भदौ १६, विर्तामोड / राष्ट्रिय प्रजातन्त्र पार्टीका अध्यक्ष तथा पूर्व उपप्रधानमन्त्री राजेन्द्र लिङ्देनले गैरआवासीय नेपालीहरुको बंशजलाई नागरिकता दिन निरन्तरता दिनुपर्ने माग गर्नुभएको छ।
आज विर्तामोडमा पार्टी जिल्ला कार्य समितिद्वारा आयोजित पत्रकार सम्मेलनमा बोल्दै उहाँले विदेशमा रहेका नेपालीलाई नेपालको समृद्धिसँग जोड्न बंशजलाई नागरिकताको हक सुनिश्चित गर्न आवश्यक भएको बताउनुभयो।
लिङ्देनले भन्नुभयो, “हामीकहाँ दुई वटा नेपाल छन्— एउटा मेची–महाकालीभित्रको नेपाल र अर्को विदेशमा रहेका प्रवासी नेपालीहरूको नेपाल। प्रवासमा रहेका नेपालीहरूले भूगोल बाहिर रहे पनि उनीहरूको चिन्ता नेपालमै बढी छ।”
वि.सं. २०६३ पछि बनेको नागरिकता ऐनमा दोहोरो नागरिकता राख्न नपाउने प्रावधानका कारण विदेशमा पढ्न, काम गर्न र बसोबास गर्न पुगेका नेपाली बंशजलाई ठूलो असर परेको उहाँको भनाइ थियो।
“विदेशी देशहरूले दीर्घकालीन बसाइ र कामका लागि आफ्नो नागरिकता लिन बाध्य बनाउँछन्। तर, त्यसले नेपालप्रतिको नाता तोडिदिएको होइन,” उहाँले स्पष्ट पार्नुभयो। “कमाइ गरेर नेपालमै पैसा पठाइरहेका बेला दोहोरो नागरिकता निषेधका कारण बंशजको नेपाली नागरिकता समाप्त पारियो, जुन राष्ट्रहित विपरीत थियो।”
लिङ्देनले बंशजको नागरिकता खोसिएपछि वैदेशिक आम्दानी नेपाल ल्याउनेभन्दा उल्टो देशभित्रको सम्पत्ति गैरकानूनी रूपमा विदेश लैजाने प्रवृत्ति बढेको उल्लेख गर्नुभयो। उहाँले राष्ट्रिय प्रजातन्त्र पार्टी गैरआवासीय नेपालीसँग सम्पर्क नटुटाउने पक्षमा रहेको र नागरिकता ऐनलाई सच्याएर बंशजलाई निरन्तरता दिने प्रावधान गर्नुपर्नेमा जोड दिनुभयो।
