दमक / रोटरी क्लब अफ दमकको आयोजनामा शनिबार दमकमा बृहत वृक्षारोपण कार्यक्रम सम्पन्न गरिएको छ। रोटरी डिष्टृक्ट ३२९२ नेपाल–भुटानको स्वच्छ वातावरण अभियानअन्तर्गत ५० हजार बिरुवा रोप्ने लक्ष्य अनुरूप दमक क्षेत्रमा २४० बिरुवा रोपिएको क्लबका पूर्व अध्यक्ष सन्दिप चापागाईंले जानकारी दिनुभयो।
वातावरण संरक्षण र हरियाली प्रवर्द्धनमा टेवा पु-याउने उद्देश्यले सम्पन्न उक्त वृक्षारोपण कार्यक्रममा दमक नगरपालिका, वडा नम्बर ७ कार्यालय, पहिलो पाइला नेपाल, जीवन चक्र समाज, डिभिजन वन कार्यालय (भिलझिले नर्सरी) लगायतका संस्थाहरूको सहकार्य रहेको थियो।
कार्यक्रममा रोटरी क्लब अफ दमकका अध्यक्ष केशवकुमार अग्रवालले वृक्षारोपणले स्थानीय वातावरण संरक्षणसँगै क्षेत्रको सौन्दर्य अभिवृद्धिमा समेत योगदान पुर्याउने विश्वास व्यक्त गर्नुभयो।
जीवनचक्र समाजका संस्थापक अध्यक्ष गणेश गौतमका अनुसार सामुदायिक सहकार्यमा सम्पन्न कार्यक्रमबाट पर्यावरणीय चेतना अभिवृद्धि भएको छ।
कार्यक्रममा दमक नगरपालिकाकी उपप्रमुख रेगिना भट्टराई प्रमुख अतिथिको रूपमा उपस्थित हुनुहुन्थ्यो। त्यस्तै वडा नम्बर ७ का वडाध्यक्ष भीमप्रसाद पौडेल, रोटरी तथा रोट्रयाक क्लबका पदाधिकारी, पूर्व अध्यक्षहरू, समाजसेवी तथा स्थानीयवासीको उल्लेखनीय उपस्थिति रहेको थियो।
कार्यक्रम सञ्चालन रोटरी क्लबकी सचिव अम्बिका न्यौपानेले गर्नुभएको थियो। रोटरी क्लब स्थापना भएको १२० औं वर्ष पुगेको अवसरमा गरिएको यो कार्यक्रम सामाजिक उत्तरदायित्वप्रति क्लबको प्रतिबद्धता झल्काउने आयोजनाका रूपमा हेरिएको छ।
Oplus_0
