भदौ १८ , काठमाडौँ / नेकपा एमालेका सांसद सुहाङ नेम्वाङले सवारीसाधनमा इम्बोस्ड नम्बर प्लेट जडान गर्ने कार्य तत्काल स्थगन गर्न सरकारसँग माग गरेका छन् । बुधबार प्रतिनिधि सभा बैठकमा बोल्दै सांसद नेम्वाङले इम्बोस्ड नम्बर प्लेट अनिवार्य गर्दा जनतालाई अनावश्यक आर्थिक भार र झन्झट थपिएको भन्दै यसको औचित्यमाथि प्रश्न उठाए ।
उनले हजारौँ नागरिकले वर्षौँ कुर्नुपर्दा पनि लाइसेन्स पाउन नसकेको, कर तिर्न दिनभर लाइनमा बस्नुपरेको अवस्थामा इम्बोस्ड नम्बर प्लेट अनिवार्य गरिनु जनविरोधी भएको तर्क गरे । “सवारी प्रयोग गर्ने आम जनतामाथि पहिले नै धेरै भार छ । गाडी किन्दा उच्च कर, हरेक वर्ष अनिवार्य बिमा, सडक कर तिर्न लामो लाइन र लाइसेन्स बनाउन फार्म, परीक्षा र लामो प्रतीक्षा । यस्तो अवस्थामा इम्बोस्ड नम्बर प्लेट किन अनिवार्य गरिँदै छ ?” उनले प्रश्न गरे ।
नेम्वाङले नम्बर प्लेट अंग्रेजीमै हुनुपर्ने प्रावधानमाथि पनि आपत्ति जनाए । उनले आम जनताले भाषा र भावनासँग जोडेर यस विषयमा प्रश्न उठाइरहेको बताए । “जनताले हाम्रो भाषा र भावनासँग जोडेर पनि प्रश्न उठाएका छन् । अंग्रेजीमै किन हुनुपर्यो ?” उनले थपे ।
इम्बोस्ड नम्बर प्लेटको कार्यान्वयन तत्काल स्थगित गरी आवश्यक पूर्वाधार, प्रविधि र चेतना सुनिश्चित गरेपछि मात्र चरणबद्ध रूपमा अघि बढ्न उनले सरकारलाई आग्रह गरे ।
