साउन १५ , दमक — दमक नगरपालिकाले होटल तथा खाद्य व्यवसायमा कडाइ गर्दै नियमित अनुगमनलाई तीव्रता दिएको छ। दमक नगरपालिकाकी उपप्रमुख तथा अनुगमन समिति संयोजक रेगिना भट्टराई प्रसाईको नेतृत्वमा बिहीबार अनुगमन टोलीले विभिन्न होटल, निरीक्षण गरेको हो।

अनुगमनको क्रममा दमकमा रहेको संगम स्वीट्समा अत्यधिक तेलको प्रयोग र सरसफाइमा लापरवाही भेटिएकोले १५,००० जरिवाना गरिएको उपप्रमुख प्रसाईले जानकारी दिइन्। त्यस्तै, गोर्खा किचनमा म्याद गुज्रिएको सामग्री फेला परेको र त्यसलाई कारबाहीको दायरामा ल्याइएको उनले बताइन्।

उपप्रमुख प्रसाईका अनुसार नगरवासीको स्वास्थ्यलाई केन्द्रमा राखेर नगरपालिकाले अनुगमनलाई निरन्तरता दिइरहेको छ। “मानव स्वास्थ्यमा हानिकारक हुने खाद्यवस्तु पाइएमा नगरपालिकाको मापदण्डअनुसार रु. १५,००० देखि ५०,००० सम्म जरिवाना गरिन्छ,” उनले भनिन्।

अनुगमन टोलीमा नगर प्रहरी प्रमुख रुद्रजंग कार्की, इलाका प्रहरी कार्यालय दमकका प्रतिनिधि, उद्योग वाणिज्य सङ्घका कार्यालय प्रमुख निरज बिष्ट, खाद्य निरीक्षक रिजा हुमागाई, दमक नगरपालिकाकी खाद्य अधिकृत लक्ष्मी न्यौपानी लगायतको सहभागिता थियो।

दमक नगरपालिकाले अनियमितता पाइएको व्यवसायहरूलाई सचेत गराउँदै, आगामी दिनमा अझ कडा कदम चाल्ने चेतावनी दिएको छ। स्थानीय तहको यस्तो सक्रियता नागरिकको स्वास्थ्य सुरक्षाका लागि स्वागतयोग्य कदमका रूपमा हेरिएको छ।