Blog

२२ वैशाख २०८३, गौरादह / पहिलो पाईला नेपाल गोरादह शाखाको पहिलो शाखा अधिवेशन मङ्गलबार सम्पन्न भएको छ। राधाकृष्ण मन्दिर ग्वालडुबाको सभाहलमा आयोजना गरिएको प्रथम शाखा अधिवेशनबाट भूपेन्द्र निरौला दोस्रो कार्यकालको लागि अध्यक्षमा पूर्ण निर्विरोध निर्वाचित भएका छन्। त्यसैगरी उपाध्यक्षमा बाबुराम अधिकारी सचिवमा प्रदिप धमला र कोषाध्यक्षमा पोसङ्का बास्तोला निर्वाचित भएका छन्। त्यसैगरी सदस्यहरूमा यमुना खत्री, चाहना योगी, भुवन कटवाल, पुनमदेवी पौडेल र लोकनाथ रेग्मी निर्वाचित भएका छन्। कार्यक्रमको उद्घाटन राष्ट्रिय गायक सीताराम ताजपुरियाले पानसमा बत्ति बालेर गर्नुभएको थियो भने संस्थाकी सदस्य पोसङ्का बास्तोलाले स्वागत मन्तव्य राख्नुभएको थियो ।

कार्यक्रममा शुभकामना मन्तव्य राख्ने अतिथिहरू वेदनिधि रेग्मी, प्रेमप्रसाद धमला, दमक शाखाका अध्यक्ष राजु निरौला र भरत निरौलाले संस्थासँग सहकार्य गर्दै अगाडि बढ्ने कुरा व्यक्त गर्नुभयो । संस्थाले गर्दै आएका सामाजिक कार्यहरूमा कार्यक्रम संयोजकको भूमिका निर्वाह गर्नुहुने पदाधिकारीहरुमा संस्थाका पूर्व प्रथम उपाध्यक्ष निशा पौडेल, द्वितीय उपाध्यक्ष बाबुराम अधिकारी, पूर्व सह कोषाध्यक्ष एलिजा भेटवाल पूर्व सदस्य पोसङ्का बास्तोला, सदस्य यमुना खत्रीलाई सम्मानपत्रद्वारा सम्मानित गरिएको थियो भने उत्कृष्ट सदस्यको अवार्ड चाहना योगीले प्राप्त गर्नुभएको थियो।

त्यस्तै संस्थाले गर्दै आएका कार्यहरूलाई संचार माध्यमद्वारा जनतामाझ पुर्याउनका लागि अतुलनीय भूमिका निर्वाह गर्नुहुने मल्टिमिडिया डट कम दमकका प्रधान सम्पादक सुजन गौतमलाई समेत सम्मानपत्रद्वारा सम्मानित गरिएको थियो। कार्यक्रमका प्रमुख अतिथि राष्ट्रिय गायक सीताराम ताजपुरियाले गौरादहको बजारैमा माया हाम्रो बस्यो भन्ने गीत गाउनुभएको थियो भने उक्त अधिवेशन कार्यक्रममा पहिलो पाइला नेपाल केन्द्रीय सह कोषाध्यक्ष दिवस खतिवडा निर्वाचन अधिकृतको रुपमा रही निर्वाचन सम्बन्धी सम्पूर्ण प्रक्रियाहरू पूरा गर्दै शपथ ग्रहण सम्पन्न भएको उक्त कार्यक्रमको सञ्चालन सचिव प्रदिप धमलाले गर्नुभएको थियो ।

वैशाख २१, दमक / दमक नगरपालिका वडा नम्बर ७ ले वडावासीको जीवनस्तर उकास्ने उद्देश्यसहित विभिन्न सीपमूलक तालिम सञ्चालन गरेको छ। विशेषगरी विपन्न, गरिब, विद्यार्थी तथा महिलालाई लक्षित गर्दै सिलाइ–कटाइ, कम्प्युटर र ड्राइभिङ तालिम सञ्चालनमा ल्याइएको हो। वडा कार्यालयका अनुसार गत चैत २० गतेदेखि वडा कार्यालयको हलमा ६५ दिने सिलाइ–कटाइ तालिम सञ्चालन भइरहेको छ। वडा सचिव योगेश भट्टराईका अनुसार १ लाख रुपैयाँ बजेटमा सञ्चालन भइरहेको उक्त तालिममा १५ जना सहभागी छन्। प्रशिक्षक कञ्चन अधिकारीले सहभागीहरूलाई भोटे सिलाउने तरिका, सादा कुर्ता–सुरुवाल, पेटिकोट तथा ब्लाउज सिलाउने सीप सिकाइरहेको जानकारी दिनुभयो।

त्यसैगरी, वडा नम्बर ७ कै आयोजनामा वैशाख ७ गतेदेखि ९० दिने कम्प्युटर अपरेटर तालिम सुरु गरिएको वडा सदस्य अतित वान्तवा राईले जानकारी दिनुभयो। तालिममा नेपाली तथा अंग्रेजी टाइपिङ, माइक्रोसफ्ट अफिस, ग्राफिक डिजाइन, फोटोशप लगायतका विषय समेटिएका छन्। उक्त तालिममा २५ जना युवा विद्यार्थी सहभागी रहेका छन् भने तालिमको सहजीकरण नोबेल कम्प्युटर एण्ड बरिष्टा ट्रेनिङ सेन्टर दमकले गरिरहेको छ।

यस्तै, वडा कार्यालयकै पहलमा ड्राइभिङ तालिम पनि सञ्चालन भइरहेको छ। वडा सचिव भट्टराईका अनुसार ५० प्रतिशत लागत सहभागीसँग र ५० प्रतिशत वडा कार्यालयको लगानीमा एक महिने तालिम सञ्चालन गरिएको हो। वैशाख ९ गतेदेखि सुरु भएको उक्त तालिममा २० जना सहभागी छन्। तालिमको सहजीकरण दमक ड्राइभिङ सेन्टरले गरिरहेको जनाइएको छ। वडाले सञ्चालन गरेका यस्ता सीपमूलक तालिमहरूले स्थानीय बासिन्दालाई आत्मनिर्भर बन्न सहयोग पुग्ने अपेक्षा गरिएको छ।

वैशाख २१, दमक / मोरङको उर्लाबारीमा दुई पाङ्ग्रे सवारी साधनका लागि टिभिएस ब्राण्डको ‘स्मार्ट एक्सचेन्ज अफर’ सुरु भएको छ। वैशाख २० गतेदेखि २५ गतेसम्म सञ्चालन हुने उक्त अफर पहिलो दिनमै उत्साहजनक देखिएको छ, जहाँ ३५ वटा युनिट बिक्री भएको आयोजकले जनाएको छ। उर्लाबारी–७ स्थित मुख्य चौकको दक्षिणपट्टि इटहरा रोडमा आइतबारदेखि सञ्चालनमा आएको यो अफरमा पुराना स्कुटर वा मोटरसाइकल साटेर नयाँ टिभिएस सवारी खरिद गर्न सकिने व्यवस्था गरिएको छ।

कार्यक्रममा बोल्दै उर्लाबारीका युवा व्यवसायी सचिन शाक्यले नेपालमा विद्युतीय सवारी साधनको प्रयोग बढ्दै जाँदा इन्धन खपत घटिरहेको बताए। उनले विद्युत उत्पादनमा समृद्ध नेपालले अब विद्युतीय सवारीलाई प्राथमिकतामा राख्दै आवश्यक नीति तथा प्रक्रिया अगाडि बढाउनुपर्नेमा जोड दिए। दुर्गा इन्टरप्राइजेजका प्रबन्ध निर्देशक बालचन्द्र कार्कीले उर्लाबारीमै पहिलो पटक यति बृहत् एक्सचेन्ज अफर आयोजना गरिएको जानकारी दिँदै ग्राहकलाई अवसरको लाभ लिन आग्रह गरे।

उनका अनुसार ग्राहकहरूले पाँच वर्षसम्म निःशुल्क पेट्रोल योजना, दैनिक अधिकतम पाँच लाख रुपैयाँसम्म नगद छुट, नागरिकताको आधारमा तुरुन्तै वित्तीय सुविधा तथा न्यूनतम २ हजार ९ सय ६७ रुपैयाँ मासिक किस्ताबाट सुरु हुने योजना प्राप्त गर्न सक्नेछन्। साथै, निःशुल्क हेल्मेटको व्यवस्था पनि गरिएको छ।

एक्सचेन्ज मूल्याङ्कनमा विशेष सुविधा प्रदान गरिएको आयोजकले जनाएको छ। पुराना सवारी साधनको उचित मूल्याङ्कनसँगै ग्राहकहरूले ६ हजारदेखि ५ लाख रुपैयाँसम्म अतिरिक्त नगद छुट पाउनेछन्।टिभिएस ब्राण्ड नेपाली बजारमा भरपर्दो इन्जिन क्षमता, उत्कृष्ट माइलेज, आधुनिक डिजाइन तथा नवीन प्रविधिका कारण लोकप्रिय रहेको बताइएको छ। कार्यक्रममा टिभिएसका नयाँ मोडलहरूको प्रदर्शनसमेत गरिएको छ।

वैशाख १५, दमक / दमक नगरपालिकाका प्रमुख राम थापा ले जिल्ला प्रशासन कार्यालय झापाको पछिल्लो गतिविधिप्रति असन्तुष्टि जनाउँदै कडा अभिव्यक्ति दिएका छन्। सुकुम्बासी बस्ती तथा सरकारी जग्गा अतिक्रमणको विषयमा प्रशासनले स्थानीय सरकारलाई पत्र पठाएको सन्दर्भमा प्रतिक्रिया दिँदै मेयर थापाले “जिप्रका नगर सरकारको तालुकदार निकाय होइन” भन्ने स्पष्ट धारणा सार्वजनिक गरेका हुन्।

उनले नेपालको संघीय संरचनाअनुसार स्थानीय तह स्वतन्त्र सरकार भएको उल्लेख गर्दै प्रशासनले निर्देशनात्मक शैलीमा पत्राचार गर्नु अधिकार क्षेत्र मिचिएको संकेत भएको बताए। “समन्वय आवश्यक हुन्छ, तर एकतर्फी आदेश स्वीकार्य हुँदैन,” मेयर थापाको भनाइ रहेको छ।

मेयर थापाले सुकुम्बासी व्यवस्थापन जस्तो संवेदनशील विषयमा स्थानीय सरकारसँग सहकार्य र समन्वयमार्फत अघि बढ्न प्रशासनलाई आग्रह गरेका छन्। साथै, स्थानीय सरकारको अधिकार र स्वायत्तताको सम्मान गर्नुपर्नेमा उनले जोड दिएका छन्। उक्त अभिव्यक्तिपछि झापामा प्रशासन र स्थानीय तहबीचको अधिकार सीमारेखा र समन्वयको विषय पुनः बहसको केन्द्रमा आएको छ।

वैशाख १२, गौरादह /  पहिलो पाइला नेपाल गौरादह शाखाको आयोजनामा बृहत निःशुल्क स्वास्थ्य शिविर सम्पन्न भएको छ। गौरादह नगरपालिका वडा नं. ८ को आर्थिक सहयोग तथा कोपिला फर्टिलिटी एण्ड वुमन क्लिनिक, आमा डेन्टल र अस्मिता फार्मेसी दमकको प्राविधिक सहयोगमा कार्यक्रम सञ्चालन गरिएको हो।

शाखा अध्यक्ष भुपेन्द्र निरौलाको अध्यक्षतामा सम्पन्न कार्यक्रममा द्वितीय उपाध्यक्ष बाबुराम अधिकारी संयोजक रहेका थिए। कार्यक्रमको उद्घाटन वडा नं. ८ का वडाध्यक्ष गणेश कुमार राजवंशीले व्यानर वाचन गरी गरेका थिए। कार्यक्रममा विशिष्ट अतिथिको रूपमा शाखा प्रतिनिधि दिवस खतिवडा उपस्थित रहेका थिए भने सदस्य पोसङ्का बास्तोलाले स्वागत मन्तव्य व्यक्त गरेका थिए।

कार्यक्रममा आमा डेन्टलका प्रोप्राइटर अर्जुन कुमार श्रेष्ठ, कोपिला फर्टिलिटी एण्ड वुमन्स क्लिनिककी डा. सीता राई, अस्मिता फार्मेसीका जीवस शाह, समाजसेवी भरत निरौला लगायतको उपस्थिति रहेको थियो। शाखा प्रतिनिधि दिवस खतिवडाले संस्थाका विभिन्न सामाजिक अभियानबारे जानकारी गराउँदै गौरादह शाखाले उत्कृष्ट कार्यक्रम गर्दै आएको बताए। त्यस्तै, प्राविधिक सहयोगी संस्थाका प्रतिनिधिहरूले आगामी दिनमा पनि सहकार्य गर्ने प्रतिबद्धता व्यक्त गरेका थिए।

शिविरमा १०१ जना सेवाग्राहीहरूले दन्त सेवा, फिजिसियन सेवा, हाडजोर्नी सेवा तथा महिला विशेषज्ञ सेवा लिएका थिए। कार्यक्रमकै अवसरमा अस्पताल टोलीहरू र समाजसेवी भरत निरौलालाई सम्मानपत्र प्रदान गरिएको थियो भने वडा कार्यालयलाई मायाको चिनो हस्तान्तरण गरिएको थियो।

कार्यक्रममा प्रथम उपाध्यक्ष निशा पौडेल दहाल, कोषाध्यक्ष सुस्मिता भुजेल, सदस्यहरू यमुना खत्री, भुवन कटुवाल, चाहना योगी, लोकनाथ रेग्मी तथा स्काउटका सदस्यहरू नेश्मा प्रसाईं र मनिषा कार्कीको उपस्थिति रहेको थियो। कार्यक्रमको सञ्चालन सचिव प्रदीप धमलाले गरेका थिए।

वैशाख १०, दमक / झापाको दमक नगरपालिका वडा नम्बर ४ स्थित ताराबारी सडक खण्डमा बिहीबार सवारी चालकहरूको स्वास्थ्य परीक्षण तथा यान्त्रिक चेकजाँच कार्यक्रम सञ्चालन गरिएको छ। सवारी साधनहरूको बाक्लो भिड र सुरक्षाकर्मीहरूको उपस्थितिमा चेकिङ अभियान तीव्र रूपमा अघि बढाइएको हो। ईलाका प्रहरी कार्यालय दमक, जिल्ला ट्राफिक प्रहरी कार्यालय बिर्तामोड तथा ट्राफिक प्रहरी कार्यालय दमकको संयुक्त आयोजनामा सञ्चालन गरिएको उक्त कार्यक्रममा दमक नगरपालिका र दमक अस्पतालले सहयोग गरेका थिए।

चेकिङका क्रममा ५ जना लागुऔषध सेवन (ला.प.से) र १ जना मादक पदार्थ सेवन (मा.पा.से) गरेको अवस्थामा फेला परेका चालकलाई पक्राउ गरिएको दमक ट्राफिक प्रहरी प्रमुख मनोज खड्गाले जानकारी दिए। पक्राउ परेका ६ जनालाई ईलाका प्रहरी कार्यालय दमकमा राखी आवश्यक कानुनी कारबाही प्रक्रिया अघि बढाइएको छ। प्रहरीका अनुसार सार्वजनिक बस चालकहरूको लापरवाहीका कारण यात्रुहरूको ज्यान जोखिममा पर्ने भएकाले विशेष रूपमा सार्वजनिक सवारी साधनहरूमा निगरानी बढाइएको हो। सार्वजनिक बसहरूको लापरवाहीले गर्दा यात्रुको ज्यान जोखिममा पर्ने भएकाले सार्वजनिक बसहरूमा चेकिङ गरिएको इलाका प्रहरी कार्यालयका प्रहरी नायब निरीक्षक नवीन राईले बताउनुभयो ।

चेकिङका क्रममा डल्फिन यातायात र नागरिक यातायातका केही चालकहरू लागुऔषध सेवन गरेको अवस्थामा भेटिएका थिए। यसले सयौं यात्रुको सुरक्षामा गम्भीर जोखिम निम्त्याउने देखिएको प्रहरीको भनाइ छ।स्थानीय सवारी चालक निरज कुमार अधिकारीले यस्तो चेकिङ अभियान नियमित रूपमा सञ्चालन भए सवारी व्यवस्थापन थप व्यवस्थित र सुरक्षित हुने विश्वास व्यक्त गरेका छन्। प्रहरीले यस्ता अभियान आगामी दिनमा पनि निरन्तर जारी रहने जनाएको छ।