साउन १८ , काठमाडौं/ ज्येष्ठ नागरिकहरुको हक, हित र अधिकारका लागि भएका ऐन नियमहरुको पूर्ण कार्यान्वयन र थप सेवा सुविधाको माग गर्दै राष्ट्रिय ज्येष्ठ नागरिक महासंघको केन्द्रीय टोलीले प्रधानमन्त्री के.पी. शर्मा ओलीसँग भेटघाट गरेको छ । प्रधानमन्त्री निवास बालुवाटारमा आइतबार भएको भेटघाट सकारात्मक र आशा जगाउने खालको भएको महासंघका केन्द्रीय अध्यक्ष सूर्य प्रसाद श्रेष्ठले बताउनुभएको छ ।
महासंघले जानकारी र कार्यान्वयनका लागि बुझाएको पत्र वाचन गर्दा प्रधानमन्त्री ओलीले निकै चासो र ध्यान दिएर सुनेको अनि खुशीको भावका साथ त्यसमा भएका मागहरु पूरा गर्न सकारात्मक पहल गर्ने आश्वासन दिएको जानकारी गराइएको छ ।
प्रधानमन्त्रीले ज्येष्ठ नागरिकहरुको जीवन सुखी र खुशी राख्न सरकारले सकेको पहल र कार्य गर्ने कुरामा कुनै कसर बाँकी नराख्ने बताएको पनि टोलीले भेटपछि प्रतिक्रिया दिएको छ । महासंघले ज्येष्ठ नागरिकहरुको स्वास्थोपचारमा ५० प्रतिशत र सार्वजनिक यातायातका साधनमा यात्रा गर्दा यातायात भाडामा ५० प्रतिशत छूट दिनुपर्ने कानुनी व्यवस्थालाई पूर्णरुपले लागू गर्न माग गर्दै आएको छ ।
त्यस्तै नागरिकता नपाएका ज्येष्ठ नागरिकको पहिचान र व्यवस्थापन, वृद्धभत्ता वितरण प्रणालीमा सुधार, उमेर र अवस्थाका आधारमा ज्येष्ठ नागरिकहरुको वर्गीकरण गरी सामाजिक सुरक्षा भत्ता दिने व्यवस्था तथा राष्ट्रिय सभामा जेष्ठ नागरिकको तर्फबाट प्रतिनिधित्व सुनिश्चित गर्नुपर्ने लगायतका मागहरू पनि राख्दै आएको छ । खासगरी हाल देशमा २५०० भन्दा बढी ज्येष्ठ नागरिकहरु नागरिकताविहीन अवस्थामा रहेको र यसले उनीहरूलाई राज्यको सेवा सुविधाबाट वञ्चित बनाएको भन्दै यो समस्या समाधान गर्न नेतृत्व र पहलकदमी लिइदिन महासंघले अनुरोध गर्ने गरेको छ ।
प्रधानमन्त्री ओलीसंगको भेटमा ज्येष्ठ नागरिक बैंकको स्थापना गर्न पनि माग गरिएको बताइएको छ । भेटघाटका लागि महासंघका अध्यक्ष सूर्य प्रसाद श्रेष्ठको नेतृत्वमा प्रथम उपाध्यक्ष शारदा देवी चन्द, महासचिव मोहनलाल श्रेष्ठ, कोषाध्यक्ष केदारनाथ तिमिल्सिना, सचिव वासुदेव शर्मा पण्डित, केन्द्रीय सदस्यहरु क्रमशः डा. गोपाल खनाल, विवेन्द्र भक्त प्रधानाङ्ग लगायतको टोली वालुवाटार पुगेको थियो । महासंघको टोलीले प्रधानमन्त्री समक्ष प्रदेश ज्येष्ठ नागरिक महासंघ र जिल्ला ज्येष्ठ नागरिक महासंघहरुलाई कसरी ज्येष्ठ नागरिकहरुको हक, हित र अधिकारको काममा परिचालन गर्ने साथै त्यसका लागि राज्यका तर्फबाट के कस्तो साथ सहयोग चाहिन्छ भन्ने बारेमा पनि समस्या र समाधान सहितका विषयहरु प्रष्ट रुपमा राखेको थियो । प्रधानमन्त्री ओलीले पनि ज्येष्ठ नागरिकको टोलीसंग खुलेर आफ्ना कुराहरु राख्नुभएको थियो ।
यस्ता मागहरुका सन्दर्भमा राज्य र सरकारको ध्यानाकृष्ट गर्न महासंघको टोलीले यसअघि राष्ट्रपति रामचन्द्र पौडेल, महिला, बालबालिका तथा ज्येष्ठ नागरिक मन्त्री नवल किशोर साह सुडी, नेपाली काँग्रेसका सभापति तथा पूर्वप्रधानमन्त्री शेरबहादुर देउवा, नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल प्रचण्ड, राप्रपा अध्यक्ष राजेन्द्र लिङ्देन, राष्ट्रिय स्वतन्त्र पार्टीका कार्यवाहक सभापति डोल प्रसाद अर्याल लगायतसँग भेटघाट गरिसकेको छ ।
