साउन १९, दमक / सामुदायिक शिक्षा सुधारका लागि सकारात्मक काम अघि बढाएको झापाको कमल गाउँपालिकाले पालिका भित्रका बिद्यालयहरुमा शिक्षक दरबन्दी मिलान सम्बन्धि कार्यदल गठन गरेको छ ।
गाउँपालिकाको शिक्षा समितिका अध्यक्ष अध्यक्ष समेत रहनु भएका गाउँपालिका अध्यक्ष हुकुमसिंह राईको अध्यक्षतामा आज बसेको समितिको बैठकले स्थानीय सामुदायिक विद्यालयको अनुगमन र पारदर्शिताका लागि गाउँपालिका कार्यालयको पहुँचमा रहने गरी पहिलो चरणमा १० वटा माध्यमिक तहका विद्यालयमा इ–हाजिरी प्रणाली लागू गर्ने र स्थानीय पाठ्यक्रम निर्माणका लागि पाठ्यक्रम मस्यौदा समिति समेत गठन गर्ने निर्णय गरेको छ । इ- हाजिरी प्रणालीको पहुँच अब सिधै गाउँपालिकाको कार्यालयमा रहने छ– बैठकपछि अध्यक्ष हुकुमसिंह राईले भन्नु भयो ।
प्रणाली जडान पश्चात शिक्षक तथा विद्यालयको उपस्थिति स्थिति र अनुशासनको नियमित र प्रभावकारी निगरानी सम्भव हुने अपेक्षा गरिएको छ । बैठकमा शिक्षा शाखा प्रतिनिधिहरू, विद्यालय व्यवस्थापन समितिका पदाधिकारी, शिक्षक तथा अन्य सरोकारवालाहरूको समेत उपस्थिति रहेको थियो । गाउँपालिकाले यस अघि सार्वजनिक सरोकारको बिषय भन्दै गाउँपालिकाका जनप्रतिनिधि र कर्मचारीहरुका छोराछोरीहरुको बिद्यालय तहको अध्ययन गर्ने बिद्यालयको सूची सार्वजनिक गरेको थियो ।
पालिकाले यस अघि सामुदायिक बिद्यालय हाता भित्र शैक्षिक क्रियाकलाप बाहेकका अन्य कुनै पनि राजनीतिक दल, संघ संस्था आदीका गतिबिधिहरु सञ्चालनमा रोक लगाउने निर्णय गरिसकेको छ । त्यस्तै पालिका भित्रका सामुदायिक बिद्यालयमा बिद्यार्थीहरुको आकर्षण बढाउन नृत्य प्रशिक्षण, भलिबल खेल प्रशिक्षण जस्ता आकर्षक र प्रभावकारी कामहरु गर्दै आएको छ भने सामुदायिक बिद्यालयहरुमा स्मार्ट बोर्डको प्रयोग गरी डिजिटल कक्षा सञ्चालनको अभ्यास गर्नुका साथै बिद्यालयको भौतिक पूर्वाधार बिकाससँगै सबै बिद्यालयका भवन एकै रंग (पहेंलो) बनाउने काम गरिरहेको छ ।
सामुदायिक बिद्यालयको गत बर्षको एसइइ परीक्षामा कमल गाउँपालिकाका ७१ प्रतिशत बिद्यार्थीहरु ग्रेडेड भएका छन् । कमल गाउँपालिका एसइइ परीक्षामा झापा जिल्लामै सबैभन्दा बढी बिद्यार्थी प्रतिशत ग्रेडेडको सूचीमा पार्न सफल पालिकाका रुपमा रहेको गाउँपालिकाको दाबी छ ।
