भदौ ६, दमक / दमक उद्योग वाणिज्य सङ्घको ३५ औं वार्षिकोत्सव तथा स्थापना दिवसको अवसरमा आयोजित तेस्रो उद्योग वाणिज्य कप अन्तर वस्तुगत सङ्घ फुटसल प्रतियोगिता शनिबार सम्पन्न भएको छ।

दमक–५ स्थित बिस्ट फुटसलमा भदौ ५ र ६ गते सम्पन्न प्रतियोगितामा १० वटा वस्तुगत सङ्घहरूको सहभागिता रहेको थियो। फाइनलमा निर्माण व्यवसायी सङ्घले मोबाइल व्यवसायी सङ्घलाई ३–० गोल अन्तरले पराजित गर्दै उपाधि हात पारेको हो।
यससँगै निर्माण व्यवसायी सङ्घ पहिलो, मोबाइल व्यवसायी सङ्घ दोस्रो बनेका छन् भने फर्निचर व्यवसायी सङ्घले अनुशासित टोलीको पुरस्कार जित्यो।

व्यक्तिगततर्फ निर्माण व्यवसायी सङ्घका दिपेन थापा उत्कृष्ट गोलकिपर, मोबाइल व्यवसायी सङ्घका शरण राई उच्च स्कोरर तथा निर्माण व्यवसायी सङ्घकै लेलेन सुब्बा उत्कृष्ट खेलाडी घोषित भए। विजेताहरूलाई पहिलो स्थानका लागि रु. ३३,३३३, दोस्रो स्थानका लागि रु. २२,२२२, उत्कृष्ट गोलकिपर र उच्च स्कोररलाई रु. २,२२२, र उत्कृष्ट खेलाडीलाई रु. २,५०० नगद पुरस्कार प्रदान गरिएको थियो।

समापन समारोहमा प्रमुख अतिथि तथा सङ्घका पूर्व अध्यक्ष विजयप्रसाद बरालले व्यवसायीबीच एकता र आपसी सम्बन्ध मजबुत बनाउन खेलकुदको भूमिका महत्त्वपूर्ण हुने बताए। त्यस्तै, सङ्घका अध्यक्ष गोपाल गुराँगाईले खेलकुद स्वास्थ्य दिगो बनाउने माध्यम मात्रै नभई व्यवसायीबीच आपसी सम्बन्ध बलियो बनाउन पनि उपयोगी हुने बताए।