Blog

साउन २९ , दमक / मोरङको पथरी बजारमा बिहिवार साँझ करिब ७ः ३० बजे नम्बर नखुलेको मिनि ट्रकले ठक्कर दिँदा एक महिलाको मृ,त्यु भएको छ ।

पूर्व–पश्चिम राजमार्गको पथरीस्थित गोर्खा डिपार्टमेन्ट स्टोर अगाडि भएको उक्त दु,र्घट,ना भएको थियो । दुर्घटनामा परि उपचारका लागी लैजाने क्रममा ती महिलाको मृ,त्यु भएको हो ।
मृ,त्यु हुने महिलाको पहिचान खुल्न नसकेको ईलाका प्रहरी कार्यालय पथरीका प्रमुख प्रहरी नायब उपरीक्षक तुलसीराम अर्यालले जानकारी दिए ।

स्थानीयका अनुसार मृ,तक महिला करिब ४० वर्षकी थिइन् र उनी बेवारिसे अवस्थामा बजार वरपर घुमफिर गर्ने गर्थिन्। प्रहरीले जनाएअनुसार ठक्कर दिने मिनि ट्रकको नम्बर खुल्न नसकेको र घ,टनापछि फरार भएको छ।

दुर्घटना गराई फरार भएको ट्रक भाउन्नेमा दुर्घटनामा परेको अवस्थामा प्रहरीले फेला पारेको छ । दुर्घटनाग्रस्त सवारी साधनको चालक भने फरार रहेको र घटनाको विस्तृत अनुसन्धान गरिरहेको प्रहरीले जनाएको छ।

दमक, झापा – दमक उद्योग वाणिज्य संघको आसन्न निर्वाचनमा राजु खड्काले अध्यक्ष पदको उम्मेदवारी घोषणा गरेका छन्। विगत तीन कार्यकालदेखि संघमा विभिन्न पदमा रहेर व्यवसायीको समस्या समाधानमा प्रत्यक्ष संलग्न खड्काले अब नेतृत्वको जिम्मेवारी मात्र होइन, ठोस परिणामका आधारमा आफ्नो कार्यक्षमता प्रमाणित गर्ने समय आएको बताएका छन्।

खड्काले दमकका व्यवसायीहरूका मुख्य समस्या प्रविधिमा सीमित पहुँच, बजार व्यवस्थापन र सडक व्यवसायीको दीर्घकालीन समाधानको अभाव, कर तथा प्रशासनिक प्रक्रियाको जटिलता, र नयाँ व्यवसाय सुरु गर्नेहरूका लागि परामर्श तथा तालिमको कमी रहेको उल्लेख गरे।

उनले प्रस्तुत गरेको समाधान योजनामा साना व्यवसायीलाई विस्थापित नगरी व्यवस्थित गर्न छुट्टै जोन, मिनी मार्केट वा फुड कोर्ट मोडल ल्याउने, डिजिटल पेमेंट र अनलाइन बजार विस्तारका तालिम सञ्चालन गर्ने, संघमार्फत एकल ढोका सेवा प्रणाली लागू गर्ने, र युवा–महिला उद्यमीका लागि स्टार्टअप फण्ड तथा ब्याज सहुलियत ऋणको व्यवस्था गर्ने प्रस्ताव समावेश छन्।

“दमकलाई पूर्वको व्यवसायिक हब बनाउने मेरो भिजन हो। यहाँ साना–ठूला सबै व्यापारीको आवाज सुन्ने, प्रविधिमा जोड दिने, र व्यवसायमैत्री वातावरण सिर्जना गर्ने योजना बनाएको छु,” खड्काले भने। उनले नेतृत्वको अर्थ आदेश दिने होइन, तलबाट सुनेर समाधान ल्याउने हो भन्नेमा आफू दृढ रहेको पनि जोडे।

साउन २९, काठमाडौँ / सरकारले धानको न्यूनतम समर्थन मूल्य बढाएको छ । मन्त्रिपरिषद्ले चालू आर्थिक वर्षका लागि तोकेको बर्खे धानको न्यूनतम समर्थन मूल्य अनुसार धानको मूल्य बढेको हो ।

बैठकले मोटा धानको मूल्य प्रतिक्विन्टल ३ हजार ४ सय ६३ रुपैयाँ ८१ पैसा तोकेको छ । गएको वर्ष मोटा धानको न्यूनतम समर्थन मूल्य ३ हजार ४ सय १० रुपैयाँ थियो ।

यस्तै मध्यम धानको न्यूनतम समर्थन मूल्य प्रतिक्विन्टल ३ हजार ६ सय २८ रुपैयाँ ३३ पैसा तोकेको छ । गएको वर्ष मध्यम धानको न्यूनतम मूल्य ३ हजार ५ सय ८० रुपैयाँ तोकेको थियो ।

केही वर्ष अघिसम्म किसानले धान भित्र्याउन शुरू गर्दा पनि सरकारले न्यूनतम समर्थन मूल्य नतोक्दा किसान ठगिने समस्या थियो । तर पछिल्ला केही वर्षदेखि सरकारले चाँडै मूल्य तोक्न थालेको छ ।

साउन २८, काठमाडौँ / झापाको बालुवाटारस्थित सरकारी जग्गा व्यक्तिको नाममा पास गराइएको प्रकरणमा विशेष अदालत काठमाडौंले माओवादी नेता रेवतराज पुरी (गगन) सहित ९ जनालाई दोषी ठहर गरेको छ।

विशेष अदालतका अध्यक्ष टेकनारायण कुँवर तथा न्यायाधीशद्वय मुरारीबाबु श्रेष्ठ र रितेन्द्र थापाको संयुक्त इजलासले सात जना मालपोत तथा नापी कार्यालयका कर्मचारी र दुई जना जग्गाधनीलाई दोषी ठहर गर्दै कैद र जरिवानाको सजाय सुनाएको हो।मुख्य अभियुक्तका रूपमा ठहर गरिएका पुरीलाई एक वर्ष कैद र २० लाख ८३ हजार ६ सय ७१ रुपैयाँ जरिवाना तोकिएको छ। उनलाई भ्रष्टाचार निवारण ऐन २०५९ को दफा ८ (१) (ज) अनुसार मूल प्रतिवादी सरहको सजाय सुनाइएको हो।

अदालतले नापी कार्यालय झापाका तत्कालीन प्रमुख नापी अधिकृत शशिकान्त झा, सर्वेक्षक सीताराम यादव, विन्देश्वर पञ्जियार, नापी अधिकृत रामदेव मण्डल धानुक, सर्वेक्षक विष्णुदेव यादव, अमिन ललितकुमार मण्डल, नायब सुब्बा रुद्रप्रसाद श्रेष्ठ, सर्वेक्षक रामकुमार दास र गणेशकुमार धिमालको संलग्नतामा सरकारी जग्गा गैरकानुनी रूपमा व्यक्तिको नाममा दर्ता भएको ठहर गरिएको छ।उनीहरूलाई भूमिकाअनुसार तीन महिना देखि एक वर्षसम्म कैद र विभिन्न मात्रामा जरिवाना तोकिएको अदालतले जनाएको छ।

साउन २८ , दमक / झापाको दमकस्थित खुशी–खुस्बु सीप विकास तालिम केन्द्रले आज दमक इलाका प्रहरी कार्यालयमा स्वास्थ्य शिविर सम्पन्न गरेको छ। स्वास्थ्य शिविर ओम शान्ति डेन्टल, बिर्ताज्योति आँखा अस्पताल र दमक हस्पिटल एण्ड रिसर्च सेन्टरको प्राविधिक सहयोगमा सम्पन्न भएको हो।

शिविरको उद्घाटन दमक इलाका प्रहरी कार्यालयका डीएसपी रामप्रसाद तिम्सिनाको प्रमुख आतिथ्यतामा गरिएको थियो। कार्यक्रममा बिर्ताज्योति आँखा अस्पतालका डा. मोती बराल, ओम शान्ति डेन्टल हस्पिटलका डा.सिपी गैरे लगायतको उपस्थिति थियो।

खुस्बु ब्युटी पार्लरकी सञ्चालिका जमुना निरौला अधिकारीले राष्ट्रसेवक प्रहरीको आँखा, दाँत तथा स्वास्थ्य परीक्षण गर्ने अवसर पाउँदा खुशी लागेको बताइन्। उनले आफ्नो पार्लर र तालिम केन्द्रले विभिन्न सामाजिक कार्य गर्दै आएको जानकारी दिइन्।

प्रमुख अतिथि डीएसपी तिम्सिनाले प्रहरीको स्वास्थ्य परीक्षणमा सहयोग पुर्‍याउने तथा कार्यक्रम आयोजना गर्ने सबै संघ–संस्थाप्रति आभार प्रकट गरे। उक्त शिविरबाट ६० भन्दा बढीको स्वास्थ्य परीक्षण गरिएको छ।

साउन २८, दमक – झापाको दमकका मिडिया सञ्चालक र पत्रकारहरुलाई सामाजिक सुरक्षा कोष र लेखा व्यवस्थापनबारे अभिमुखिकरण गरिएको छ। प्रेस चौतारी नेपाल झापाले आयोजना गरेको उक्त कार्यक्रममा दमक क्षेत्रका मिडिया सञ्चालक तथा पत्रकारहरुको सक्रिय सहभागिता रहेको थियो।

कार्यक्रममा सामाजिक सुरक्षा कोष कोशी प्रदेश प्रमुख दिपकराज भट्ट र आन्तरिक राजश्व कार्यालय दमकका प्रमुख ज्ञानेन्द्र प्रसाद यादवले सहजीकरण गरेका थिए। भट्टले योगदानमा आधारित सामाजिक सुरक्षा कोषको स्थापना, उद्देश्य, सञ्चालन प्रक्रिया, योगदानको दर, योजनाहरू र प्राप्त हुने सुविधाबारे विस्तृत जानकारी दिए। उनका अनुसार श्रमिक र रोजगारदाताले संयुक्त रूपमा योगदान गर्ने यस सरकारी योजनामा मासिक तलवको ३१ प्रतिशत जम्मा हुन्छ, जसमा ११ प्रतिशत श्रमिक र २० प्रतिशत रोजगारदाताबाट योगदान हुने गर्दछ।

भट्टका अनुसार कोषमा आवद्ध श्रमिकले दुर्घटना विमा, स्वास्थ्य उपचार, मातृत्व तथा शिशु स्याहार भत्ता, घातक रोग उपचार खर्च, दीर्घकालीन पेन्सन लगायतका सेवा सुविधा पाउँछन्। यसमा औपचारिक, अनौपचारिक क्षेत्रका श्रमिक तथा वैदेशिक रोजगारीमा रहेका व्यक्तिहरू पनि सहभागी हुन सक्ने उल्लेख गरियो।

यस्तै, यादवले लेखा व्यवस्थापन र कर प्रणालीबारे जानकारी दिँदै कारोबार अनुसार कर तिर्नुपर्ने, समयमा कर नबुझाउँदा जरिवाना तिर्नु पर्ने र बिल–विजकको उचित व्यवस्था आवश्यक पर्ने विषयमा सहभागीलाई सचेत गराए। कार्यक्रमका प्रमुख अतिथि प्रेस चौतारी नेपालका केन्द्रीय सचिव बिक्रम लुईटेलले सामाजिक सुरक्षा कोषमा आवद्ध हुनु श्रमिकको दीर्घकालीन सुरक्षाका लागि आवश्यक भएको उल्लेख गर्दै निम्न आय वर्गका लागि यो योजना महत्वपूर्ण हुने बताए।

कार्यक्रम प्रेस चौतारी नेपाल झापाका अध्यक्ष प्रदीप परियारको अध्यक्षतामा सम्पन्न भएको हो। कार्यक्रममा चौतारीका केन्द्रीय सदस्य तथा कोशी प्रदेश सहइञ्चार्ज गोपाल काफ्ले, केन्द्रीय सदस्य विष्णु पोखरेल, अग्रज पत्रकार गञ्जबहादुर दाहाल, हिमशिखर टिभीका सञ्चालक ध्रुव न्यौपाने, प्रदेश उपाध्यक्ष युवराज विवश, पत्रकार महासंघ झापाका उपाध्यक्ष सुब्रत न्यौपाने, सहसचिव रमेश तिवारी, प्रेस युनियन झापाका सभापति गिरीराज भट्टराई लगायतको सहभागिता रहेको थियो।