कमल–०२, तोपगाछी / कमल नगर अस्पतालमा बिरामी र कुरुवाहरूको सहजताका लागि निर्माण गरिएको प्रतीक्षालय (कुरुवा घर) थप व्यवस्थित र रोगीमैत्री बनाउन पहल सुरु गरिएको छ।
मिति २०८० जेठ ४ गते एनएमबी बैंक, कमल शाखाले १ लाख ८० हजार रुपैयाँ लागतमा निर्माण सम्पन्न गरी गाउँपालिका अध्यक्ष हुकुमसिंह राईलाई हस्तान्तरण गरेको यो प्रतीक्षालय अहिले अस्पताल सेवामा प्रभावकारी बनेको छ।
अध्यक्ष राईले स्वास्थ्य पूर्वाधार विस्तारलाई निरन्तर प्राथमिकता दिँदै आएको सेवाग्राहीहरूको भनाइ छ। उहाँको नेतृत्वमा अस्पतालमा विभिन्न पूर्वाधार सुधार र सेवा विस्तार भइरहेका छन्।
यसैबीच, अस्पताल व्यवस्थापन समितिका सदस्य समेत रहेका वडा नं. २ का अध्यक्ष अशोक सुब्बाले प्रतीक्षालय अझ सुविधा सम्पन्न बनाउन बस्ने ठाउँ व्यवस्थित गर्ने र पंखा जडान गर्नुपर्ने सुझाव दिएका छन्। आज वडा अध्यक्ष सुब्बा र एनएमबी बैंक, केर्खा शाखा प्रमुख चित्र न्यौपानेबीच भएको भेटमा उक्त सुझाव अघि सारिएको हो।
बैंकका प्रबन्धक न्यौपानेले सुझावलाई सकारात्मक लिँदै दशैंअघि नै, नभए दशैं–तिहार सकिएलगत्तै थप संरचना जडान गर्ने प्रतिवद्धता जनाएका छन्। उहाँले अस्पताललाई निरन्तर सहयोग गर्ने र रोगीमैत्री वातावरण बनाउन बैंक सधैं तत्पर रहने बताए।
सेवाग्राहीहरूले प्रतीक्षालय निर्माणपछि वर्षात् र गर्मी मौसममा बस्न सहज भएको अनुभव सुनाएका छन्। उनीहरूले थप सुविधा थपिएपछि यो प्रतीक्षालय अस्पतालकै आकर्षण बन्ने विश्वास व्यक्त गरेका छन्।
अध्यक्ष हुकुमसिंह राईको नेतृत्व, वडा अध्यक्ष अशोक सुब्बाको सक्रिय सुझाव र एनएमबी बैंकको सामाजिक उत्तरदायित्वपूर्ण पहलको परिणामस्वरूप बनेको यो प्रतीक्षालय अस्पताल सेवामा महत्वपूर्ण उपलब्धि बनेको छ। आगामी दिनमा थप सुधारसहित बिरामी र कुरुवाहरूलाई अझ सहज सेवा दिने अपेक्षा गरिएको छ।
