गाउँपालिकाकी उपाध्यक्ष प्रमिला न्यौपाने तवारीको प्रमुख आतिथ्यतामा सम्पन्न भएको हो। कार्यक्रममा कमल गाउँपालिकाभित्रका १४ वटा कीर्तन मण्डलीको सहभागिता रहेको थियो। प्रतियोगितामा सहभागी मण्डलीहरूले देउसी, भजनकीर्तन तथा मौलिक सांस्कृतिक प्रस्तुति दिएका थिए।

प्रतियोगितामा लक्ष्मी नारायण कीर्तन मण्डली प्रथम, श्रीकृष्णहरि कीर्तन मण्डली द्वितीय र गुह्येश्वरी कीर्तन मण्डली तृतीय भएका छन्। विजेता मण्डलीहरूले क्रमशः १५ हजार, १० हजार र ५ हजार रुपैयाँ नगद पुरस्कार प्राप्त गरेका छन्। कार्यक्रममा विद्यालयका फाउन्डर प्रिन्सिपल गुणराज गिरीले आधुनिकताको प्रभावसँगै नयाँ पुस्ता मौलिक संस्कार र संस्कृतिबाट टाढिँदै गएको अवस्थामा यस्ता कार्यक्रमले उनीहरूलाई आफ्नो पहिचान र परम्परासँग जोड्न महत्वपूर्ण भूमिका खेल्ने बताउनुभयो।

संस्कृति र परम्पराको संरक्षण अग्रज पुस्ताको मात्र नभई नयाँ पुस्ताको पनि साझा दायित्व भएको उहाँको भनाइ थियो। कार्यक्रमले स्थानीय कीर्तन मण्डलीहरूबीच आपसी सद्भाव, सहकार्य र सांस्कृतिक एकता अभिवृद्धि गर्नुका साथै स्थानीय कला तथा संस्कृतिको संरक्षण र प्रवर्द्धनमा योगदान पुर्यारउने अपेक्षा गरिएको छ। कार्यक्रममा स्थानीय संघसंस्थाका प्रमुख तथा प्रतिनिधिहरूको समेत उपस्थिति रहेको थियो।

झापाको शिवसताक्षी नगरपालिका–७ फात्तेफस्थित बालसेवा आधारभूत विद्यालयमा एकदिने निःशुल्क दन्त शिविर सम्पन्न भएको छ। विद्यालयको आयोजना तथा दमक थुलुङ डेन्टल केयर सेन्टरको प्राविधिक सहयोगमा शुक्रबार शिविर सञ्चालन गरिएको हो।

शिविरमा १५८ जना विद्यार्थीका साथै शिक्षक, कर्मचारी र अभिभावकको दन्त परीक्षण गरिएको विद्यालय व्यवस्थापन समितिका अध्यक्ष गोविन ल्वागुनले जानकारी दिनुभयो। परीक्षणका क्रममा ४१ जना विद्यार्थीको दाँत निकालिएको थियो भने करिब ६० प्रतिशत विद्यार्थीलाई तत्काल दन्त उपचार आवश्यक देखिएको दमक थुलुङ डेन्टलकी सञ्चालिका तथा वरिष्ठ दन्त रोग विशेषज्ञ डा. सोफिया थुलुङले बताउनुभयो।

शिविरमा विद्यार्थीलाई दाँत तथा मुखको सरसफाइबारे सचेतना प्रदान गर्नुका साथै कोलगेट र ब्रससमेत वितरण गरिएको थियो। विद्यालयले सामाजिक उत्तरदायित्वअन्तर्गत शिविर सञ्चालनमा सहयोग पुर्‍याएको भन्दै दमक थुलुङ डेन्टल केयर सेन्टर र डा. सोफिया थुलुङलाई कदरपत्र प्रदान गरेको छ।

विद्यालय व्यवस्थापन समितिका अध्यक्ष ल्वागुनको अध्यक्षतामा सम्पन्न कार्यक्रममा प्रधानाध्यापक वेणु कार्कीले स्वागत मन्तव्य राख्नुभएको थियो।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।