भदौ २ , दमक / दमक–३ दुम्से निवासी ३२ वर्षीया कजिनसरा कार्कीको उपचारका लागि पहिलो पाइला नेपाल दमक शाखाका अध्यक्ष राजु निरौलाले जन्मदिनको अवसर पारेर रु. ५ हजार सहयोग गरेका छन्।

कार्कीलाई Chronic Kidney Disease (CKD–5) भएको र हाल नियमित रूपमा हिमोडायलाइसिस गराइरहेको अस्पतालले जनाएको छ। चिकित्सकहरूले तुरुन्तै मिर्गौला प्रत्यारोपण (Kidney Transplant) गर्न सिफारिस गरेपछि जीवन रक्षा अभियान सुरु गरिएको हो। हाल उहाँ काठमाडौंस्थित टिचिङ अस्पतालमा उपचाररत छन्।

अत्यन्तै महँगो उपचार खर्च जुटाउन सहयोग अभियान सञ्चालन भइरहेका बेला जन्मदिनमा सहयोग हस्तान्तरण गर्दै मल्टिमिडिया डट कमलाई अध्यक्ष निरौलाले भने, “जन्मदिनमा फजुल खर्च गर्नु भन्दा बिरामी व्यक्तिलाई सहयोग गर्दा वास्तविक अर्थमा खुशी मिल्छ।”

राजु निरौला लामो समयदेखि सहकारीकर्मी तथा समाजसेवीको रुपमा सक्रिय रहँदै आएका छन्। उनले पहिलो पाइला नेपाल दमक शाखा मार्फत गरिब तथा जेहेनदार विद्यार्थीलाई स्टेशनरी, झोला, कपडा लगायतका सामग्री वितरण गर्दै आएका छन्। समाजसेवामा उनको योगदान उल्लेखनीय रहेको छ ।