भदौ २०, कमल / झापाको कमल गाउँपालिका–२ समयगढस्थित श्री महेन्द्र रत्न माध्यमिक विद्यालयमा दन्त स्वास्थ्य शिविर तथा सर्पदंशसम्बन्धी सचेतनामूलक कार्यक्रम सम्पन्न भएको छ।
दमक थुलुङ डेन्टल केयरको प्राविधिक सहयोगमा आयोजित विद्यालय स्वास्थ्य कार्यक्रम अन्तर्गत विद्यार्थी, अभिभावक र शिक्षकहरूको दन्त स्वास्थ्य परीक्षण, परामर्श तथा आवश्यक उपचार प्रदान गरिएको थियो। कार्यक्रममा डा. सोफिया थुलुङ र डा. हाङमा माखिम लिम्बू नेतृत्वको चिकित्सक टोलीले सेवा उपलब्ध गराएको हो।
कुल ३३८ जना विद्यार्थी, शिक्षक र अभिभावकहरूले शिविरबाट लाभ उठाएका थिए। डा. थुलुङका अनुसार हालका बालबालिकामा किराले दाँत खाने समस्या बढी देखिएको छ।
विद्यालय व्यवस्थापन समितिका अध्यक्ष पवन चाम्लिङ राईले यस किसिमका कार्यक्रमले शिक्षा सँगै विद्यार्थीहरूको स्वास्थ्यमा पनि टेवा पुग्ने बताउनुभयो। वि. सं २०२४ मा स्थापना भएको विद्यालयमा हाल ४२० विद्यार्थी अध्ययनरत छन्।
वडा सदस्य महेन्द्र खत्रीका अनुसार वडा कार्यालयले प्रत्येक विद्यालयमा यस्ता स्वास्थ्य शिविर सञ्चालन गर्दै आएको छ, जसले बालबालिका र अभिभावकलाई दन्त स्वास्थ्य जाँचमा सहजता पुर्याएको छ।
कार्यक्रममा कमलनगर अस्पतालका सिनियर अहेब लक्ष्मण भट्टराई, हाम्रो सरोकार डट नेटका सञ्चालक तथा पत्रकार अनिल देव राई, विद्यालयका शिक्षक तथा अभिभावकहरूको समेत उपस्थिति रहेको थियो। दमक–६ वाणिज्य बैंक अगाडि रहेको थुलुङ डेन्टल केयरले दन्त रोगका विशेषज्ञ डाक्टरमार्फत निरन्तर सेवा प्रदान गर्दै आएको छ।
