Author: Multi Media

दमक / पहिलो पाइला नेपाल दमक शाखाका सदस्य तुलसा सेवाकोटीका श्रीमान कुमार शिवाकोटीले आफ्नो जन्मदिन विशेष रूपमा मनाउँदै समाजसेवामा उदाहरणीय कार्य गरेका छन्। उनले दमक-९ स्थित बालबृद्ध आश्रममा विभिन्न आवश्यक सामग्रीहरू सहयोग गर्दै आफ्नो जन्मोत्सव मनाएका हुन्।

“जन्मदिनमा हुने फजुल खर्चलाई निरुत्साहित गर्दै यसरी सामाजिक उत्तरदायित्व पूरा गर्न चाहें,” शिवाकोटीले बताए। उनले आश्रममा बसोबास गरिरहेका बालबालिकाहरूका लागि आलु एक बोरा, दाल, डाइपर, पेय पदार्थ र डेड दर्जन हाफेन लगायतका सामग्रीहरू हस्तान्तरण गरेका थिए।

कार्यक्रम पहिलो पाइला नेपाल दमक शाखाका अध्यक्ष राजु निरौलाको अध्यक्षतामा सम्पन्न भएको थियो। दमक उद्योग वाणिज्य सङ्घका वरिष्ठ उपाध्यक्ष राजु खड्का प्रमुख अतिथिका रूपमा सहभागी थिए।

कार्यक्रमको सञ्चालन संस्थाका उपाध्यक्ष लवराज खड्काले गरेका थिए। हाल उक्त आश्रममा करिब ३५ जना बालबालिकाहरू आश्रित छन्। शिवाकोटीको यस कार्यले जन्मदिन जस्तो व्यक्तिगत अवसरलाई पनि समाजसेवामूलक कार्यमार्फत सार्थक बनाउने प्रेरणा दिएको छ।

आश्रमकी कार्यबाहक अध्यक्ष मेनुका बुढाथोकी, सचिव दुर्गा काफ्ले, पहिलो पाइला नेपाल दमक शाखाका सल्लाहकार गणेश प्रधान, केन्द्रीय सदस्य दिवस खतिवडा, लवराज खड्का, मेघनाथ फुयाल, सदस्यहरू सुजन गौतम, पदम राउत, सोनु चौधरी, मुना शिवाकोटी लगायतको उपस्थिति रहेको कार्यक्रममा आश्रमकी कार्यबाहक अध्यक्ष बुढाथोकीले संस्थाको सामाजिक उत्तरदायित्व र सेवा भावको प्रशंसा गरेकी थिइन्।

दमक / श्रीकृष्ण जन्माष्टमी तथा भदौ १ गते हुने भव्य रथयात्राको तयारीका लागि सोमबार दमकमा सरकारी तथा निजी कार्यालय, सुरक्षा निकाय, पत्रकार, विभिन्न संघसंस्था र धार्मिक व्यक्तित्वहरूको सहभागितामा बृहत छलफल कार्यक्रम सम्पन्न भएको छ

श्रीकृष्ण रथयात्रा व्यवस्था समिति दमकका अध्यक्ष रोहित आचार्यको अध्यक्षतामा सम्पन्न कार्यक्रममा दमक नगरपालिकाका मेयर रामकुमार थापा प्रमुख अतिथि रहनुभएको थियो। उपमेयर रेगिना प्रसाईं भट्टराई, दमक–८ का वडाध्यक्ष दिपेश दाहाल, दमक–९ का वडाध्यक्ष कुबेर भट्टराईलगायत जनप्रतिनिधिहरूको समेत उपस्थिति रहेको थियो।

कार्यक्रममा रथयात्राको कार्यतालिका सार्वजनिक गरिएको छ। समितिका अनुसार यस वर्ष श्रीकृष्ण जन्माष्टमी श्रावण ३१ गते पर्न आएको छ भने त्यसको भोलिपल्ट, भदौ १ गते आइतबार, रथयात्रा आयोजना गरिनेछ।

रथयात्रा मार्ग राधाकृष्ण मन्दिर दमकबाट सुरु भई हनुमान मन्दिर, पशुहाट, महेन्द्र राजमार्ग, दमक चोक, फर्निचर लाइन, पशुपति मन्दिर, शङ्खधर चोक, भृकुटी चोक, भानुभक्त चोक, फाल्गुनन्द चोक हुँदै पुनः राधाकृष्ण मन्दिरमा रथयात्रा समापन गरिनेछ।रथयात्राको संरक्षक संस्था दमक नगरपालिका रहनेछ।

छलफल कार्यक्रममा नेपाल विद्युत प्राधिकरण, दूरसञ्चार संस्था, नेपाल प्रहरी, सशस्त्र प्रहरी, इलाका प्रशासन, दमक अस्पताल, खानेपानी कार्यालय, बाणिज्य संघ, दमक जेसिज, पहिलो पाइला, लायन्स क्लब, रोटरी, जीवनचक्र नेपाल, रेडक्रस तथा पत्रकार महासंघ लगायतका प्रतिनिधिहरूको उपस्थिति रहेको थियो।

उनीहरूले विगतका वर्षहरूझैँ यो वर्ष पनि रथयात्रा सफल बनाउन पूर्ण सहयोग गर्ने प्रतिबद्धता व्यक्त गरे। सहभागी संस्थाहरूले रथयात्रा धार्मिक मात्र नभई सामाजिक सद्भावको प्रतीक भएकाले यसलाई प्रभावकारी, मर्यादित र व्यवस्थित बनाउनेतर्फ सबैले सक्दो साथ दिने जनाएका छन्।

दमक / नागपञ्चमी पर्व आज परम्पराअनुसार नागको पूजा अर्चना गरी घरका मूलढोकामा टाँसेर मनाइँँदै छ । यो पर्व प्रत्येक वर्ष श्रावण शुक्ल पञ्चमीको दिन मनाइन्छ ।

यसरी नागको तस्वीर टाँस्दा वर्षभर घरमा नाग, सर्प र बिच्छीलगायतका जीवले दुःख नदिनुका साथै अग्नि, मेघ र चट्याङको भयबाट पनि बच्न सकिन्छ भन्ने धार्मिक विश्वास रहेको छ । नाग पूजाको प्रचलन वैदिक कालदेखि नै सुरु भएको हो । वैदिक मान्यताअनुसार नागलाई सर्पको राजा मानिन्छ । नाग रिसाए भने पानीको अभाव हुने भएकाले पानीका लागि पनि नागलाई खुसी पार्न पूजा गर्ने परम्परा बसेको हो ।

प्रत्येक घरमा नाग रहेका हुन्छन् । घरको जगमुनि बसेका नाग रिसाई गएमा घरको जग नै भत्कन्छ भन्ने धार्मिक विश्वासमा पनि नाग पूजा गर्ने परम्परालाई निरन्तरता दिँदै आइएको हो । नागलाई विष्णु र शिवका रुपमा मान्ने प्रचलन वैदिक सनातन कालदेखि नै छ । भगवान् शिवले नागको माला लगाउने र भगवान् विष्णु जलमाथि शेष नागको शय्यामा फणको छाता ओढी शयन गर्ने भएकाले दुवै भगवानलाई नागका रुपमा मान्ने गरिएको हो ।

नागका बाह्र नाम भए पनि आठ कूलका आठवटा नागको पूजा गर्ने वैदिक सनातनकालदेखिको परम्परा छ । अनन्त, वासुकी, पद्म, महापद्म, तक्षक, कुलीर, कर्कट र शङ्ख गरी आठ नागलाई आजको दिन ब्राह्मण पुरोहितबाट पूजाआजा गरी घरको ढोकामाथि टाँसिन्छ । आजको दिन घरमा नाग टाँसेपछि खेतबारीमा खनजोत नगर्ने र नाग, सर्प लगायतका घिस्रने जनावरलाई मार्नुहुँदैन भन्ने मान्यता छ ।

वैज्ञानिकरुपमा प्रकृतिमा भएका बिषालु पदार्थलाई नाग, सर्पलगायतका जीवले शोषण गरी मानवलगायत अन्य जातिलाई बिषालु पदार्थको प्रभाव पर्न नदिने अनुसन्धानबाट पुष्टि गरेपछि ऋषिमुनिले नागजातिको पूजाआजा गर्ने रीत बसालेको विश्वास छ । नागपञ्चमीपछि वैदिक सनातनी हिन्दू धर्मावलम्बीका चाडबाडको याम सुरु हुन्छ ।

दमक / झापाको दमकबाट तेह्रथुमका लागि सेवा दिने पशुपति यातायात नामको गाडीले यात्रुहरूबाट गैरकानुनी रूपमा चर्को शुल्क असुल गर्ने गरेको पाइएको छ। प्र.१-०२-००१ख ९५६५ नम्बरको पशुपति यातायातको गाडीले दमक आकाशी पुलबाट बिहान ५ बजे छुट्ने क्रममा एक यात्रुबाट सामान ढुवानी वापत ५ सय मात्र लिने भनिएकोमा गन्तव्यस्थल तेह्रथुमको जिरखिम्तीमा पुगेर सो भन्दा दोब्बर रकम अर्थात् १ हजार असुल गरेको गुनासो आएको छ।

सामान पठाउने यात्री किरण गौतमका अनुसार, गन्तव्यमा पुगेर चालकले पहिले भनिएको भन्दा दोब्बर भाडा मागेपछि सम्पर्क गरेर सोधपुछ गर्न खोज्दा “जे गर्न सक्छस् गर” भनेर धम्की दिएको बताइएको छ। त्यतिमात्र होइन, बारम्बार सम्पर्क गर्न खोज्दा नम्बर समेत ब्लक गरेर सम्पर्कविहीन भएको गौतमले गुनासो गर्नुभयो। उक्त गाडीमा तीनवटा ३० केजी जाने बोरामा केही कपडा र सामान रहेको थियो भने टेबल सेट र एउटा ग्यास सिलिन्डर रहेको उहाँले बताउनुभयो।

यात्रुहरूले लामो समयदेखि पहाडी रुटमा यात्रा गर्दा यस्तो समस्याको सामना गर्दै आएको जनाउँदै आएका छन्। दमकबाट तेह्रथुमजस्ता पहाडी जिल्लामा जाने यात्रुहरूले बारम्बार असजिलो महसुस गर्दै आएका छन्। गाडी लाइनमा काम गर्दै आउनुहुने रमेश प्रसाईले गाडीको नामबारे जानकारी दिनुभएको थियो।

यस घटनाले सार्वजनिक यातायातमा निगरानी अभाव देखिएको छ। स्थानीय स्तरमै यातायात व्यवस्थापन समितिले तत्काल ध्यान दिनुपर्ने देखिएको छ।सम्बन्धित निकायलाई तत्काल कारबाही र सुधारका लागि चासो दिनुपर्ने देखिन्छ।

दमक – सामाजिक सेवामा सक्रिय संस्था पहिलो पाइला नेपाल दमक शाखाले श्रावण महिनाको दोस्रो सोमबारको अवसरमा प्रसाद वितरण कार्यक्रम सम्पन्न गरेको छ। दमक-६ स्थित पशुपति मन्दिरमा पूजाआजा गर्न आएका भक्तजनहरूलाई प्रसाद वितरण गर्दै संस्थाले धार्मिक एवं सामाजिक सेवामा सक्रियता जनाएको हो।

संस्थाका अध्यक्ष राजु निरौलाको अध्यक्षतामा सम्पन्न कार्यक्रमको प्रमुख अतिथि दमक नगरपालिकाकी उपमेयर रेगिना प्रसाई भट्टराई रहनु भएको थियो। कार्यक्रममा दमक उद्योग वाणिज्य संघका वरिष्ठ उपाध्यक्ष राजु खड्का, होटल व्यवसायी संघका महासचिव भूपेन्द्र न्यौपाने, पहिलो पाइला नेपालका केन्द्रीय सदस्य सुरेश बराल, दिवस खतिवडा, लवराज खड्का, मेघनाथ फुयाल, सल्लाहकार छवि घिमिरे, गौरादह शाखा अध्यक्ष भुपेन्द्र निरौला, मन्दिर व्यवस्थापन समितिका सचिव लक्ष्मण श्रेष्ठ, वाणिज्य संघ महिला उपाध्यक्ष सुषमा निरौला लगायतको उपस्थिति रहेको थियो।

कार्यक्रममा बोल्दै उपमेयर भट्टराईले पहिलो पाइलाले समाजमा पुर्‍याउँदै आएको योगदानको प्रशंसा गर्दै आगामी दिनहरूमा नगरपालिकाको तर्फबाट आवश्यक सहयोग र समन्वय गर्न प्रतिबद्धता जनाउनुभयो।

उक्त कार्यक्रमको सफल सञ्चालनमा पूर्वे खाद्य उद्योगका प्रोप्राइटर राजीव पूर्वे, वाणिज्य संघका वरिष्ठ उपाध्यक्ष राजु खड्का, सदस्य तुलसीराम तिम्सिना र व्यवसायी धीरज शाह लगायतले सहयोग गर्नुभएको थियो।

सामाजिक सेवा, धार्मिक मूल्य र सांस्कृतिक संरक्षणप्रति प्रतिबद्ध पहिलो पाइला नेपाल दमक शाखाले आगामी दिनमा समेत यस्ता जनकल्याणकारी कार्यलाई निरन्तरता दिने जनाएको छ।

दमक / झापाको कमल गाउँपालिकाका कर्मचारी चढेको सरकारी स्कारपियो गाडी आइतबार बिहान दमक–ताराबारी डिपु सडक खण्डमा दुर्घटनामा परेको छ।गाउँपालिकाको जिन्सी शाखा प्रमुख पर्वत भण्डारीसहित अर्का कर्मचारी सन्तोष गाैतम चढेको प्रदेश १–०१–००१ झ २७६ नम्बरको स्कारपियो सडकबाट अनियन्त्रित भई फुटपाथसम्म पुगेको हो। दुर्घटनामा गाडीको अगाडिको भाग पूर्ण रूपमा क्षतिग्रस्त भएको छ।

दुर्घटनापछि घाइते भएका दुवै जनालाई तत्काल दमकस्थित आम्दा अस्पतालमा स्वास्थ्य परीक्षण तथा उपचारका लागि पठाइएको इलाका प्रहरी कार्यालय दमकले जनाएको छ।उक्त गाडीमा सामान्यतया गाउँपालिकाका उपाध्यक्ष प्रमिला न्यौपाने तिवारी यात्रा गर्दै आउनुभएको भए पनि घटनाको समयमा उहाँ सवार नभएको जनाइएको छ।

इलाका प्रहरी कार्यालय दमकका डीएसपी रामप्रसाद तिमल्सिनाका अनुसार घटनास्थलमा अनुसन्धान भइरहेको छ। दुर्घटनाको कारण भने अहिलेसम्म स्पष्ट भएको छैन। गाडी सडक किनारबाट चिप्लिँदै पैदल यात्रु हिंड्ने ठाउँसम्म पुगेको थियो। प्रहरीले घटनाबारे थप अनुसन्धान गरिरहेको छ।

दमक / प्रेस चौतारी नेपाल झापाले आयोजना गरेको ‘अग्रजलाई सुनौं’ कार्यक्रममा झापाका अग्रज पत्रकार गञ्जबहादुर दाहालले पत्रकारिताका अनुभव र प्रेरणादायी भोगाईहरु नयाँ पुस्ताका पत्रकारहरु माझ सुनाउनु भएको छ ।

चौतारीको झापा शाखाले गत वैशाखदेखि सञ्चालन गर्दै आएकाे‘अग्रजलाई सुनौं’ कार्यक्रम अन्तर्गत याे दोस्रो श्रृंखलामा मुख्य वक्ताको रुपमा दाहाललाइ आमन्त्रित गरिएकाे हाे । बिगत ५० वर्ष अघिदेखि झापालाई कार्यक्षेत्र बनाएर पत्रकारितामा क्रियाशील दाहाल दमकबाट प्रकाशित हुने पूर्वसन्देश दैनिकका प्रधान सम्पादन तथा प्रकाशन हुन् ।

लेटर प्रेस हुँदै पत्रकारितामा प्रवेश गर्नुभएका दाहालले पत्रकारितामा भविष्य रहेको बताउनुभयो ।पत्रकारिताबाटै जीवनमा सामाजिक र आर्थिक उन्नति गरेको बताउँदै उहाँले नयाँ पुस्तालाई नयाँ ढंगबाट निष्ठापूर्वक निरन्तर काम गर्न सुझाव दिनुभयो । नयाँ पत्रकारहरुले पुरानै शैली अपनाइयो भने यो क्षेत्रमा प्रगति गर्न नसकिने उहाँको भनाई थियो ।

पत्रकारितामा प्रवेश गरेको केहि समयपछि मात्रै पेशाको बारेमा जानकारी पाएको बताउनुभयो । ‘काम गर्दै गएपछि मात्रै पत्रकारिताको बारेमा थाहा भयो,’ उहाँले थप्नुभयो ।अग्रजलाई सुन्न सहभागी नयाँ र अघिल्लो पुस्तासँग दाहालले पत्रकारितामा आफू नआएको भए बैंकिङ वा शिक्षण क्षेत्रमा जाने सम्भावना रहेको सुनाउनु भयो ।‘म पत्रकार बनेको थिइन भने एउटा राम्रो शिक्षक वा बैंकर्स बन्ने थिए,’ उहाँले भन्नुभयो –‘सुरु सुरुमा सम्मान पाएकै कारण पत्रकारितामा प्रेरित भएर लागियो । पछि त जीवन निर्वाह सहज हुनेगरी आर्जन पनि गरियो ।’

मासिक १२५ रुपैयाँमा शिक्षण समेत गर्नुभएका दाहालले अहिलेका पत्रकारहरुको लेखाईमा धेरै प्रभाव नरहेको गुनासो गर्नुभयो । उहाँले भन्नुभयो– ‘पहिले सानो समाचार बनाउँदा पनि ठुलै प्रभाव पर्ने थियो, अहिले पहिले जस्तो छैन ।’

कुनै पनि पेशामा निरन्तरता दिए मात्रै सफलता प्राप्त गर्न सकिने पत्रकार दाहालको धारणा छ । उहाँले भन्नुभयो– ‘निरन्तरताको मिहेनतले नै पूर्वसन्देश र मेरो पत्रकारिता सफल भएको हो । आज पनि मेरो पहिलो प्राथमिकता पत्रिकाकै काममा हुन्छ ।’

छापा पत्रकारिताको युग सकियो कि भन्ने टिप्पणीप्रति दाहालले असहमति जनाउँदै अझै पनि भविष्य रहेको बताउनु भयो । विज्ञापन र ग्राहक शुल्कबाट व्यवसायलाई अघि बढाइरहेको सुनाउनुभयो ।०६२/६३ को आन्दोलनहरुलाई स्मरण गर्दै शाही सेना र माओवादी विद्रोहीको दोहोरो दवदवा रहेका अवस्थामा समाचारमा सन्तुलन ल्याउनु चुनौतिपूर्ण रहेको विषयमा रोचक प्रसंगहरु सुनाउनु भएको थियो ।

दुई पटक प्रहरीले पत्रिका र छापाखानामा छापा मारे पनि पत्रिकार र छापाखानाको काम बन्द नगरेको उहाँले सुनाउनुभयो । पत्रिकामा आम नागरिकलाई धेरै विश्वास हुने भन्दै उहाँले पत्रकारहरुलाई खोज समाचारमा लाग्न आग्रह समेत गर्नुभयो ।झापामा अग्रज पत्रकारहरुको जीवन अनुभव, पत्रकारिता क्षेत्रमा गरेका संघर्षहरु सुन्नका लागि प्रेस चौतारी नेपाल झापाले सुरु गरेको ‘अग्रजलाई सुनौं’ कार्यक्रम प्रभावकारी रहेको सहभागीहरुले बताएका छन् ।

कार्यक्रमको अध्यक्षता गर्नुभएको प्रेस चौतारी झापाका अध्यक्ष प्रदिप परियारले अग्रज पुस्ताका अनुभव र भोगाइहरु नयाँ पुस्ताका लागि प्रेरणादायी हुने भएकाले हरेक तीन–तीन महिनामा कार्यक्रमलाई नियमित गरिने बताउनुभयो ।कार्यक्रममा अग्रज पत्रकार दाहाललाई सहभागीहरुले विभिन्न जिज्ञासा समेत राख्नु भएको थियो । दाहालले जिज्ञासाहरुको उत्तर दिनु भएको थियो ।

प्रेस चौतारी नेपालका केन्द्रीय सदस्य एवम् कोशी प्रदेशका सहइञ्चार्ज गोपाल काफ्लेको प्रमुख आतिथ्यतामा भएको कार्यक्रममा केन्द्रीय सदस्य एवम् झापा इञ्चार्ज माधव विद्रोही, केन्द्रीय सदस्यहरु सावित्रा दाहाल, शम्भु दाहाल, फाँट इञ्चार्ज मनकुमार गदाल, पत्रकार महासंघ कोशी प्रदेश उपाध्यक्ष अम्बिका भण्डारी न्यौपाने लगायतको आतिथ्यता रहेको थियो ।