Blog

वैशाख २८, दमक / झापाको दमकमा सामाजिक तथा सामुदायिक क्षेत्रमा सक्रिय रोटरी क्लब अफ दमकले शिक्षा क्षेत्रमा सहयोगलाई निरन्तरता दिएको छ । क्लबले सोमबार दमक–७ स्थित राधाकृष्ण मन्दिर परिसरमा रहेको पृथ्वी माध्यमिक विद्यालयलाई ३० थान डेक्स बेञ्च हस्तान्तरण गरेको हो । विद्यालय र रोटरी क्लब अफ दमकबीचको सहकार्यमा आयोजित संक्षिप्त कार्यक्रममा विद्यार्थीहरूलाई सहज वातावरणमा बसेर पठनपाठन गर्न सहयोग पुग्ने उद्देश्यले फर्निचर सामग्री उपलब्ध गराइएको रोटरी क्लब अफ दमकका सहसचिव देबेन्द्र बरालले जानकारी दिनुभयो ।

रोटरी डिष्ट्रिक्ट ३२९२ नेपालको सहयोगमा सञ्चालन गरिएको “ह्याप्पी स्कुल” कार्यक्रमअन्तर्गत उक्त सहयोग प्रदान गरिएको हो । कार्यक्रम रोटरी क्लब अफ दमकका अध्यक्ष केशवकुमार अग्रवालको अध्यक्षता तथा दमक नगरपालिकाका प्रमुख रामकुमार थापाको प्रमुख आतिथ्यतामा सम्पन्न भएको थियो ।कार्यक्रममा बोल्दै नगर प्रमुख थापाले दमकको विकास र परिवर्तनका लागि नगरपालिका विभिन्न संघ–संस्थासँग सहकार्य गरेर अघि बढिरहेको बताउनुभयो । उहाँले शिक्षा क्षेत्रको सुधारका लागि यस्ता सामाजिक संस्थाहरूको भूमिका महत्वपूर्ण हुने धारणा राख्नुभयो ।

कार्यक्रम संयोजक तथा रोटरी क्लब अफ दमकका पूर्व अध्यक्ष सन्दिप चापागाईले विद्यालय तथा बालबालिकाको क्षमता विकासमा टेवा पुर्‍याउने उद्देश्यले “ह्याप्पी स्कुल” कार्यक्रम सञ्चालन गरिएको बताउनुभयो । उहाँका अनुसार यसअघि पनि सोही विद्यालयमा शुद्ध खानेपानीसहितको सौचालय निर्माण गरेर विद्यालयलाई हस्तान्तरण गरिएको थियो । रोटरी क्लब अफ दमकका अध्यक्ष अग्रवालले गुणस्तरीय शिक्षाबाट नै असल नागरिक उत्पादन हुने भन्दै विद्यार्थीहरूको अध्ययन वातावरणलाई सुरक्षित, सहज र व्यवस्थित बनाउन सहयोग गरिएको बताउनुभयो ।

कार्यक्रममा दमक–७ का वडाध्यक्ष भीम पौडेल, शिक्षक अभिभावक संघका अध्यक्ष लालसुन्दर राई, दमक रोट्रयाक्ट क्लबका अध्यक्ष दीवाकर पञ्चकोटी, दमक उद्योग वाणिज्य संघका अध्यक्ष गोपाल गुरागाईं, विद्यालयका प्रधानाध्यापक विष्णुकुमार राई, सहायक प्रधानाध्यापक अमृत श्रेष्ठ, डा. लेखनाथ न्यौपाने, रोटरी क्लब अफ दमकका पूर्वअध्यक्ष नबीन श्रेष्ठ, बिक्रम शाह लगायत रोटरीयन, शिक्षक–शिक्षिका तथा विद्यार्थीहरूको उपस्थिति रहेको थियो । विद्यालय व्यवस्थापन समितिका अध्यक्ष मोहनकुमार थापाले स्वागत मन्तव्य व्यक्त गर्नुभएको कार्यक्रमको सञ्चालन रोटरी क्लब अफ दमकका सहसचिव देबेन्द्र बरालले गर्नुभएको थियो ।

वैशाख २६, दमक / दमक–५ स्थित सर्वोदय अंग्रेजी माध्यमिक विद्यालय मा होटल मेनेजमेन्ट (कुलिनरी आर्ट) विषयको अध्ययन–अध्यापन सम्बन्धी अन्तरक्रियात्मक कार्यक्रम सम्पन्न भएको छ। विद्यालयले चालु शैक्षिक सत्रदेखि कक्षा ११ मा होटल मेनेजमेन्ट विषय सञ्चालन गर्न लागेको सन्दर्भमा विद्यार्थीहरू र विषय विज्ञबीच छलफल कार्यक्रम आयोजना गरिएको हो। कार्यक्रममा अन्तर्राष्ट्रिय नेपाली सेफ सोसाइटीका उपाध्यक्ष समेत रहेका साइकुमार शर्मा प्रमुख अतिथिका रूपमा सहभागी भएका थिए। उनले विश्व बजारमा पाककला विज्ञ तथा सेफहरूको माग तीव्र रूपमा बढिरहेको उल्लेख गर्दै नेपाली युवा विद्यार्थीहरूले कुलिनरी आर्ट विषय अध्ययन गरी व्यवहारिक रूपमा दक्ष बन्नुपर्ने आवश्यकता औंल्याए।

अनिल सुवेदी को अध्यक्षतामा सम्पन्न कार्यक्रममा सर्वोदयका विद्यार्थीका साथै विभिन्न विद्यालयबाट कक्षा ११ अध्ययनको तयारी गरिरहेका विद्यार्थीहरूको सहभागिता रहेको थियो। विद्यालयका प्रिन्सिपल नविन योगी ले पछिल्लो समय विद्यार्थी तथा अभिभावकहरूको रोजाइमा कुलिनरी आर्ट विषय पर्दै गएको बताउँदै विद्यालयले होटल मेनेजमेन्टसँगै कम्प्युटर साइन्स विषयको समेत अध्यापन सुरु गर्न लागेको जानकारी दिए।

विद्यालय व्यवस्थापनका अनुसार उच्च माध्यमिक तहका विद्यार्थीलाई गुणस्तरीय तथा प्रविधिमैत्री शिक्षा प्रदान गर्ने उद्देश्यले भौतिक पूर्वाधार तथा दक्ष विषय शिक्षकमा लगानी बढाइएको छ। प्रयोगात्मक तथा सीपमूलक शिक्षालाई प्रभावकारी बनाउन अत्याधुनिक कुलिनरी ल्याब, कम्प्युटर ल्याब तथा विज्ञान प्रयोगशालाको व्यवस्था गरिएको विद्यालयले जनाएको छ। विद्यार्थीको सुरक्षा तथा नियमित हाजिरी व्यवस्थापनलाई प्रविधिमैत्री बनाउन RFID कार्ड प्रणाली र विद्यालयको आफ्नै मोबाइल एप सञ्चालनमा ल्याइएको विद्यालय प्रशासनले जनाएको छ। उक्त प्रणालीमार्फत विद्यार्थी विद्यालय प्रवेश वा बाहिरिनेबित्तिकै अभिभावकले मोबाइलमार्फत तत्काल जानकारी प्राप्त गर्ने व्यवस्था गरिएको छ।

वैशाख २५, दमक / झापाको दमक नगरपालिका वडा नम्बर ६ स्थित गायत्री विद्यापीठ स्कूल ले नयाँ व्यवस्थापन समिति, नयाँ ऊर्जा तथा प्रविधिमैत्री शिक्षासहित नयाँ शैक्षिक सत्र सुरु गरेको छ। २०६२ सालमा स्थापना भएको विद्यालयले छोटो समयमै गुणस्तरीय शिक्षा प्रदान गर्दै आएको विद्यालय प्रशासनले जनाएको छ। विद्यालयमा हाल Pre-Nursery देखि कक्षा ८ सम्म नयाँ भर्ना खुला गरिएको छ। विद्यालयले केवल किताबी शिक्षा मात्र नभई विद्यार्थीको भविष्य निर्माणमा केन्द्रित भएर पठनपाठन सञ्चालन गरिरहेको जनाएको छ।

विद्यालयका प्रधानाध्यापक आशिष श्रेष्ठ का अनुसार अहिलेको पुस्तालाई मध्यनजर गर्दै विद्यालयले यसै शैक्षिक सत्रदेखि Robotics र Artificial Intelligence (AI) सम्बन्धी कक्षाहरू सञ्चालनमा ल्याएको छ। विद्यार्थीको मनोविज्ञान बुझेर बालमैत्री तथा स्नेहपूर्ण वातावरणमा शिक्षण गरिने उहाँले बताउनुभयो।उहाँका अनुसार विद्यालयले समय सापेक्ष पाठ्यक्रम, प्रयोगात्मक सिकाइ, प्रविधिको सही प्रयोग तथा अतिरिक्त क्रियाकलाप (ECA/CCA) लाई विशेष प्राथमिकता दिएको छ। यसमार्फत विद्यार्थीलाई २१औँ शताब्दीका चुनौती सामना गर्न सक्षम बनाइने लक्ष्य रहेको विद्यालयको भनाइ छ।

विद्यालयमा अध्ययनरत विद्यार्थी रेजिना विश्वकर्मा ले विद्यालयमा किताबी ज्ञानसँगै व्यवहारिक तथा घरेलु जीवन उपयोगी शिक्षा पनि सिकाइने भएकाले आफूले गायत्री विद्यापीठ रोजेको बताइन्। त्यस्तै अर्का विद्यार्थी सञ्जीव चौधरी ले पहिलेको व्यवस्थापन समितिको समयमा विद्यालयको अवस्था कमजोर रहे पनि नयाँ व्यवस्थापन आएपछि विद्यालयको मुहार नै फेरिएको प्रतिक्रिया दिए।अभिभावक सन्तोष तिवारी ले नयाँ व्यवस्थापनपछि विद्यालयप्रति अभिभावकको विश्वास बढेको बताउँदै अभिभावकहरूले ढुक्क भएर आफ्ना बालबालिका भर्ना गराउन सक्ने धारणा राख्नुभयो। विद्यालयले अभिभावक नभएका तथा विशेष परिस्थिति भएका विद्यार्थीलाई निःशुल्क पठनपाठनको व्यवस्था समेत गर्दै आएको प्रधानाध्यापक श्रेष्ठले जानकारी दिनुभयो।

वैशाख २४, दमक / सर्वोदय इङ्लिस बोर्डिङ सेकेन्डरी स्कुल ले यस शैक्षिक सत्रदेखि कक्षा ११ र १२ को पठनपाठन पूर्ण रूपमा सञ्चालनमा ल्याएको छ। विद्यालयले विशेषगरी होटल म्यानेजमेन्ट र कम्प्युटर साइन्स विषयलाई प्राथमिकतामा राख्दै अध्ययन सुरु गरेको जनाएको छ। उच्च माध्यमिक तहका विद्यार्थीलाई गुणस्तरीय तथा प्रविधिमैत्री शिक्षा प्रदान गर्ने उद्देश्यले विद्यालयले भौतिक पूर्वाधारमा समेत थप लगानी गरेको जनाएको छ। विद्यालयका अनुसार + 2 का सबै कक्षाकोठा एसी जडानसहित फुली फर्निसड बनाइएका छन्।

प्रयोगात्मक तथा सीपमूलक शिक्षालाई प्रभावकारी बनाउन अत्याधुनिक कुलिनरी ल्याब, कम्प्युटर ल्याब र साइन्स ल्याबको व्यवस्था गरिएको विद्यालयका प्रधानाध्यापक नवीन योगीले जानकारी दिनुभएको छ। साथै विद्यार्थीको सुरक्षा र नियमित हाजिरी व्यवस्थापनका लागि RFID कार्ड तथा विद्यालयको आफ्नै मोबाइल एप सञ्चालनमा ल्याइएको छ।

यस प्रणालीमार्फत विद्यार्थी विद्यालय प्रवेश तथा बाहिरिनेबित्तिकै अभिभावकले मोबाइलमा तत्काल जानकारी प्राप्त गर्ने व्यवस्था गरिएको विद्यालय प्रशासनले जनाएको छ। विद्यालयका प्रिन्सिपल नबिन योगी ले विद्यालयलाई ‘सिक्ने स्कुल’ का रूपमा विकास गर्दै विद्यार्थीलाई किताबी ज्ञानसँगै जीवनोपयोगी सीप सिकाउने लक्ष्यका साथ थप सुविधा विस्तार गरिएको बताउनुभयो। विद्यालयले विद्यार्थीका नर्सिङ सेवा समेत उपलब्ध गराउँदै आएको जनाएको छ।