Author: Multi Media

दमक, साउन १७ । राष्ट्रिय प्रजातन्त्र पार्टी (राप्रपा) को दमक नगर अधिवेशन यही आउँदो साउन २४ गते हुने भएको छ । अधिवेशनमा अध्यक्ष पदका लागि चार जना आकांक्षी रहेका छन् ।

दमक नगर अध्यक्ष पदका आकांक्षीहरूमा हेम सुवेदी, राजकुमार योङ्ग्या, तारा अधिकारी र नेत्र चौलागाईं रहेका छन् । पार्टीको १० वटै वडामा वडा अधिवेशन सम्पन्न भइसकेको र नगर अधिवेशनको तयारी अन्तिम चरणमा पुगेको छ ।

नगर अधिवेशनमा राप्रपाका केन्द्रीय अध्यक्ष राजेन्द्र लिङ्देनको प्रमुख आतिथ्य रहनेछ । दमकमा राप्रपाको संगठन सुदृढ बनाउन र नेतृत्व चयन गर्नका लागि अधिवेशन महत्वपूर्ण मानिएको छ । अधिवेशनमा कार्यकर्ता, शुभेच्छुक र नेताहरूको उल्लेख्य उपस्थिति रहने अपेक्षा गरिएको छ ।

दमक, साउन १५ – दमक नगरपालिका वडा नं. ७ ले ५० वर्ष माथिका जेष्ठ नागरिक, अशक्त तथा अति विपन्न वर्गका मधुमेह (सुगर) तथा उच्च रक्तचाप (ब्लड प्रेसर) रोगीलाई निःशुल्क औषधि वितरण सुरु गरेको छ। आधारभुत स्वास्थ केन्द्र दमक ७ मार्फत यश किसिमका औषधि वितरण सुरु गरिएको हो ।

स्थायी वासोबास प्रमाणित गरेका सेवाग्राहीलाई लक्षित गरी निःशुल्क रुपमा वितरण गरिने औषधिमा Metformin, Glimepiride, Sitagliptin, Linagliptin, Losartan, Amlodipine, Voglibose लगायतका १६ प्रकारका औषधिहरू रहेका छन्। आधारभुत स्वास्थ्य केन्द्र मार्फत अब देखी औषधि उपलब्ध गराइने दमक नगरपालिका वडा नं ७ का वडा सचिव योगेश भट्टराईले जानकारी दिनुभयो।

औषधि प्राप्त गर्न इच्छुक सेवाग्राहीले नागरिकता प्रमाणपत्रको प्रतिलिपि  र औषधि सेवा लिएको डाक्टरको प्रमाणित पुर्जी लगाएतका कागजातहरू पेश गर्नुपर्ने बताइएको छ। वडाध्यक्ष भीमप्रसाद पौडेलद्वारा हस्ताक्षरित सूचनामा दीर्घ रोगका बिरामीलाई सहज उपचारको पहुँच सुनिश्चित गर्न यस्तो कार्यक्रम ल्याइएको उल्लेख गरिएको छ।आधारभुत स्वास्थ केन्द्र दमक ७मा हप्ताको प्रत्येक बुधबार दमक अस्पतालबाट एमबिबिएस डक्टर आउनुहुनेछ साथै ओपिडी सेवा पनि निशुल्क रहेको छ।

झापा, १५ साउन / झापाको शिबसताक्षीको दुधेमा अन्तर्राष्ट्रिय आमन्त्रण नकआउट महिला फुटबल प्रतियोगिता हुने भएको छ । दूधेस्थित रंगशालामा कार्तिक १५ देखि २२ गतेसम्म अन्तर्राष्ट्रिय आमन्त्रण नकआउट फुटबल प्रतियोगिता हुने भएको हो ।

झापा महिला गोल्ड कपले आयोजना गरेको अन्तर्राष्ट्रिय आमन्त्रण नकआउट फुटबल प्रतियोगिताका बारेमा आज दुधेमा पत्रकार सम्मेलन गरेको छ । महिला फुटबलको विकास, प्रवर्द्धन र ग्रामीण क्षेत्रका महिला खेलाडी उत्पादनमा टेवा पुर्याउने उद्देश्यसहित प्रतियोगिता आयोजना गरिएको पत्रकार सम्मेलनमा आयोजक संस्था झापा महिला गोल्ड कपले जनाएको छ ।

नेपालमै सर्वाधिक पुरस्कार राशीको तयारीप्रतियोगिताको विजेता टिमलाई नेपालमै सर्वाधिक पुरस्कार राशी प्रदान गरिने आयोजकको तयारी छ । प्रतियोगितामा उत्कृष्ट गोलकिपर, डिफेन्डर, मिडफिल्डर, प्रशिक्षक तथा हरेक खेलको प्लेयर अफ दी म्याचलाई नगदसहित ट्रफी प्रदान गरिनेछ ।

प्रतियोगितामा आयोजकको एक टिमसहित नेपालका तीन विभागीय टिम (नेपाल आर्मी, नेपाल एपीएफ, नेपाल पुलिस), भारत र भुटानबाट एक–एक टिम तथा नेपालकै ए डिभिजनका दुई टिम गरी कुल आठ टिमको सहभागिता रहने आयोजनले जनाएको छ । यद्यपी अहिले पुरस्कार राशी कति हुने भन्ने खुलाइएको छैन ।

आयोजकको अनुसार नेपालमा सञ्चालित महिला गोल्डकपमा राखिने गरेको राशी भन्दा माथि हुने जनाएको छ । आयोजकले अब फेरी गरिने पत्रकार सम्मेलनमा पुरस्कार राशी खुलाइने जनाएको छ ।

दुधे रंगशालाको स्तरोन्नति, अत्याधुनिक प्याराफिट निर्माण र मैदान तयारीसहित प्रतियोगिता सञ्चालनमा करिब एक करोड रुपैयाँ खर्च हुने अनुमान गरिएको छ। अन्तराष्टिय आमन्त्रण महिला फुटबल प्रतियोगितालाई भव्य र सफल बनाउन उद्योगी, व्यवसायी, व्यापारी महासंघ, पत्रकार तथा मिडिया हाउसहरूको सहकार्यको अपिल गरिएको छ।

साउन १५ , दमक — दमक नगरपालिकाले होटल तथा खाद्य व्यवसायमा कडाइ गर्दै नियमित अनुगमनलाई तीव्रता दिएको छ। दमक नगरपालिकाकी उपप्रमुख तथा अनुगमन समिति संयोजक रेगिना भट्टराई प्रसाईको नेतृत्वमा बिहीबार अनुगमन टोलीले विभिन्न होटल, निरीक्षण गरेको हो।

अनुगमनको क्रममा दमकमा रहेको संगम स्वीट्समा अत्यधिक तेलको प्रयोग र सरसफाइमा लापरवाही भेटिएकोले १५,००० जरिवाना गरिएको उपप्रमुख प्रसाईले जानकारी दिइन्। त्यस्तै, गोर्खा किचनमा म्याद गुज्रिएको सामग्री फेला परेको र त्यसलाई कारबाहीको दायरामा ल्याइएको उनले बताइन्।

उपप्रमुख प्रसाईका अनुसार नगरवासीको स्वास्थ्यलाई केन्द्रमा राखेर नगरपालिकाले अनुगमनलाई निरन्तरता दिइरहेको छ। “मानव स्वास्थ्यमा हानिकारक हुने खाद्यवस्तु पाइएमा नगरपालिकाको मापदण्डअनुसार रु. १५,००० देखि ५०,००० सम्म जरिवाना गरिन्छ,” उनले भनिन्।

अनुगमन टोलीमा नगर प्रहरी प्रमुख रुद्रजंग कार्की, इलाका प्रहरी कार्यालय दमकका प्रतिनिधि, उद्योग वाणिज्य सङ्घका कार्यालय प्रमुख निरज बिष्ट, खाद्य निरीक्षक रिजा हुमागाई, दमक नगरपालिकाकी खाद्य अधिकृत लक्ष्मी न्यौपानी लगायतको सहभागिता थियो।

दमक नगरपालिकाले अनियमितता पाइएको व्यवसायहरूलाई सचेत गराउँदै, आगामी दिनमा अझ कडा कदम चाल्ने चेतावनी दिएको छ। स्थानीय तहको यस्तो सक्रियता नागरिकको स्वास्थ्य सुरक्षाका लागि स्वागतयोग्य कदमका रूपमा हेरिएको छ।

१५ साउन, दमक / निर्माणाधीन पूर्वपश्चिम लोकमार्गको काँकरभिट्टा–लौकही सडक आयोजनाअन्तर्गत बिर्तामोड नगरपालिकाका बासिन्दालाई एचआईभी/एड्स, यौन रोग र मानव बेचविखनबारे सचेत गराइएको छ।

बिहीबार बिर्तामोड नगरपालिकाको सभाहलमा भौतिक पूर्वाधार तथा यातायात मन्त्रालय र एशियाली विकास बैंक (ADB) को आर्थिक सहयोगमा राजमार्ग अभिवृद्धि आयोजनाले यो सचेतना कार्यक्रम सञ्चालन गरेको हो। कार्यक्रममा लैङ्गिक समानता तथा सामाजिक समावेशीकरण (GESI) सम्बन्धी विषयमा केन्द्रित भएर स्थानीयलाई जानकारी दिइएको थियो।

कार्यक्रममा बिर्तामोड नगरपालिका वडा नं. १, २, ३, ४, ५ र ६ का सडकसँग जोडिएर बसोबास गर्ने महिला तथा पुरुषलाई बाहिरबाट आएका मजदुरहरूमार्फत हुन सक्ने एचआईभी/एड्स, यौन रोग र मानव बेचविखनको सम्भावित जोखिमबारे जानकारी गराइएको हो। काँकरभिट्टा–लौकही सडक आयोजना अन्तरगत लैङ्गिक समानता तथा सामाजिक समावेशीकरण विज्ञ जीवन सिंहले यो जानकारी दिनुभयो।

कार्यक्रममा सामाजिक अभियन्ता दीपा चौधरीले एचआईभी/एड्स र यौनजन्य सङ्क्रमणबारे, सीता रानाले यौन हिंसाबारे र इलाका प्रहरी कार्यालय अनारमनीका सई प्रदीप आले मगरले मानव बेचविखनबारे सहभागीलाई प्रोजेक्टरमार्फत प्रस्ट जानकारी गराएका थिए।

विज्ञ सिंहका अनुसार निर्माण क्षेत्रमा बाहिरबाट आउने मजदुरहरूले महिलामाथि यौनजन्य हिंसा, दुव्र्यवहार र बच्चाहरूलाई पनि प्रभावित पार्न सक्ने भएकाले यस किसिमका गतिविधि रोक्न समुदाय स्वयं सचेत हुनु आवश्यक छ।

कार्यक्रमका प्रमुख अतिथि बिर्तामोड नगरपालिकाकी प्रमुख पवित्रा महतरा प्रसाईंले सडक निर्माणका लागि विभिन्न ठाउँबाट मजदुरहरू आएका कारण सम्भावित जोखिम बढी हुने बताउँदै नगरवासी स्वयं सचेत हुनुपर्ने र आयोजनाले पनि गम्भीर भएर ध्यान दिनुपर्नेमा जोड दिनुभयो। उहाँले कार्यक्रममा सहभागीलाई सिकेको कुरा आफ्ना साथीभाइ, परिवार र समुदायमा बाँड्न आग्रह गर्नुभयो।

कार्यक्रममा काँकरभिट्टा–लौकही सडक आयोजना कार्यालयका इन्जिनियर आश्रय महत, बिर्तामोड नगरपालिकाका उपप्रमुख नगेन्द्र संग्रौला, विभिन्न सामाजिक संघ–संस्थाका प्रतिनिधि र सडकसँग जोडिएका स्थानीय बासिन्दा गरी करिब १५० भन्दा बढी सहभागी थिए।

काँकरभिट्टा–लौकही सडक आयोजना अन्तरगत झापा, मोरङ र सुनसरी जिल्लाका विभिन्न पालिकामा पनि यस किसिमका सचेतना कार्यक्रमहरू सञ्चालन भइरहेका छन्। कार्यक्रममा सहजीकरण गर्दै विज्ञ जीवन सिंहले यस्ता कार्यक्रमले समुदायमा जोखिमबारे जागरुकता बढाउने बताउनुभयो।

१५ साउन दमक / पाँचथर फिदिम नगरपालिका–७ निवासी धनञ्जय भट्टराईले गैर आवासीय नेपाली संघ (NRNA) राष्ट्रिय समन्वय परिषद् अमेरिका २०२५–२७ कार्यकालको बोर्ड अफ डाइरेक्टर (BOD) पदमा उम्मेदवारी घोषणा गर्नुभएको छ। पिता कुलप्रसाद भट्टराई र माता चन्द्रमाया भट्टराईका चार छोरामध्ये जेठा छोरा धनञ्जय भट्टराईको जन्म सामान्य परिवारमा भए पनि उहाँले धार्मिक र सामाजिक सेवामा उल्लेखनीय योगदान दिँदै आउनुभएको छ। उहाँको एक दिदी र एक बहिनी पनि हुनुहुन्छ।

नेपालमा रहँदा धार्मिक गतिविधिमा सक्रिय रहेका भट्टराई हाल अमेरिकाको ओहायो राज्यलाई कर्मभूमिका रूपमा स्थापित गर्दै सामाजिक तथा धार्मिक गतिविधिमा सक्रिय रहनुभएको छ। हालै उहाँ पहिलो पाइला नेपाल दमक शाखाको सोमबारको मन्दिरमा प्रसाद वितरण कार्यक्रममा सहयोगीको रूपमा जोडिनु हुने जानकारी प्राप्त भएको छ।

धनञ्जय भट्टराई जागरण एकेडेमी एण्ड रिट्रिट सेन्टरसँग मोटिभेसनल स्पिकर तथा ट्रेनरको रूपमा समेत आबद्ध हुनुहुन्छ। उहाँले NRNA NCC अमेरिकाको आगामी अगस्ट १६ र १७ तारिखमा हुने निर्वाचनमा BOD पदमा उम्मेदवारी दिँदै नेपाली समुदायको हितका लागि समर्पित ढंगले काम गर्ने प्रतिवद्धता जनाउनुभएको छ। “संस्थाको लक्ष्य, अभियान र विधानप्रति पूर्ण इमानदारीका साथ काम गर्दै समयमै प्रभावकारी सेवा प्रवाह गर्ने मेरो उद्देश्य हो”, उम्मेदवार भट्टराईले बताउनुभयो।

उहाँले अमूल्य मतका साथै सुझाव र सल्लाहका लागि सम्पूर्ण नेपाली समुदायसँग अपेक्षा राख्नुभएको छ।भट्टराई श्रीमती शोभा र छोरी अमायरासँग ओहायोमा बसोबास गर्दै आउनुभएको छ। उहाँको समर्पणले अमेरिका बस्ने नेपाली समुदाय मात्र नभइ नेपालमै पनि सकारात्मक प्रभाव पार्दै आएको छ।