भदौ १०, दमक / महिला तथा बालबालिकाको क्षेत्रमा सक्रिय सुन्दर समाज नेपालले सोमबार दमकमा तीज मिलन कार्यक्रम सम्पन्न गरेको छ।दमकस्थित रातो पुल नजिकै खाजा एक्सप्रेस होटलमा आयोजित कार्यक्रममा महिला प्रहरी, नगर महिला प्रहरी, महिला पत्रकार र महिला अधिकारकर्मीहरुको सहभागिता थियो।
कार्यक्रममा समाजकी अध्यक्ष बिन्दु सिटौला (लक्की) ले यसवर्षको तीजलाई महिलाबीच आपसी एकता र सहकार्यको भावना जागृत गर्ने उद्देश्यसहित आयोजना गरिएको बताइन्। उनले तीज केवल रमाइलो मात्र नभई महिलाको अवस्था, समस्या, प्रगति र जीवन भोगाइबारे अन्तरंग साझेदारी गर्ने अवसरको रूपमा पनि लिन सकिनेमा जोड दिइन्।
उनका अनुसार न्याय, समानता, सशक्तिकरण र अधिकारका लागि महिलालाई अघि बढाउन यस्ता कार्यक्रमले सकारात्मक सन्देश फैलाउने अपेक्षा गरिएको छ।समाजकी आजीवन सदस्य तथा दमककी अग्रणी महिला नेत्री दुर्गा काफ्लको प्रमुख आतिथ्यतामा सम्पन्न कार्यक्रममा इलाका प्रहरी कार्यालय दमककी प्रहरी हवलदार देबी बिष्टलगायतले शुभकामना मन्तव्य दिएका थिए।
समाजकी उपाध्यक्ष झरना लक्समले स्वागत मन्तव्य दिएकी थिइन् भने कार्यक्रमको सञ्चालन पूर्वअध्यक्ष रुपा सेलिङले गरेकी थिइन्। कार्यक्रममा प्रहरी सहायक निरीक्षक मनु लावोती, अनु चेम्जोङ ताजपुरिया, विमला जोशी, पुनम सुब्बा, स्वेता सुब्बा, महिमा किरण, दीपा लिम्बु लगायतका महिलाको सहभागिता रहेको थियो।
