कमल, २० भदौ / पूर्वपश्चिम लोकमार्गअन्तर्गत निर्माणाधीन काँकरभिट्टा–लौकही सडक आयोजनाको क्रममा झापाको कमल गाउँपालिकामा एचआईभी/एड्स, यौन रोग तथा मानव बेचबिखनसम्बन्धी सचेतना कार्यक्रम सम्पन्न भएको छ।

मंगलबार पडाजुंगीस्थित रोड स्टार सभाहलमा आयोजित उक्त कार्यक्रम भौतिक पूर्वाधार तथा यातायात मन्त्रालय र एशियाली विकास बैंक (ADB) को आर्थिक सहयोगमा सञ्चालित राजमार्ग अभिवृद्धि आयोजना अन्तर्गत गरिएको हो।

कार्यक्रममा वडा नं. ३, ४ र ५ का स्थानीय बासिन्दा, सडक निर्माणमा संलग्न श्रमिक, यातायातकर्मी र अन्य चलायमान जनसंख्यालाई लक्षित गरी स्वास्थ्य तथा सामाजिक जोखिमबारे जानकारी दिइएको थियो।

लैङ्गिक समानता तथा सामाजिक समावेशीकरण विज्ञ जीवन सिंहले सडक निर्माणसँगै बाहिरबाट आउने कामदारहरूको उपस्थितिले महिलाहरू, बालबालिका र स्थानीयमा यौनजन्य हिंसा, दुर्व्यवहार र मानव बेचबिखनको जोखिम बढ्ने सम्भावना रहेको बताउँदै समयमै परीक्षण, उपचार र सतर्कता आवश्यक रहेको उल्लेख गरिन्।

स्वास्थ्यकर्मी दीपक दाहालले एचआईभी/एड्स र यौन रोगसम्बन्धी जानकारी प्रस्तुत गरेका थिए भने दमक इलाका प्रहरी कार्यालयका सई कुमार खतिवडाले मानव बेचबिखन तथा लागुऔषधका जोखिम र सुरक्षा उपायबारे प्रोजेक्टरमार्फत प्रस्तुति दिएका थिए।

५० भन्दा बढी शिक्षक, सामाजिक संस्थाका प्रतिनिधि र स्थानीयको सहभागिता रहेको कार्यक्रममा सिंहकै सहजीकरणमा विभिन्न छलफल पनि भएका थिए। उनका अनुसार झापा, मोरङ र सुनसरी जिल्लाका विभिन्न पालिकामा यस्ता जनचेतना कार्यक्रमहरू सञ्चालन भइरहेका छन्। साथै सडक छेउका विभिन्न स्थानहरूमा चेतनामूलक साइनबोर्डहरू राख्ने कार्य पनि अघि बढाइएको छ।